ރާއްޖޭގައި ހިންގާ ފައިސާގެ ސްކޭމްތައް މަދުކުރުމުގެ ގޮތުން، ކޮންމެ މީހަކަށް ގަނެވޭ ސިމްގެ އަދަދު ލިމިޓް ކުރުމަށް ކޮމިއުނިކޭޝަން އޮތޯރިޓީން ހަދަން ޖެހޭ ގަވައިދު 15 ދުވަސް ތެރޭ ނިންމަން ލަފާދީފައިވާ ރިޕޯޓް ރައްޔިތުންގެ މަޖިލީހުން މިއަދު ފާސްކޮށްފިއެވެ.
ބެންކް އޮފް މޯލްޑިވްސް، ބީއެމްއެލްގެ އެކައުންޓުތަކުން ފައިސާ ގެއްލޭ މައްސަލައާއި، ސްކޭމް ކޯލްތައް ހުއްޓުވުމަށް ކުރެވޭނެ މަސައްކަތްތަކާއި ގުޅޭގޮތުން މަޖިލީހުގެ ސްޓެޓް އޯންޑް އެންޓަރޕްރައިސަސް ކޮމިޓީން ވަނީ ދިރާސާކުރައްވާފައެވެ. އަދި އެކައުންޓްތަކުން ފައިސާ ގެއްލޭ މައްސަލައާއި ސްކޭމް ކޯލްތައް ހުއްޓުވުމަށް ކޮމިޓީން ވަނީ ގިނަ ލަފާތަކެއް ދެއްވާފައެވެ.
ކޮމިޓީގެ ރިޕޯޓަށް މަޖިލީހުހެ ތަޅުމުގައި ވަނީ ވޯޓަށް އަހާފައެވެ. އެ ރިޕޯޓް ފާސްވީ 45 މެންބަރުންގެ އިއްތިފާޤުންނެވެ. މަޖިލީހުން ފާސްކުރެއްވި އެސްއޯއީ ކޮމިޓީގެ ރިޕޯޓުގައި ވަނީ، ސްކޭމް ކޯލްތައް ހުޓުއްވުމުގެ ފިޔަވަޅެއްގެ ގޮތުން ކޮންމެ މީހަކަށް ގަނެވޭ ސިމްގެ ޢަދަދު ލިމިޓް ކުރުމަށް ކޮމިއުނިކޭޝަން އޮތޯރިޓީން ހަދަން ޖެހޭ ޤަވާއިދު 15 ދުވަސް ތެރޭ ނިންމަން ލަފާދެއްވުމަށް ހިމަނުއްވާފައެވެ. އަދި ސްކޭމް ކޯލްތައް ހުއްޓުވުމަށްޓަކައި ކަމާ ބެހޭ ހުރިހާ އިދާރާތައް ގުޅިގެން ޓާސްކްފޯހެއް ހަދަންވެސް ކޮމިޓީގެ ރިޕޯޓްގައި ލަފާދެއްވާފައިވެއެވެ.
މީގެ އިތުރުން އެ ރިޕޯޓުގައި ވަނީ ކަސްޓަމަރުން އަލަށް ނަގާ ސިމްތަކުގެ މައުލޫމާތު ފުރިހަމަ ނުކޮށް ބޭނުންކުރާ މައްސަލަ މިދިޔަ އަހަރު ޑިސެމްބަރު މަހުން ފެށިގެން ހައްލު ކޮށްފައިވާކަމަށާއި، ނަމަވެސް އޭގެ ކުރިން ނަގާފައިވާ ސިމް ކާޑުތަކުގެ މައްސަލަ ހައްލު ކޮށްފައި ނުވާ ކަމަށްވެސް ބަޔާންކުރައްވާފައެވެ.
ރާއްޖޭގައި ބޭނުންކުރާ ހުރިހާ ސިމްތަކަކީ ރަޖިސްޓްރީ ވެފައިވާ ނަމްބަރުތަކެއްކަން ކަށަވަރު ކުރުމަށާއި، އެ ނަމްބަރުތަކުގެ ވެރިފަރާތް ފަސޭހައިން ދެނެގަނެވޭނެ ނިޒާމެއް ގާއިމްކުރުމަށް ކޮމިއުނިކޭޝަން އޮތޯރިޓީއަށް ލަފާދެއްވުމަށްވެސް އެ ރިޕޯޓުގައި ހިމަނުއްވާފައިވެއެވެ. މީގެ އިތުރަށް ފްރޯޑް ކޯލްތަކުގެ މައްސަލަ މާފުށީ ޖަލުން ފެށިގެން އަންނައިރު އެފަދަ ކޯލްތައް ޓެޕް ކުރުމަށް ހަރުކޮށްފައިވާ ޓަވަރަށް ލިބޭ 14 މައުލޫމާތެއް ހިއްސާ ކުރުމަށް އެއްބަސްވެފައިވީ ނަމަވެސް ޓެލެކޮމިއުނިކޭޝަން ސާވިސް ޕްރޮވައިޑަރުން ހިއްސާ ކުރަމުން ގެންދަނީ ނުވަ މައުލޫމާތެއް ކަމަށް އެ ރިޕޯޓުގައި ބުނެފައިވެއެވެ.
މަޖިލީހުން ފާސްކުރެއްވި ރިޕޯޓްގައި އޮޅުވާލައިގެން ފައިސާ ހޯދުމުގެ މައްސަލަތައް ހައްލުކުރުމަށް، އެކަންކަމަށް މީހުން ހޭލުންތެރި ކުރުވުމަށް މަސައްކަތް ކުރުމަށްވެސް ލަފާދެއްވާފައިވެއެވެ.
އެސްއޯއީ ކޮމިޓީއަށް ފުލުހުން ދެއްވާފައިވާ މައުލޫމާތުގައިވާ ގޮތުން އޮޅުވާލައިގެން ފައިސާ ހޯދުމުގެ މައްސަލަތައް އެންމެ ގިނައިން ހުށަހެޅީ މިދިޔަ އަހަރުއެވެ. މިދިޔަ އަހަރު ފުލުހުންނަށް އެފަދަ 1087 މައްސަލަ ހުށަހެޅިއެވެ. އޭގެ ކުރީ އަހަރު 601 މައްސަަލަ އަދި މިއަހަރުގެ މިހާތަނަށް 155 މައްސަލަ ހުށަހަޅާފައިވާކަން ފުލުހުން ހާމަކުރައްވައެވެ.
