މިއަދު ދެކެމުން މިދަނީ މީގެ ކުރިން ދެކެފައި ނުވާފަދަ ހިތްހަމަޖެހޭ ދުވަސްތަކެއް: މާރިޔާ

ގިނަ ގޮންޖެހުންތަކާއެކުވެސް، ތަރައްޤީގެ ދުވެލީގައި، އަސްކަރީ ދާއިރާވެސް ހިމެނިގެން، ދިވެހިރާއްޖެ މިއަދު ދެކެމުން މިދަނީ މީގެ ކުރިން ރާއްޖެ ދެކެފައި ނުވާފަދަ ހިތްހަމަޖެހޭ ދުވަސްތަކެއް ކަމުގައި ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.

ސިފައިންގެ ޚިދުމަތަށް 131 އަހަރު ފުރޭ މިއުފާވެރި ދުވަހުގެ ހެޔޮއެދުމާއި ތަހުނިޔާ، ފޮނުވައި ދެއްވި ޚިތާބުގައި މިނިސްޓަރ މާރިޔާ ވިދާޅުވީ މިހާރު ޢަމަލު ކުރަމުންދާ ޤާނޫނު އަސާސީގެ 243 ވަނަ މާއްދާގައި ބަޔާންކުރާގޮތުން، ސިފައިންގެ ޚިދުމަތުގެ މައިގަނޑު މަޤްޞަދަކީ ދިވެހިރާއްޖޭގެ ޖުމްހޫރިއްޔާއާއި، ދިވެހިރާއްޖޭގެ ސަރަޙައްދާއި، ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދާއި، ރައްޔިތުން ރައްކާތެރިކޮށް ޙިމާޔަތްކުރުން ކަމަށެވެ.

މިނިސްޓަރ ވިދާޅުވީ ޑިމޮކްރަސީގެ މަގަށް ރާއްޖޭގެ ވެރިކަމުގެ ނިޒާމް ބަދަލުކުރިފަހުން، މިހިނގާ ވެރިކަމުގެ ދައުރަކީ ރާއްޖޭގެ ހަމަޖެހުމާއި ސުލްޙަމަސަލަސްކަން އެންމެބޮޑަށް ޤާއިމްވެފައި އޮތް ދައުރު ކަމުގައެވެ. 2008 ވަނަ އަހަރު މަލްޓިޕާޓީ ޑިމޮކްރެޓިކް ނިޒާމެއް ތަޢާރަފްކޮށް، ޑިމޮކްރެސީގެ މަގަށް ދިވެހިރާއްޖޭގެ ވެރިކަމުގެ ނިޒާމް ބަދަލުކުރިފަހުން، ފާއިތުވެދިޔަ 4 އަހަރާ 5 މަހަށްވުރެ، ހަމަޖެހުމާއި ސުލްޙަމަސަލަސްކަން ޤާއިމްވެފައި އޮތް ދުވަސްތަކެއް ދިވެހިން ދެކިފައި ނުވާނެކަމީ ދެބަސް ނުވެވޭނެ ޙަޤީޤަތެއް ނޫންކަމަށް މިނިސްޓަރ ވިދާޅުވިއެވެ.

މި ފާއިތުވެ ދިޔަ ހަތަރު އަހަރުގެ ތެރޭގައި ސަރުކާރުން ޙާޞިލުކުރި އެންމެ ބޮޑު އެއް ކާމިޔާބީއަކީ އަޅުގަނޑުމެން މިދެކޭ ހަމަޖެހުމާއި އަމާންކަން. ގިނަ ގޮންޖެހުންތަކާއެކުވެސް، ތަރައްޤީގެ ދުވެލީގައި، އަސްކަރީ ދާއިރާވެސް ހިމެނިގެން، ދިވެހިރާއްޖެ މިއަދު ދެކެމުން މިދަނީ މީގެ ކުރިން ރާއްޖެ ދެކެފައި ނުވާފަދަ ހިތްހަމަޖެހޭ ދުވަސްތަކެއް.

– މާރިޔާ ވިދާޅުވިއެވެ.

މިނިސްޓަރ ވިދާޅުވީ ސިފައިންގެ ޝަރަފުގެ ހިނގާލުމާއި، އަސްކަރިއްޔާއިން ހިންގާ އެކިއެކި ޕްރޮގްރާމްތައް ރާއްޖޭގެ ކުދި ބޮޑު އެކި ރަށްރަށަށް ފުޅާވެގެން މިއަދު ދާކަމީ ތަފާތުކުރުމެއް ނެތް ސިޔާސަތުގެ ތެރެއިން ގެންނަމުންދާ ބަދަލުތަކެއްކަމަށެވެ. މީގެ އިތުރުން، ސިފައިންގެ އިތުރު މަރުކަޒުތައް ރާއްޖޭގެ އިތުރު ސަރަޙައްދުތަކުގައި ޤާއިމްކުރުމަށްވެސް މަސައްކަތްކުރަމުން ދާކަމަށެވެ.

ކުޑަ ރަށެއް ބޮޑު ރަށެއް ތަފާތުކުރުމެއްނެތި، އެއްވެސް ރައްޔިތަކު ބާކީ ނުކޮށް ތަރައްޤީގެ ކަންކަމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ގެއްގުޅުއްވާ ހަރުދަނާ ސިޔާސަތުގެ ކާމިޔާބީ އާއި ފޮނި މީރުކަން ކުދި ބޮޑު ހުރިހާ ދިވެހި ރައްޔިތުން އެދަނީ ތަޖުރިބާކުރަމުން. އެކަމުގެ އުފާ އިޙުސާސްކުރަމުން.

– މިނިސްޓަރ މާރިޔާ ވިދާޅުވިއެވެ.

މާޒީން ޢިބްރަތް ޙާޞިލްކޮށް، އަދުގެ ޙާލަތު ވަޒަންކުރަމުން، ކުރިމަގަށް ކަންކަން ރޭވުމަށް މަގުދައްކާ ދަންމަރެއްގެ ގޮތުގައި، ކޮންމެ އަހަރަކަށްވެސް ސިފައިންގެ ޝިޢާރެއް ކަނޑައަޅައެވެ. އެގޮތުން، މިއަހަރަށް ކަނޑައަޅާފައި ސިފައިންގެ ޝިޢާރަކީ "ސިފައިންގެ ބަދަހިކަން – ޤައުމުގެ ހަމަޖެހުން". އެވެ. މި ޝިޢާރުން ހަނދާންކޮށްދެނީ ސިފައިންގެ މަސްއޫލިއްޔަތާއި ވާޖިބު އެންމެ ފުރިހަމަގޮތުގައި އަދާކުރެވޭނީ ސިފައިން ބަދަހި ލަޝްކަރެއްގެ ގޮތުގައި އޮވެގެންކަމެވެ.

މިނިސްޓަރ އަސްކަރިއްޔާގެ ޒާތީ ޝަޚުސަށް ކިލަނބުކަމެއް އަޔަނުދީ، ސަފުތަކުގެ ބަދަހިކަން ދަމަހައްޓާ، ކުރިމަތިވެދާނެ ކޮންމެ ޙާލަތަކަށް ތަމްރީނުވެ، ތައްޔާރަށް ތިބި ބަޔަކަށް ދިވެހި ސިފައިންވުމަށް އިލްތިމާސް ކުރައްވާފައެވެ.