ރާއްޖޭގެ އިގްތިސާދީ ސަރަހައްދުން ބައެއް ގެއްލޭ ގޮތަށް ސަރުކާރުން މޮރިޝަސްއަށް ފޮނުއްވި ސިޓީ ރައްޔިތުންނަށް ހާމަކޮށް ރާއްޖެއިން ބޭރަށް ވިއްްކާލުމަށް ޑީލް ހެދި ކަމަށް ބުނާ މައްސަލަ ތަހުގީގުކޮށް ފިޔަވަޅު އަޅަން ގޮވާލައި ހުށަހެޅި މައްސަލަ ރައްޔިތުންގެ މަޖިލީހުން ބަލައިގެންފިއެވެ.
އެ މައްސަލައަށް މަޖިލީހުގައި ބަހުސްކުރަން ފާސްކުރީ އެކަމަށް ނެގި ވޯޓުގައި ބައިވެރިވެވަޑައިގެންނެވި 42 މެމްބަރުންގެ ތެެރެއިން 23 މެމްބަރަކު ވޯޓު ދެއްވައިގެންނެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް މަޑުއްވަރީ ދާއިރާގެ ޕީއެންސީ މެމްބަރު އާދަމް ޝަރީފު ހުށަހެޅުއްވި މައްސަލާގައި ސަރުކާރަށް ގޮވައިލެއްވީ ޗާގޯސް މައްސަލާގައި ރާއްޖޭގެ ސިޔާސަތު ބަދަލުކުރި ސަބަބު ހާމަކޮށްދިނުމަށެވެ. އެ މައްސަލާގައި ރާއްޖޭގެ ސިޔާސަތު ބަދަލުކޮށް ރައީސް އިބްރާހީމް މުހައްމަދު ސޯލިހު މޮރިޝަސް އަށް ފޮނުއްވި ސިޓީ ހާމަކުރަން ވެސް ކުއްލި މައްސަލާގައި އާދަމް ޝަރީފު ގޮވައިލެއްވިއެވެ.
މޮރިޝަސްއާ އެކު ހަދާފައިވާ ޑީލް ތަހުގީގުކޮށް، އެކަމުގައި ޒިންމާވާ ފަރާތްތަކަށް ފިޔަވަޅު އެޅުމަށް ސަރުކާރަށް ގޮވާލައި، ރައްޔިތުންގެ މަޖިލީހުގެ 170 ވަނަ މާއްދާގައިވާ ގޮތުގެ މަތިން މި ކުއްލި މައްސަލަ ހުށަހަޅަމެވެ. އާދަމް ޝަރީފު ހުށަހެޅުއްވި ކުއްލި މައްސަލާގައި ވިދާޅުވިއެވެ.
އެ މައްސަލަ މަޖިލީހަށް ބަލައިގަނެ، ބަހުސްގެ ފުރަތަމަ ފުރުސަތުގައި އާދަމް ޝަރީފު ވިދާޅުވީ އެ މައްސަލަ މަޖިލީހަށް ބަލައިގަންނަން މިއަދު ފާސްކުރީ އެއީ ރައްޔިތުން އެހާ ސީރިއަސްކޮށް ވިސްނާ ކަމެއް ކަމަށް މެމްބަރުންނަށް ގަބޫލުކުރެއްވިގެން ކަމަށެވެ.
ޗާގޯސް މައްސަލާގައި ރާއްޖޭގެ ސިޔާސަތު ބަދަލުކޮށް މޮރިޝަސް އަށް ތާއީދުކުރަން ނިންމުމުން ސިޔާސީ ބައެއް ފަރާތްތަކާއި ބައެއް އާއްމުން ވެސް އަންނަނީ އެކަމާ ކަންބޮޑުވުން ފާޅުކުރަމުންނެވެ. އެކަމާ ކަންބޮޑުވާ ފަރާތްތަކުން ދެކޭ ގޮތުގައި އެއީ ރާއްޖޭގެ ކަނޑުގެ ސަރަހައްދުން ބައެއް ގެއްލޭނެ ކަމެކެވެ. އެހެން ނަމަވެސް ސަރުކާރުން ބުނަމުން އަންނަނީ އެ ނިންމުމުގެ ސަބަބުން ރާއްޖޭގެ ކަނޑު ސަރަހައްދުން އެއްވެސް ބައެއް ނުގެއްލޭނެ ކަމަށެވެ.
