ޖެންޑަރ މިނިސްޓްރީއަށް މިދިޔަ މާޗު މަހު 206 މައްސަލަ ހުށަހަޅާފައިވާކަމަށާ، އޭގެތެރެއިން 98 މައްސަލައަކީ ކުޑަކުދިންނަށް އަނިޔާކޮށްގެން ހުށަހެޅި މައްސަލަކަމަށް އެމިނިސްޓްރީގެ ތަފާސްހިސާބުތަކުން ދައްކައިފިއެވެ.
ޖެންޑަރ މިނިސްޓްރީގެ ތަފާސްހިސާބުތައް ދައްކާގޮތުން މިދިޔަ ފެބްރުއަރީ މަހު އެމިނިސްޓްރީއަށް ހުށަހަޅާފައިވަނީ 284 މައްސަލައެވެ. އެހެންކަމުން މާރޗު މަހު މިވަނީ ހުށަހެޅި މައްސަލަތައް ކޮންމެވެސް ވަރަކަށް މަދުވެފައެވެ. އަދި މާޗްމަހަށްވުރެ ފެބްރުއަރީ މަހު ކުޑަކުދިންނަށް އަނިޔާކޮށްގެން ހުށަހެޅި މައްސަކަތައްވެސް ގިނައެވެ. މާޗްމަހު ކުޑަކުދިންނަށް އަނިޔާކޮށްގެން ހުށަހެޅީ 98 މައްސަލައެވެ. އެހެންނަމަވެސް ފެބްރުއަރީމަހު ވަނީ ކުޑަކުދިއްނަށް ކުރާ އެކި ބާވަތުގެ އަނިޔާ 148 މައްސަލަ ހުށަހަޅާފައެވެ.
މާޗްމަހު ހުށަހެޅި ކުޑަކުދިންނާ ގުޅޭ މައްސަލަތަކުގެ ތެރޭގައި އެންމެ ގިނައީ އިހުމާލުގެ މައްސަލަތަކެއެވެ. އެއީ 29 މައްސަލައެވެ. މީގެއިތުރުން ޖިސްމާނީ ހާނިއްކައިގެ 28 މައްސަލައާއި ކުދިން ކުރިމަތީގައި ގެވެށި އަނިޔާ ކުރުމުގެ 14 މައްސަލައާއި ޖިންސީ ހާނިއްކައިގެ 13 މައްސަލައާއި ނަފްސާނީ ހާނިއްކައިގެ 9 މައްސަލަ މިދިޔަ މަހު ހުށަހަޅާފައިވެއެވެ.
މީގެއިތުރުންވެސް ކުދަކުދިންނަށް އަނިޔާ ލިބިގެން ނުވަތަ ހައްޤުތަކަށް އުނިކަން އައުމުގެ ބައެއް މައްސަލަ ހުށަހަޅާފައިވެއެވެ.
