މިއަދު ހަވީރު ދެ ލޯންޗެއް މުޑި އަރައިގެން ހިނގި އެކްސިޑެންޓުގައި ނިޔާވީ ވިޔަފާރަވެރިއެއް ކަމުގައިވާ ، އުމުރުން 53 އަހަރުގެ ސައުދުﷲ އަހުމަދުކަމަށް "ޚަބަރު އޮންލައިން" މައުލޫމާތު ލިބިއްޖެއެވެ. އޭނާ ނިޔާވެފައިވަނީ، އެކްސިޑެންޓުގައި ލިބުނު އަނިޔާތަކަށް އޭޑީކޭ ހޮސްޕިޓަލުގައި ފަރުވާ ދެމުން ދަނިކޮށެވެ.
ފުލުހުން ހާމަ ކޮށްފައިވާ ގޮތުގައި، ފޭދޫފިނޮޅު ކައިރުން މި ދެ ލޯންޗު ޖެހި އެކްސިޑެންޓް ހިނގާފައިވާކަމަށް ފުލުހުންނަށް ރިޕޯޓު ކޮށްފައިވަނީ މިއަދު ހަވީރު 16:42 ހާއިރުއެވެ. އަދި އެކްސިޑެންޓުގައި އަނިޔާވި 53 އަހަރުގެ މީހަކަށް އޭޑީކޭ ހޮސްޕިޓަލުގައި ފަރުވާ ދެމުން ދަނިކޮށް އޭނާ ނިޔާވެފައިވާކަމަށް އެ ހޮސްޕިޓަލުން މައުލޫމާތު ދީފައިވާކަމަށްވެސް ފުލުހުން ހާމަކޮށްފައި ވެއެވެ.
މި އެކްސިޑެންޓާއި ގުޅޭގޮތުން ބަލަންޖެހޭ އިތުރު ކަންކަން ބަލަމުންދާކަމަށް ފުލުހުން ވަނީ ވިދާޅުވެފައެވެ.
