އެމްއާރުއެމް އުފެދުނު ފަހުން ފާއިތުވެދިޔަ ކާމިޔާބު އެއް އަހަރު ދުވަހަކީ އެމްއާރުއެމްގެ މެމްބަރުގެ ފަރާތުން ޤައުމަށް އިޚުލާސްތެރި ޚިދުމަތްތަކެއް ލިބިގެންދިޔަ އަހަރެއް ކަމުގައި އެމްއާރުއެމްގެ ރައީސް އަލް އުޘްތާޒު މައުމޫން އަބްދުލް ޤައްޔޫމް ވިދާޅުވެއްޖެއެވެ.
އެމްއާރުއެމްއަށް އެއްހަަރު ފުރުން ފާހަގަކުރުމަށް ބޭއްވި ޖަލްސާގައި، ވާހަކަފުޅު ދައްކަވަމުން ރައީސް މައުމޫން ވިދާޅުވީ ފާއިތުވެދިޔަ އެއް އަހަރު ދުވަހަކީ ހުރިހާ ގޮތަކުންވެސް އެމްއާރުއެމްއަށް ކާމިޔާބު އަހަރެއްކަމަށެވެ. ސަރުކާރުގެ އިސް މަޤާމުތައް ފުރުއްވުމުގައި އެމްއާރުއެމްގެ މެމްބަރުންގެ ފަރާޕްޕުޅުން ޤައުމަށް ލިބިގެންދާ ޚިދުމަތާއި، ކޮށްދެއްވަމުންދާ އިޚުލާސްތެރި ޚިދުމަތަކީ މިއަދު ދިވެހި ރައްޔިތުން ބަލައި ގަންނަ ޚިދުމަތްތަކެއް ކަމުގައި ރައީސް މައުމޫން ވިދާޅުވިއެވެ.
އެމަނިކުފާނު ވިދާޅުވީ ފާއިތުވެދިޔަ އަހަރުގެ ތެރޭގައި ޤައުމީ ކަންކަމުގައާއި، އެކިއެކި މުނާސަބަތުތަކުގައި ބައިވެރިވުމުގެ ފުރުސަތު އެމްއާރުއެމްއަށްލިބި، އެމްއާރުއެމްގެ ފިކުރު ހާމަކޮށް އެމްއާރުއެމްއިން ދެކޭގޮތަށް ހާމަކުރުމުގެ ފުރުސަތު ލިބިގެން ގޮސްފައިވާކަމަށެވެ. އަދި ހަމަ އެހެންމެ ފާއިތުވެދިޔަ އަހަރުގައި އެމްއާރުއެމް އިން ދެކޭ ގޮތަށް ސަރުކާރަށް ހާމަކޮށްދީ، އެމްއާރުއެމްގެ ޚިޔާލާއި މަޝްވަރާ ސަރުކާރުން ބަލައިގަތުމަކީވެސް ލިބިގެންދިޔަ ކާމިޔާބީއެއްކަމަށް ރައީސް މައުމޫން ވިދާޅުވިއެވެ.
އެމަނިކުފާނު ވިދާޅުވީ މިވީ އެއް އަހަރު ދުވަހުގައި މިހާ ކާމިޔާބު ކަމިޔާބު ކަމާއިއެކު ޤައުމަށް ޚިދުމަތް ކުރުމުގެ ފުރުސަތު ލިިބި، އެއް އަޒުމެއްގައި ކުރިއަށް ދެވިފައިވަނީ އާންމު މެމްބަރުންގެ އިޚުލާސްތެރި ޚިދުމަތްތަކުގެ ސަބަބުކަމަށެވެ. މިވީ އެއް އަހަރުގައި ރައްޔިތުންނަށް ކަށަވަރު ވެގެން ގޮސްފައަވަނީ އެމްއާރުއެމްއަކީ އިސްލާމީ އުސޫލުތަކާއި، ޤައުމީ އެއްބައިވަންތަކަމާއި، މިނިވަންކަމާއި، ސިޔާދަތަށް ލޯބިކުރާ، ޕާޓީއެއް ކަމުގައި ރައީސް މައުމޫން ވިދާޅުވިއެވެ.
ރައީސް މައުމޫން ވަނީ އެޕާޓީއަށް އިޚުލާސްތެރިކަމާއިއެކު ޚިދުމަތް ކޮށްދެއްވާ އެންމެހައި މެމްބަރުންނާއި، ޕާޓީގެ އާންމު މެމްބަރުންނަށް ޝުކުރު އަދާކުރައްވާފައެވެ. އަދި ކުރިއަށް އޮތް ތަނުގައިވެސް އެމްއާރުއެމްއިން ޚިދުމަތް ކުރާނީ ޤައުމަށް ތެދުވެރިކަމާއި އިޚުލާސްތެރިކަމާއި އެކުގައިކަމަށް ވިދާޅުވެފައެވެ.
ކޮމެންޓު ފޮނުވާ