ހަވާއެރުމުގެ ކުލަގަދަ ހަރަކާތްތަކާއިއެކު ސިފައިންގެ އަހަރީ ދުވަހާއި، އީދު ދުވަސް ފާހަގަ ކުރުން މާލޭގައި ބާއްވައިފިއެވެ.
ސިފައިންގެ އަހަރީ ދުވަހާއި ގުޅުވައިގެން ހަވާ އެރުވުން ފިތުރު އީދު ދުވަހާއި ދިމާވުމުން ހަވާ ބަލަން ނިކުތް މީހުންގެ އަދަދު އިތުރުވިއެވެ. އެމްއެންޑީއެފްއިން ވަނީ ޖުމްހޫރީ މައިދާނުގައި ޢާންމުންނަށް ހުޅުވާލައިގެން އެމްއެންޑީއެފްގެ މިލިޓަރީ ބޭންޑްގެ ހުށަހެޅުމެއް ވެސް ބާއްވާފައެވެ. އެމަންޒަރު ބެލުމަށް ވެސް އެ ސަރަހައްދަށް ގިނަ އަދަދެއްގެ ބަޔަކު ވަނީ އެއްވެފައެވެ.
ރާއްޖޭގައި އެކި މުނާސަބަތުތަކާއި ގުޅިގެން ބާއްވާ ހަވާއެރުވުމަކީ އެކަމަކަށް ގިނަ ބަޔަކު އިންތިޒާރުކުރާ އެންމެންގެ ޝައުގާއިވެސް ގުޅިފައިވާކަމެކެވެ. ކޮންމެ ފަރާތަކުން ކަމުގައިވީނަމަވެސް ހަވާ އެރުވުމުގެ ކަންކަން ކޮށްދެނީ ދިވެހި އަސްކަރިއްޔާއިންނެވެ.
ސިފައިންގެ އަހަރީ ދުވަހާއި ގުޅިގެން ސިފައިންގެ ފަރާތުން ޢާއްމުންނަށް ދޫކޮށްލި އެންމެ އުފާވެރި އެއް ވަގުތުކޮޅަކީ ރޭގަނޑުގެ ވަގުތު ސިފައިންގެ ބޭންޑުގެ ހުށައެޅުންތަކާއެކު ގެނެސްދިން ހަވާއެރުވުމުގެ އުފާވެރި ވަގުތުކޮޅެވެ.
ގިނަ ޢަދަދެއްގެ ކުޑަކުދިންނާއި ޢާއިލާތަކުންވެސް މިވަގުތުކޮޅު ހޭދަކޮށްލުމަށް ވަނީ ޖުމްހޫރީ މައިދާން ސަރަޙައްދަށް ޖަމާވެފައެވެ. މި ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އަނބިކަނބަލުން ފަޒްނާ އަޙްމަދުގެ އިތުރުން ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީ ވަނީ ބައިވެރިވެވަޑައިގަންނަވާފައެވެ.
This evening, President @ibusolih and First Lady Fazna Ahmed observed the Military Band's display and fireworks alongside spectators on the occasion of the 131st anniversary of @MNDF_Official pic.twitter.com/UYNuaim0Sw
— The President's Office (@presidencymv) April 21, 2023
ދިވެހިރާއްޖޭގައި ސިފައިންގެ ޚިދުމަތް ފަށައިފައިވަނީ 1892 އޭޕްރީލް 21 ވަނަ ދުވަހުއެވެ. އަދި ސިފައިންގެ ދުވަހުގެ ގޮތުގައި ފާހަގަކުރަމުން އަންނަނީ ކޮންމެ އަހަރެއްގެވެސް އޭޕްރީލްމަހުގެ 21 ވަނަ ދުވަހެވެ. ޢީދުގެ އުފަލާއެކު ސިފައިންގެ އަހަރީ ދުވަސް އެއްދުވަހަކަށް ވެގެންދިޔުމުން ކުޑަކުދިންނަށް ލިބިގެންދިޔަ އުފާވަނީ ދެގުނަ އިތުރުވެފައެވެ.
