ނޫސްވެރިން މަސްދަރު ހާމަކުރަން މަޖުބޫރުވާ ގޮތަށް ހެއްކާ ބެހޭ ގާނޫނުގައި އޮތް މާއްދާ އަށް ހުށަހެޅި އިސްލާހު ރައްޔިތުންގެ މަޖިލީހުން ފާސްނުކޮށް އަނބުރާ ކޮމިޓީ އަށް ފޮނުވާލުމުން މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ) އިން ކަންބޮޑުވުން ފާޅުކޮށްފި އެވެ.
މަސްދަރު ހާމަކުރަން ލާޒިމުވާ ގޮތަށް ފަރުމާކުރި ހެއްކާ ބެހޭ ބިލު މަޖިލީހުން ފާސްކޮށް، ރައީސް އިބްރާހިމް މުހައްމަދު ޞާލިހު 18 ޖުލައިގައި ތަސްދީގުކުރެއްވި އިރު، ނޫސްވެރިން ދިޔައީ އެކަމާ ކަންބޮޑުވުން ފާޅުކުރަމުންނެވެ. އެހެންވެ، އެ ކަންބޮޑުންތަކަށް ހައްލެއް ހޯދުމަށް، މަސްދަރު ހާމަކުރަށް އެންގުމުގެ ބާރު ހައި ކޯޓަށް އެކަނި ދިނުމަށް ކަނޑައެޅުމަށް ސަރުކާރުގެ ފަރާތުން މިދިޔަ ނޮވެމްބަރުގައި އެ ގާނޫނަށް އިސްލާހު ހުށަހެޅި އެވެ.
ނަމަވެސް އެ ބިލު ދިރާސާކުރުމަށް ފަހު ޖުޑިޝަރީ ކޮމިޓީން ފާސްކުރި ރިޕޯޓަށް މިއަދުގެ ޖަލްސާގައި ވޯޓަށް އެހިއިރު، ގިނަ މެމްބަރުންގެ ތާއީދު ލިބިފައި ނުވާތީ އެ ބިލު ވަނީ ފާސްނުކޮށް އަނބުރާ ކޮމިޓީއަށް ފޮނުވަން ނިންމައިފަ އެވެ.
މަޖިލީހުގައި މިއަދު އެ އިސްލާހުތަކަށް ވޯޓަށް ހުޅުވާލުމުން 31 މެންބަރުން ބިލު ފާސް ނުކުރަން ވޯޓު ދެއްވި އިރު، ބިލު ފާސް ކުރަން ވޯޓު ދެއްވީ 12 މެންބަރެކެވެ.
އެކަމާ ގުޅިގެން އެމްޖޭއޭ އިން ނެރުނު ބަޔާނެއްގައި ބުނީ މާދަމާއިން ފެށިގެން ރައްޔިތުންގެ މަޖިލިސް ޗުއްޓީއަށް ދާއިރު ދެން އަނެއްކާވެސް މި ބިލު މަޖިލީހުގެ ތަޅުމަށް އަންނަން ދުވަސްތަކެއް ނަގާނެ ކަމަށް ބެލެވޭ ކަމަށެވެ. އަދި ކޮމިޓީ މަރުހަލާ ނިމިގެން އަނެއްކާ ވެސް ބިލު ތަޅުމަށް އަންނާނެ ދުވަހެއް ނޭނގި، ނޫސްވެރިން އިތުރު ބިރުވެރިކަމަށް ވެއްޓިދާނެ ފަދަ ހާލަތެއް މެދުވެރިވުމަކީ އެކަށީގެންވާ ކަމެއް ކަމަށްވެސް އެމްޖޭއޭ އިން ބުނެ އެވެ.
"މި ބިލު ފާސްނުވެ ދިޔުމަކީ މި ޖަމިއްޔާއިން އެއްގޮތަކަށް ވެސް ބަލައިގަންނަ ކަމަކަށް ނުވާއިރު، މި ކަމުގައި ސަރުކާރުގެ ހެޔޮ ނިޔަތާ މެދު އަނެއްކާވެސް މި ވަނީ ސުވާލު އުފެދިފައި." އެ ބަޔާނުގައިވެ އެވެ.
އެމްޖޭއޭ އިން ވަނީ ނޫސްވެރިންތަކަކަށް މިހާރު ގާނޫނު ބޭނުންކޮށްގެން މަސްދަރު ހާމަކުރަން މަޖުބޫރުކުރުމުގެ ކުރިން ވީހާ ވެސް އަވަހަކަށް ބިލުގެ ކޮމިޓީ މަރުހަލާ ނިމި، މި އިސްލާހުތަކާ އެކު މަޖިލީހުން ފާސްކުރުމަށް ގޮވާލައިފަ އެވެ.
