ރާއްޖެއާއި މޮރިޝަސްގެ ކަނޑުގެ ސަރަޙަދުން ފުށުއަރާ ސަރަޙައްދުގެ އިން ވަކި ކުރުމުގެ މައްސަލަ، ރާއްޖެއަށް ބޮޑު ބައި ލިބޭގޮތަށް، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސްއިން)އިން ނިންމާފައިވަނީ ރައްޔިތުންނަށް މޮޅުވާގޮތަށް ކަމަށް ވިދާޅުވެ، ރައީސް ސާލިހުގެ ކެބިނެޓްގެ ފިޝަރީޒް މިނިސްޓަރު ޑރ. ހުސެއިން ރަޝީދު ހަސަން ރައީސް ސާލިހަށް މަރުހަބާ ވިދާޅުވެއްޖެއެވެ.
ދިވެހިރާއްޖޭގެ އީ.އީ ޒެޑް ގެ ދެކުނު ބައުންޑަރީ ކަނޑައެޅިގެންދިޔައީ ރާއްޖެއަށް ބޮޑުބައި ލިބޭގޮތަށް އަދި ރައްޔިތުންނަށް މޮޅުވާގޮތަށް. މިއީ ވަރަށް ބޮޑު ކާމިޔާބީއެއް.
މަރުހަބާ ދިވެހި ރައްޔިތުން،މަރުހަބާ ރައީސް @ibusolih، މަރުހަބާ @abdulla_shahid @ibriffath އަދި ޓީމް. 🇲🇻— Hussain R. Hassan (@DrHussainHassan) April 28, 2023
ޗާގޮސްގެ މައްސަލާގައި ޑރ. ހުސެއިން ރައީސް ސާލިހަށް މަރުހަބާ ވިދާޅުވެފައިވާއިރު، ހުސެއިންއަކީ ކުރިޔަށް އޮތް ރިޔާސީ އިންތިޚާބަށް ރައީސް ސާލިހަށް ތާއީދު ކުރައްވާ ބޭފުޅެއް ނޫނެވެ. އޭގެ ބަދަލުގައި ޑރ. ހުސެއިން ކުރިޔަށް އޮތް ރިޔާސީ އިންތިޚާބުގައި ތާއީދު ކުރައްވާނެކަން ހާމަ ކުރައްވާފައިވަނީ ޖުމުހޫރީ ޕާޓީގެ ލީޑަރު ގާސިމް އިބުރާހިމް އަށެވެ.
އެހެންނަމަވެސް، ޗާގޮސްގެ މައްސަލާގައި މިއަދު، ޖުމުހޫރީ ޕާޓީގެ ލީޑަރު ގަސިމް އިބުރާހިމް ވަނީ ސަރުކާރުން ނިންމުން ބަލައިނުގަންނަ ކަމަށް ވިދާޅުވެ، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ސިޓީ ފުޅެއްވެސް ފޮނުއްވާފައެވެ.
ގާސިމް ވިދާޅުވެފައިވަނީ އެ ސިޓީފުޅަކީ، ދިވެހި ސަރުކާރުން ޒަމާނުއްސުރެ ގެންގުޅެމުން އައި ސްޓޭންޑް ކުއްލިއަކަށް ބަދަލުކުރުމާއި ގުޅިގެން، ދިވެހިރާއްޖޭގެ ހާއްޞަ އިގްތިސާދީ ސަރަހައްދުން ބައެއް އުނިވުމުގެ ކަންބޮޑުވުން އޮތުމާއި، އަދި ރައީސުލް ޖުމްހޫރިއްޔާ މޮރިޝަސް ގެ ބޮޑުވަޒީރަށް ފޮނުއްވި ސިޓީފުޅާއި، ދިވެހި ޤައުމުގެ ޤާނޫނު އަސާސީގެ 3 ވަނަ މާއްދާއާއި ފުށުއެރުންތަކެއް ހުރިކަމަށް ޤަބޫލު ކުރެވޭތީ، މިމައްސަލާގައި ދިވެހި ދައުލަތާއި ރައްޔިތުންގެ ހައްގުތައް އެންމެ ފުރިހަމައަށް ހިމާޔަތް ކުރުމުގެ ނިޔަތުގައި ފޮނުއްވި ސިޓީފުޅެއް ކަމުގައެވެ.
އަދި މިއަދުގެ ހުކުމަށްފަހު ޖުމުހޫރީ ޕާޓީއަށް ނިސްބަތްވާ އިސް ބޭފުޅުން ގެންދަވަނީ، މިއީ މިސަރުކާރުގެ އިސްވެރިން ގައުމަށް ވީ ޚިޔާނާތެއްކަމަށް މޭރުންކޮށް ޓުވީޓުވެސް ކުރައްވަމުންނެވެ.
ޗާގޮސްގެ މައްސަލާގައި ޖުމުހޫރީ ޕާޓީގެ ސްޓޭންޑާއި ޚިލާފަށް ޑރ. ހުސެއިން މި ސަރުކާރަށް ތާއީދު ކުރައްވާފައިވާއިރު، ކުރިޔަށް އޮތް ރިޔާސީ އިންތިޚާބަށް ޖުމުހޫރީ ޕާޓީގެ ލީޑަރަށް ތާއީދު ކުރައްވަން ނިންމަވާފައިވާ ނިންމެވުމަށް ބަދަލެއް ގެންނެވިކަމެއް އަދި އެނގިފައެއް ނުވެއެވެ.
One Response
ޑޮކްޓަރ ހުސެން އަކީ ވަކި ފަރާތަކަށް ނުޖެހި ހައްގަށް ތާއީދު ކުރައްވާ އިލްމީ ބޭފުޅެކެވެ. ރިޔާސީ އިންތިޚާބަށް ގާސިމް ނުކުންނަވަން ޖެމްހޫރީ ޕާރޓިގެ ބަޔަކު އެހައްދާ ގޯސް ގާސިމަށް ވިސްނަވާ ދެއްވާނެ ކަމަށް އުއްމީދު ކުރަމެވެ. ގާސިމަށް ހަމަ އެންމެ ބުއްދިވެރީ ރައީސް ސޯލިހާއި އެކު ކޮލިސަނުގައި ހުންނެވުންކަން ވިސްނާ ދެއްވާށެވެ.