ދައުލަތުގެ ހަތަރު ބާރުވެސް އޮތީ ސަރުކާރުގެ މުށު ތެރޭގައި ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެއެވެ.

އޭނާ މިހެން ވިދާޅުވީ ދައުލަތުގެ ހަތަރުވަނަ ބާރު މީޑިއާގެ ކޮންޓްރޯލް ސަރުކާރުން ނަގާފައިވާކަމަށްބުނެ އެކަމުގެ ކަންބޮޑުވުން ކުރީގެ ބަންޑާރަނައިބް ދިޔާނާ ސައީދު ކުރެއްވުމާއި ގުޅިގެން ކުރެއްވި ޓުވީޓެއްގައެވެ. ދިޔާނާ ވިދާޅުވީ ރައްޔިތުންނަށް ތެދު ގޮތް ބުނެދީ ކަންކަން ހާމަކުރަން ތިބި އެންމެ މުހިންމު ބަޔަކީ މީޑިތައްކަމަށްވާއިރު، މީޑިއާތައް ވިކި ބަޔަކަށް ފައިދާވާގޮތަށް ވިކުމަކީ އެކަމުގެ ގެއްލުން ރައްޔިތުންނަށް ކުރާނެ ކަމެއްކަމަށެވެ.

މީޑިއާ ވިކިއްޖެ ޤައުމެއް ދެން އޮތީ ފަސާދަވެ ނިމިފަ. ވަކި ތަނަކަށް ނުޖެހޭ ތެދު ޚަބަރު ރައްޔިތުންނާއި ހަމަޔަށް ވާސިލް ނުކުރެވޭނަމަ ހެޔޮ ގޮތް ދެނެގަނެ، ކުރިއަށް ދާނެ މަގު ރައްޔިތުން އިޚުތިޔާރު ކުރާނީ ކިހިނެތްތޯ.

– ދިޔާނާ ވިދާޅުވިއެވެ.

ދިޔާނާގެ ވާހަތަކަށް ތާއީދު ކުރައްވައި އަލީ ހުސެއިން ވިދާޅުވީ ދައުލަތުގެ ހަތަރުވަނަ ބާރު މީޑިއާއާއި، ދައުލަތުގެ އަނެއް ތިންބާރުގެ ކޮންޓްރޯލްވެސް އޮތީ ސަރުކާރުގައިކަމަށެވެ.

ދައުލަތުގެ ހަތަރު ބާރުވެސް އޮތީ ސަރުކާރުގެ މުށު ތެރޭގަ.

– އަލީ ހުސެއިން ވިދާޅުވިއެވެ.

ދައުލަތުގެ ތިން ބާރުގެ ތެރޭގައި ހިމެނެނީ ވެރިކަން ހިންގުމުގެ ބާރާއި، ޤާނޫނު ހެދުމުގެ ބާރާއި، ޝަރުއީ ދާއިރާއެވެ. ހަތަރުވަނަ ބާރަކީ މީޑިއާއެވެ. މީޑިއާގެ މިނިވަންކަން ރާއްޖޭގައި މިހާރު އޮތް ގޮތާއި ވަކިން ޚާއްސަކޮށް ސަރުކާރުގެ ނުފޫޒު މީޑިއާޔަކަށް އިންތިހާއަށް އޮތްކަމަށްބުނެ ބައެއް ފަރާތްތަކުން ދަނީ ކަންބޮޑުވުން ފާޅު ކުރަމުންނެވެ.

އެންމެބޮޑަށް މިކަންބޮޑުވުން ފާހަކަވެގެން ދިޔައީ އިއްޔެ ނިމުނު ޗާގޯސް މައްސަލާގައި އެއް ސުރުހީތަކެއް ގިނަ މީޑިއާތަކެއްގައި ހުރުމުންނެވެ. ޗާގޯސް މައްސަލާގައި ސަރުކާރާއި ދެކޮޅަށް ވާހަކަ ދައްކާ ބޭފުޅުން ވިދާޅުވީ އެގޮތަށް އެކަންވީ ސަރުކާރުން މީޑިއާތަކަށް ފައިސާގެ ނުފޫޒު ފޯރުވުމުންކަމަށެވެ.