ރެޑްވޭވްގެ ފިހާރަތަކުން ވިޔަފާރި ކުރުމުން ދެމުންދާ ފޮތި ކޮތަޅަށް، އެއްވެސް ފައިސާއެއް ނުނަގާ ގޮތަށް ހަދައިފިއެވެ.
ކޮތަޅުން ފީ ނަގަން ފެށުމުގެ ކުރިން ރެޑްވޭވް ފަދަ ބޮޑެތި ބައެއް ފިހާރަތަކުން ފޮތި ކޮތަޅު ތައާރަފު ކުރިއެވެ. ނަމަވެސް މީގެ ކުރިން ފޮތި ކޮތަޅަށް ރެޑްވޭވުން ދިޔައީ އަގެއް ނަގަމުންނެވެ.
ރެޑްވޭވުން ބުނީ ޕްލާސްޓިކް ކޮތަޅުން ދެ ރުފިޔާ ނަގަން ފެށުމުން ރެޑްވޭވްގެ ފޮތި ކޮތަޅުތަށް ޑިމާންޑް އިތުރުވެފައިވާ ކަމަށެވެ. ކުރިން ފޮތި ކޮތަޅުގެ ހަރަދު ފޫބެއްދުމަށް އެއް ރުފިޔާ ނަގައެވެ. ނަމަވެސް މިއަދުން ފެށިގެން އެ ކުންފުނިން މުދާ އުފުލަން ދޭ ކޮތަޅަށް އެއްވެސް ފައިސާއެއް ނުނަގާނެއެވެ.
ރައްޔިތުން މަޖިލީހުގެ އޭދަފުށީ ދާއިރާގެ މެންބަރު އަދި ރެޑްވޭވްގެ ޗެއަރމަން އަހްމަދު ސަލީމް ވިދާޅުވިގޮތުގައި ޕްލާސްޓިކް ކޮތަޅުން 2 ރުފިޔާ ނަގަން ފެށުމުން، ރެޑްވޭވްގެ ފޮތި ކޮތަޅުތަކަށް އިތުރުވި ޑިމާންޑާއި އެކު އެހަރަދު ފޫބެއްދުމަށް ނަގަން ނިންމާފައިވާ އެއް ރުފިޔާ މިއަދުން ފެށިގެން އެކުންފުނިން ނުނަގާނެއެވެ.
ރެޑްވޭވް އިން ކަސްޓަމަރުންނަށް ދެމުންދާ ފޮތި ކޮތަޅަކީ ދެވަނަ ފަހަރަށް ބޭނުން ކުރެވިގެންދާނެ ފަދަ ވަރުގަދަ ކޮތަޅެއްކަމުގައި އެކުންފުނިން ވަނީ ފާހަގަކޮށްފައެވެ. އަދި މިފަދަ ކޮތަޅު ގެނައުމަކީ ބޮޑު ހަރަދެއް ހިނގާނެ ކަމެއް ކަމުގައިވިޔަސް މިއީ ވަރަށް ގިނަ ކަސްޓަމަރުންގެ ކަންބޮޑުވުން ފާޅުކޮށްފައިވާ ކަމަކަމަށް ވުމާއިއެކު އެކުންފުނިން ނިންމާފައިވަނީ އެކަމަށް ލުޔެއް ދިނުމަށް ކަމަށްވެސް ބުންޏެވެ.
ރެޑްވޭވް އިންވެސް ޕްލާސްޓިކް ކޮތަޅު ބޭނުން ކުރުން މަޖުބޫރުވާ ހާލަތްތަކުގައި، ކަސްޓަމަރުންނަށް ޕްލާސްޓިކް ކޮތަޅު ދޫކުރާއިރު، މީރާގެ ގަވާއިދާއި އެއްގޮތަށް އެކުންފުނިންވެސް ޕްލާސްޓިކް ކޮތަޅުން ދެ ރުފިޔާ ނަގާނެއެވެ.
ރެޑްވޭވް އިން ކަސްޓަމަރުންނަށް ދެމުންދާ ފޮތި ކޮތަޅަކީ އަލުން ބޭނުން ކުރެވޭ ގޮތަށް، ވަރަށް ވަރުގަދައަށް ހަދާފައިވާ ކޮތަޅުތަކެއް ކަމަށް ވެސް ކުންފުނިން ފާހަގަ ކުރެއެވެ.
