މިދުވަސްވަރު ރާއްޖެއަށް އާދަޔާ ޚިލާފަށް ހޫނު ފަދަވުމާއެކު މާލޭގައި ކަރަންޓް ބޭނުންކުރި މިންވަރު ދުވަހަކުވެސް މައްޗަށް ނުދާ މިންވަރަށް މައްޗަށް ގޮސް ނުރައްކަލާ ކުރިމަތިވެއްޖެއެވެ.
ސްޓެލްކޯއިން ވިދާޅުވީ މާލޭގައި ކަރަންޓް ބޭނުންކުރި މިންވަރު މިއަދު ވަނީ 102 މެގަވޮޓަށް އަރާފައިވާކަމަށާ، ކާރިޘީ ޙާލަތަކަށް ނުގޮސް ސަލާމަތްވާނީ ޢާންމުންގެ އެހީތެރިކަން ލިބިގެންކަމަށެވެ. ދައުލަތުގެ މީޑިއާއަށް މަޢުލޫމަތުދެއްވަމުން ސްޓެލްކޯގެ މެނޭޖިން ޑިރެކްޓަރ އަހުމަދު ޝަރީފު ވިދާޅުވެފައިވަނީ މާލޭގައި ކަރަންޓު އުފެއްދޭ މިންވަރަށް ބަލާއިރު، މިހާރުގެ ޙާލަތުގައި އިމަރޖެންސީ ހާލަތަކަށް ނުގޮސް ފަރުޖެއްސޭނީ އާންމުންގެ އެއްބާރުލުން ލިބިގެންކަމަށެވެ. ކަރަންޓު ބޭނުންކުރާ މިންވަރު މަދު ކުރުމަށް ޝަރީފް ވަނީ އިލްތިމާސްކުރައްވާފައެވެ.
ހޫނު ގަދަ ދުވަސްވަރު ކަރަންޓު ބެނުންކުރާ މިންވަރު އިތުރުވަނީ ފިނިކުރާ އާލާތްތަކަށް ހިނގާ ކަރަންޓު އިތުރުވާތީއެވެ. އާއްމު ގޭބިސީތަކުގެ ކަރަންޓް ބިލުގެ 40 އިންސައްތަ ހިއްސާކުރަނީ އެއަރ ކޮންޑިޝަނަރ ފަދަ ތަކެތިން ކަމަށް ދިރާސާތަކުން ދައްކާކަމުގައި ޝަރީފް ވިދާޅުވެފައިވެއެވެ.
ދިރާސާތަކުން ދައްކާގޮތުގައި އެހެންކަމުން އެއާރ ކޮންޑިޝަނާރ 25 ޑިގްރީއަށްވުރެ ދަށް ނުވާނޭހެން ބެހެއްޓުމަށް ޝަރީފް ވަނީ އިލްތިމާސްކުރައްވާފައެވެ. އަދި އެއާރ ކޮންޑިޝަނާރތައް ޤަވާއިދުން ސާރވިސް ކުރުމަށާއި، ލޯގަނޑު ހުންނަ ތަނެއްނަމަ ދޮރުފޮތި ދަމާފައި ބެހެއްޓުމަކީ ވަރަށް މުހިންމު ކަމެއްކަން ޝަރީފު ފާހަގަކުރެއްވިއެވެ.
ޝަރީފު އިތުރަށް ވިދާޅުވީ މިދިޔަ އަހަރާއި އަޅާ ބަލާއިރު މިއަހަރު ޕީކް ބޮޑުތަނުން އިތުރުވެފައިވާކަމަށެއެވެ. އެގޮތުން މި އަހަރުގެ ލޯޑް އެންމެ ބޮޑުވެގެންދިޔަ ސަބަބެއް ކަމަށް ފާހަގަކުރެއްވީ ހުޅުމާލޭގައި ބޮޑު އާބާދީއެއް ދިރިއުޅެން ފެށުމެވެ.
