އިދިކޮޅު ޕްރޮގްރެސިވް ކޯލިޝަންގެ ލީޑަރޝިޕް އޮތީ ރައީސް ޔާމީންގެ ފަހަތްޕުޅުގައިކަން އެކޯލިޝަންގެ ލީޑަރޝިޕުން ކަށަވަރު ކޮށްދީފިއެވެ.
ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ރިޔާސީ އިންތިޚާބަށް މިހާ ގާތްވެފައި ވަނިކޮށް، ލީޑަރޝިޕްގައި ރިޔާސީ އިންތިޚާބަށް ވާދަކުރުމުގެ ޝައުގުވެރިކަން އެއްވެސް ބޭފުޅެއްގެ މެދުގައި އޮތްތޯއާއި އަދި އެފަދަ ޝައުގުވެރިކަމެއް އޮތްތޯ ސުވާލު ކޮށްފައެވެ.
މިސުވާލުގެ ޖަވާބު އެވަގުތު ޕްރެސް ކޮންފަރެސް ލީޑުކުރައްވަމުންދިޔަ އަބްދުއްރަހީމް ވަނީ ދެއްވާފައެވެ. އޭނާ ވިދާޅުވީ ޕީޕީއެމްގެ ލީޑަރޝިޕްގައި އެއްވެސް ދެބަވުމެއް ނެތްކަމަށެވެ. އެންމެންވެސް ތިބީ ރައީސް ޔާމީންގެ ފަހަތްޕުޅުގައި ވަރަށް ސާބިތު ކަމާއިއެކުގައިކަމަށެވެ. އަބްދުއްރަހީމް ވަނީ ނޫސްވެރިން ތުހުމަތު ކުރެއްވި ވަކިވަކި ލީޑަރޝިޕް ބޭފުޅުންނަށް ފުރުސަތު ދެއްވައި އެބޭފުޅުން ތިއްބެވި ގޮތް ނޫސްވެރިންނަށް ހިއްސާ ކުރައްވާފައެވެ.
އެގޮތުން ޕީޕީއެމްގެ ޓިކެޓަށް އެންމެ ބޮޑަށް ޝައުތުވެރިކަން އޮތްކަމަށް ބުނާ މާލެ ސިޓީ ކައުންސިލްގެ މޭޔަރު ޑރ.މުއިއްޒު ވިދާޅުވީ ހުންނެވީ ރައީސް ޔާމީންގެ ފަހަތްޕުޅުގައި ކަމަށާއި، އިންތިޚާބުގައި ވާދަކުރެއްވުމުގެ އެއްވެސް ޝައުގުވެރިކަމެއް ނެތްކަމަށެވެ. އަދި މިހާރުވެސް ހުރިހާ މަސައްކަތެއް ކުރައްވަނީ ރައީސް ޔާމީން މިނިވަންކޮށް އިންތިޚާބު ރައީސް ޔާމީނަށް ކާމިޔާބު ކޮށްދެއްވުމަށް ކަމަށެވެ.
ގުރައިދޫ ދާއިރާގެ މެމްބަރު އަދި ޕީޕީއެމްގެ ނައިބް ރައީސް ޣައްސާން މައުމޫން ވިދާޅުވީ ރައީސް ޔާމީނަށް ރިޔާސީ އިންތިޚާބުގައި ވާދަކުރެވޭނެ ކަމުގެ ޔަގީންކަން އެބައޮތްކަމަށެވެ. އެމަނިކުފާނަށް އިންތިޚާބުގައި ވާދަނުކުރެވޭނެ ކަމަށް ބަލައިގެން މަސައްކަތް ނުކުރާކަމަށާއި، ޕީޕީއެމް އޮތީ ބަދަހިކޮށް ރައީސް ޔާމީންގެ ފަހަތުގައިކަމަށް އޭނާ ވިދާޅުވިއެވެ.
ނައިފަރު ދާއިރާގެ މެމްބަރު އަހުމަދު ޝިޔާއާއި، މަޑުއްވަރީ ދާއިރާގެ މެމްބަރު އާދަމް ޝަރީފްއާއި، މާވަށު ދާއިރާގެ މެމްބަރު މުހައްމަދު ސައީދުވެސް ވަނީ ޕްރެސްގައި މިޔަގީންކަން ހަމަ އެގޮތަށް ދެއްވާފައެވެ. މިބޭފުޅުންވެސް ވިދާޅުވީ ރައީސް ޔާމީނަށް އިންތިޚާބު ކާމިޔާބު ކުރުމަށް ކުރަންޖެހޭ މަސައްކަތް ކުރުމަށް ތައްޔާރަށް ތިއްބެވި ކަމަށެވެ.
މިޕްރެސްގައި އަދުރޭ ވިދާޅުވީ ރައީސް ޔާމީނަށް އިންތިޚާބުގައި ވާދަކުރެވޭނެކަމަށް، އިލެކްޝަނުން ބުނަމުންދާއިރު، ސަރުކާރުން ރައީސް ޔާމީނަށް ކެމްޕެއިން ކުރުމުގެ ޖާގަ ދޭންޖެހޭކަމަށެވެ. ރައީސް ޔާމީން ބަންދުކޮށް ސިޔާސީ މަގްސަދެއްގައި އަދަބު ދިނުމަކީ ބަލައި ގަނެވޭނެ ކަމެއް ނޫންކަމަށް އަދުރޭ ވިދާޅުވިއެވެ.
ވ. އާރަށުގެ މައްސަލައިގައި ދައުލަތުން ރައީސް ޔާމީންގެ މައްޗަށް އުފުއްލެވި ދެ ދަޢުވާއެއް ސާބިތުވުމާ ގުޅިގެން އެމަނިކުފާނުގެ މައްޗަށް 11 އަހަރުގެ ޖަލު ޙުކުމެއް މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ވަނީ އިއްވަވައިފައެވެ. އަދި އެމަނިކުފާނު މިވަގުތު ހުންނެވީ ޙުކުމް ތަންފީޒުކުރެއްވުމަށް ކ.މާފުށީ ޖަލުގައެވެ.
