އިނގިރޭސި ޕްރިމިއާ ލީގުގައި އެވަޓަން ބަލިކޮށް ތާވަލުގެ ތިންވަނައަށް ނިއުކާސަލް ޔުނައިޓެޑް ޖެހިލައިފިއެވެ.
އެވަޓަންގެ ދަނޑުގައި ރޭ ކުޅުނު މެޗް ނިއުކާސްލުން ކާމިޔާބުކުރީ ހަތަރު ލަނޑު އެއްލަނޑުންނެެވެ. ނިއުކާސްލްގެ ފަރާތުން މެޗްގެ ބޮޑުބައި ކޮންޓްރޯލް ކުރި މިމެޗްގައި ގިނަ ހަމަލާ އުފައްދާފައިވަނީވެސް އެ ޓީމުންނެވެ. މިމޗްގެ ފުރަތަމަ ލަނޑު މެޗްގެ 28 ވަނަ މިނެޓްގައި ނިއުކާދަލަށް ކާމިޔާބުކޮށްދިނީ ކެލުމް ވިލްސަންއެވެ. އަދި މިމެޗްގައި ނިއުކާސްލްގެ ދެވަނަ ލަނޑު މެޗްގެ 72 ވަނަ މިނެޓްގައި ޖަހާދިނީ ޖޯލިންޓަންއެވެ. މިލަނޑު ޖެހިތާ ތިން މިނެޓް ފަހުން ވިލްސަން ވަނީ ނިއުކާސްލްގެ ލީޑު އިތުރަށް ފުޅާކޮށްދީފައެވެ. މިއީ އޭނާ މިސީޒަންގައި ނިއުކާސްލްއަށް ލީގުގައި ކާމިޔާބުކޮށްދިން 12 ވަނަ ލަނޑެވެ.
މިމެޗްގައި އެވަޓަންއިން ޖެހި ހަމައެކަނި ލަނޑު މެޗްގެ 80 ވަނަ މިނެޓްގައި ކާމިޔާބުކޮށްދިނީ ޑުވައިޓް މެކްނީލްއެވެ. ނަމަވެސް މިލަނޑު ޖެހިތާ އެއް މިނެޓް ފަހުން ޖޭކޮބް މާފީ ވަނީ ނިއުކާސްލްގެ ހަތަރުވަނަ ލަނޑު ކާމިޔާބުކޮށްދީފައެވެ.
މިކާމިޔާބީއާއެކު ނިއުކާސްލް މިހާރު ވަނީ އެޓީމް ކުޅުނު 32 މެޗުން ލިބިފައިވާ 62 ޕޮއިންޓާއެކު ތާވަލްގެ ތިންވަނައަށް ކުރިއަށް ޖެހިލާފައެވެ. އަދި 20 އަހަރަށް ފަހު މިއަންނަ ސީޒަންގައި ޔުއެފާ ޗެމްޕިއަންސް ލީގުގެ ޖާގައެއް ހޯދުމަށް ކުރަމުންދާ މަސައްކަތަށް މިވަނީ އިތުރު ހިތްވަރެއް ލިބިގެން ގޮސްފައެވެ. އަދި މިމެޗުން ބަލިވުމާއެކު އެވަޓަން މިހާރު އުޅެނީ 28 ޕޮއިންޓާއެކު ތާވަލްގެ 19 ވަނައިގައެވެ. މިއީ އެޓީމް މިސީޒަންގައި ބަލިވި 17 ވަނަ ލީގު މެޗެވެ.
