ބޭންކް އޮފް މޯލްޑިވްސް، ބީއެމްއެލްއިން ވިޔަފާރިތަކަށް ދޫކުރާ ވާރު ކާޑު ދޫކުރުން އަންނަ މަހުގެ 5 ގައި މެދުކަނޑާލާނެކަމަށް ބުނެފިއެވެ.
ބީއެމްއެލްއިން މަޢުލޫމާތުދޭ ގޮތުގައި ވާރު ކާޑުގެ ބަދަލުގައި ދެން ދޫކުރާނީ ބިޒްނަސް ޑެބިޓްކާޑެކެވެ. ވާރު ކާޑު، މާސްޓަރކާޑު ބިޒްނަސް ޑެބިޓްކާޑަށް ބަދަލުކުރަން ނިންމާފައިވަނީ އެ ބޭންކްގެ ސްޓްރެޓެޖީގެ ދަށުން ކަމަށާއި، އަންނަ މަހުގެ 5 ވަނަ ދުވަހުން ފެށިގެން ވާރު ކާޑު ދޫކުރުމާއި، ބަލައިގަތުން ހުއްޓާލާނެކަމަށް ބީއެމްއެލްއިން ބުނެއެވެ.
މިއީ ވިޔަފާރިތަކަށް ވެސް ފަސޭހަވާނެ ކަމެއްކަމަށް ބީއެމްއެލުން ބުނެއެވެ. ސަބަބަކީ ވާރު ކާޑުން ކުރިން ކުރެވެނީ ވިޔަފާރިތަކުން ކުރާ ޓެކުހާގުޅޭ މުއާމަލާތްތައް އެކަނިކަމަށްވާތީއެވެ. ނަމަވެސް މާސްޓަރކާޑު ބިޒްނަސް ޑެބިޓް ކާޑުން ވިޔަފާރީގެ އެހެނިހެން ކަންކަންވެސް ކުރެވޭނެނެއެވެ. އެގޮތުން ޔޫޓިލިޓީ ބިލުތައްވެސް ދެއްކޭނެއެވެ.
ބީއެމްއެލްއިން ބުނާ ގޮތުގައި މި ކާރޑަކީ ދުނިޔޭގެ ކޮންމެ ތަނެއްގައި ހުރެގެންވެސް ފަސޭހަކަމާއެކު ބޭނުންކުރެވޭނެ ކާޑެކެވެ. މި ކާޑު ބޭނުންކޮށްގެން ދުވާލެއްގެ މައްޗަށް އޭޓީއެމްއިން 25،000 ރުފިޔާ ނުވަތަ 1600 ޑޮލަރު ނެގޭނެއެވެ.
