ޗާގޮސްގެ މައްސަލާގައި ސަރުކާރާ ދެކޮޅަށް ބޮޑު އެއްވުމެއް ބޭއްވުމަށް އިދިކޮޅު ޕީޕީއެމްއިން އިވެސް ކުރަމުންދާ މަޝްވަރާތަކަށް ސަރުކާރު ހިންގާ ކޯލިޝަންގައި ހިމެނޭ ޖުމުހޫރީ ޕާޓީގެ ތާއީދު ނެތްކަމަށް "ޚަބަރު އޮންލައިން"އަށް މައުލޫމާތު ލިބިއްޖެއެވެ.
މިގޮތުން އިދިކޮޅު ޕީޕީއެމްއިން އިސްވެ އޮވެ ކުރިޔަށް ގެންދަމުންދާ މި މަޝްވަރާތަކުގައި ބައިވެރިވާ ފަރާތަކުން "ޚަބަރު އޮންލައިން"އަށް މައުލޫމާތު ދީފައިވާ ގޮތުތައި، އިދިކޮޅު ޕީޕީއެމްއިން ބައެއް ސިޔާސީ ޕާޓީތަކާއި މަޝްވަރާތައް ކުރިޔަށް ގެންގޮސްފައިވަނީ، ޗާގޮސްގެ މައްސަލާގައި ޚިޔާލު އެއްގޮތް ޕާޓީތައް އެކުވެގެން މިމަހުގެ 18 ވަނަ ދުވަހު ސަރުކާރާ ދެކޮޅަށް ބޮޑު އެއްވުމެއް ބޭއްވުމަށް ކަމުގައެވެ. އެހެންނަމަވެސް، ޕީޕީއެމް އިސްވެއޮވެ ބާއްވާން އެޕާޓީން ބޭނުންވާ މި އެއްވުމުގައި ބައިވެރިވުމަށް ޖޭޕީން ބޭނުން ނުވާކަމަށް ވަނީ މައުލޫމާތު ލިބިފައެވެ.
އަދި މިހާރު ކޮންމެ ރެއަކުހެން ސައި މޭޒުތަކުގައި ކުރިޔަށްދާ މަޝްވަރާ ބައްދަލުވުންތަކުގައި ޖޭޕީގެ މަޖިލިސް މެމްބަރު އަލީ ހުސެއިން ބައިވެރިވަމުންދިޔަ ނަމަވެސް، އޭނާ މި މަޝްވަރާތަކުގައި ބައިވެރިވަމުންދަނީ ރަސްމީގޮތުން ޖޭޕީ ތަމްސީލު ކުރުމަށް ނޫންކަމަށްވެސް ވަނީ މައުލޫމާތު ލިބިފައެވެ.
ޗާގޮސްގެ މައްސަލާގައި ބޮޑު އެއްވުމެއް ބޭއްވުމަށް ޖުމުހޫރީ ޕާޓީގެ ތާއީދު ނެތްނަމަވެސް، އެޕާޓީއަކީ ޗާގޮސްގެ މައްސަލާގައި ސަރުކާރާ ޚިޔާލު ތަފާތު ޕާޓީއެއްކަން ފާހަގަ ކޮށްލެވެއެވެ. މިގޮތުން ޖޭޕީގެ ލީޑަރު އަދި ރިޔާސީ ކެނޑިޑޭޓު ގާސިމް އިބުރާހިމް ވިދާޅުވެފައިވަނީ ރާއްޖޭގެ އިމުން އެއްވެސް މިންވަރެއް ގެއްލިގެން ދިއުމަށް ޖުމުހޫރީ ޕާޓީން ތާއީދު ނުކުރާނެ ކަމަށެވެ.
ރާއްޖޭގެ ދެކުނުން އައްޑޫ އަތޮޅުގެ ބޭރުން އޮންނަ ޗާގޮސްގެ މިލްކުވެރިކަން ބައިނަލްއަގުވާމީގޮތުން މޮރިޝަސްއަށް އޮތް ކަމަށް ކަނޑައެޅިގެން ދިއުމަށްފަހު އިޓްލޮސްއިން އިއްވި ހުކުމާއެކު، އިދިކޮޅު ސިޔާސީ ފަރާތްތަކުން ތުހުމަތު ކޮށްފައިވަނީ މި ސަރުކާރުން ރާއްޖޭގެ ކަނޑުގެ ސަރަހައްދެއް ވިއްކާލާފައިވާ ކަމުގައެވެ.
އަދި ފާއިތުވެދިޔަ ހަފްތާގައި ކުރީގެ ބައެއް ވަޒީރުންނާއި ބައެއް ސިޔާސީ ޕާޓީތަކުން ވަނީ މިމައްސަލާގައި ގުޅިފައިވާ ޕްރެސް ކޮންފަރެންސެއް ބާއްވާފައެވެ.
މި ނޫސް ކޮންފަރެންސަށްފަހު އިދިކޮޅު ޕީޕީއެމްގެ ލީޑަރޝިޕްގައި ހިމެނޭ ބައެއް ބޭފުޅުންވަނީ އެމްޑީޕީގެ ފިކުރެއްގެ ދިރުން ސިޔާސީ ހަރާކަތުގެ އިސް ބައެއް ބޭފުޅުންނާ މަޝްވަރާ ކޮށްފައެވެ. އަދި މިހަފްތާގައި ޕީޕީއެމްގެ ލީޑަރޝިޕުންވަނީ، ކުރިޔަށް އޮތް ރިޔާސީ އިންތިޚާބުގައި ވާދަކުރާނޭކަން އިއުލާން ކޮށްފައިވާ އުމަރު ނަސީރާއިވެސް ޗާގޮސްގެ މައްސަލާގައި މަޝްވަރާ ކޮށްފައެވެ.
އިދިކޮޅު ޕީޕީއެމްއިން އިންތިޒާމްކޮށްގެން، ސިޔާސީ ޕާޓީތަކާއި އަދި ސިޔާސީ ބައެއް ފަރާތްތައް އެއް ޕްލެޓް ފޯމެއްގައި ސަރުކާރާ ދެކޮޅު ބޮޑު އެއްވުމެއް ބޭއްވުމަށް މަޝްވަރާ ކުރަމުންދާއިރު، އޭގެ ތެރޭގައި ހިމެނޭ ގިނަ ސިޔާސީ ޕާޓީތަކަކީވެސް ކުރިޔަށް އޮތް ރިޔާސީ އިންތިޚާބުގައި ވާދަކުރާނޭކަން އިއުލާން ކޮށްފައިވާ ޕާޓީތައްކަންވެސް ފާހަގަ ކޮށްލެވެއެވެ.
One Response
އަލީ ހުސެން އެބައިން