ސޫދާންގެ އަސްކަރިއްޔާގެ ދެ ޖެނެރަލުންގެ މެދުގައި ހިނގަމުންދާ ހަނގުރާމަ ހުއްޓުމަކަށް ނައިސް ދިގުލައިގެން ދާން ފެށުމާއި ގުޅިގެން އެގައުމުގައި ތިބި ބޭރު ގައުމުތަކުގެ މީހުން ސޫދާނުން ބޭރަށް ގެންދާން ފަށައިފިއެވެ.
ސައުދީ އަރަބިއާގެ ފޮރިން މިނިސްޓްރީން ހާމަ ކޮށްފައިވާ ގޮތުގައި ބޭރުގެ ޑިޕްލޮމޭޓުންވެސް ހިމެނޭ ގޮތުން މި ހަފްތާގެ ހޮނިހިރު ދުވަހާއި ހަމައަށް ސައުދީ އަރަބިއާގެ ޖިއްދާއަށް މިހާރުވަނީ 150 މީހަކު ގެންދެވިފައެވެ.
މިއީ މީގެ ހަފްތާއެއް ކުރިން ސޫދާންގައި ހަނގުރާމަ ފެށުނުފަހުން އެގައުމުން މީހުން ބޭރަށް ގެންދެވުނު ފުރަތަމަ ފަހަރެވެ.
މިމީހުން ސޫދާނުން ބޭރަށް ގެންގޮސްފައި ވަނީ ސައުދީ އަރަބިއާގެ ނޭވަލް ފޯރސްއިން އެގައުމުގެ އަސްކަރިއްޔާގެ އެހީތެރިކާމާއެކުއެވެ. މީގެ ތެރޭގައި ސައުދީގެ 91 ރައްޔިތުންގެ އިތުރުން އިތުރު 12 ގައުމަކަށް ނިސްބަތްވާ 66 މީހުން ހިމެނެއެވެ. އޭގެ ތެރޭގައި ހިމެނެނީ ކުވައިތާއި ޤަތަރާއި ޔޫއޭއީއާއި މިސްރު، ޓިއުނީޝިއާ، އިންޑިއާ، ބަލްގޭރިއާ، ބަންގްލަދޭޝް، ފިލިޕީންސް، ކެނެޑާގެ އިތުރުން ބުރުކިނާ ފާސޯއަށް ނިސްބަތްވާ ރައްޔިތުންނެވެ.
މިމީހުންގެ ތެރޭގައި "ޑިޕްލޮމޭޓުންނާއި އިންޓަރނޭޝަނަލް އޮފިޝަލުން" ހިމެނޭކަމަށްވެސް ސައުދީ އަރަބިއާގެ ފޮރިންގ މިނިސްޓްރީން ހާމަކޮށްފައި ވެއެވެ.
ސޫދާންގައި ހަނގުރާމަ ކުރަމުން ދަނީ، އެގައުމުގެ އަސްކަރިއްޔާގެ އެންމެ އިސް ޖެނެރަލް އަބުދުލް ފައްތާހު އަލް ބުރުހާންއަށް ވަފާތެރި ސިފައިންނާއި، އޭނޭގެ ކުރީގެ ޑެޕިއުޓީ، އަދި އެގައުމުގެ ސަރުކާރުގެ ރެޕިޑް ސަޕޯޓު ފޯރސްގެ އިސް ޖެނެރަލް މުހައްމަދު ހަމްދާން ޑަލްގީއަށް ވަފާތެރި ސިފައިންނާ ދެމެދުއެވެ.
މި ދެ ޖެނެރަލުންނަކީ، ސޫދާންގައި 30 އަހަރުގެ ދިގުވެރިކަމެއް ކުރި އުމަރު އަލް ބަޝީރުގެ ވެރިކަން، 2021 ވަނަ އަަހަރު ބަޢާވާތަކުން ވާއްޓާލުމުގެ އެންމެ އިސް ދެ މޭސްތިރިންނެވެ. އެހެންނަމަވެސް ވެރިކަމުގެ ބާރުތައް ބަހާނެ ގޮތަކާމެދު ދެ ޖެނެރަލުންގެ މެދުގައި އުފެދިފައިވާ ޚިޔާލުތަފާތުވުމުގައި ފެށިގެންދިޔަ ހަނގުރާމާގައި މިހާރުވަނީ ސޫދާންގެ ވެރިރަށް ޚަރުތޫމުގައި 400 އަށްވުރެ ގިނަ މީހުން މަރުވެފައެވެ.
