މިއަދު މިގެެނެސް ދެނީ ބީޓްރޫޓް ގެ ބަތް ތައްޔާރު ކުރާނެ ގޮތެވެ. ބީޓްރޫޓަކީ އޭގެ ޒާތުގައި ކުލަ ވަރަށް ރީތި ތަރުކާރީގެ ބާވަތެކެވެ. މީއީ ވަރަށް ފައިދާ ހުރި އެއްޗެއްވެސް މެއެވެ.

ބީޓްރޫޓް އަށް ރެޑް ބީޓް، ޓޭބަލް ބީޓް، އަދި ގާޑެން ބީޓް ގެ ނަމުން ވެސް ކިޔައި އުޅެއެވެ. ބީޓްރޫޓުން ލިބޭ ފައިދާ އަށް ބަލާއިރުގައި ފައިބާ އާއި ޕޮޓޭސިއަމް އަދި އަޔަން އަދި ވިޓަމިން ސީ އިން މުއްސަދި މި ތަރުކާރީ އަކީ ނުކައި ދޫކޮށްލެވޭނެ އެއްޗެއްނޫނެވެ.

ބޭނުންވާ ތަކެތި:

1/3 ޖޯޑު ތުނިކޮށް ކޮށާފައި ހުރި ކެރެޓު

1/3 ޖޯޑު ތުނިކޮށް ކޮށާފައި ހުރި ކެބެޖު

1/3 ޖޯޑު ތުނިކޮށް ކޮށާފައިހުރި ކެޕްސިކަމް

¾ ޖޯޑު ތުނިކޮށް ކޮށާފައިހުރި ބީޓްރޫޓް

1 ފިޔާ

¼ ގިތެޔޮ މިރުސް (ނޫނީ ބޭނުން ވަރަކަށް)

1 ޓޮމާޓޯ

2/3 ޖޯޑު ކޮށާފައިހުރި ވަޅޯމަސް

2 ލޮނުމެދު

½ 1 މޭޒުމަތީ ސަމުސާ ތެޔޮ

15 ހިކަނދިފަތް

½ ސައިސަމުސާ ނުމުގުރާ ހުރި އަސޭމިރުސް

½ ސައިސަމުސާ ލޮނު (ނޫނީ ބޭނުން ވަރަކަށް)

1 ކުޑަ ދަޅު ޓޮމާޓޯ ޕޭސްޓް

2 ޖޯޑު ކައްކާފައި ހުރި ބަތް

ތައްޔާރު ކުރާނެ ގޮތް:

ކެރެޓު، ކެބެޖު، ކެޕްސިކަމް، ބީޓްރޫޓް، ފިޔާ، އަދި ގިތެޔޮ މިރުސް ތުނިކޮށް ކޮށާލާށެވެ. ޓޮމާޓޯ ފަޅާލާފައި އޮށްކޮޅު ނެގުމަށްފަހު ގޮޅިކޮށް ކޮށާލާށެވެ. ވަޅޯމަސްވެސް ކުދިކޮށް ކޮށާލާށެވެ. ލޮނުމެދު ކުދިކޮށް ތުނިކޮށް ކޮށާލާށެވެ.

ތެޔޮކޮޅު ތެއްޔަކަށް އަޅާ ހޫނު ކުރުމަށްފަހު އެއަށް ފިޔާ، ހިކަނދިފަތް، ގިތެޔޮ މިރުސް އަދި އަސޭމިރުސް އަޅާފައި ފިޔާކޮޅު މަޑުވެ އެއަށް ރަން މުށި ކުލަ އަރަން ފަށަންދެން ކައްކާށެވެ. ދެން ލޮނުމެދުކޮޅު ތެއްޔަށް އަޅާފައި އެއަށްވެސް ރަންކުލަ އަރަން ފަށަންދެން ކައްކާލާށެވެ. ދެން ވަޅޯމަސް، ކެރެޓު، ކެބެޖު، ބީޓްރޫޓް އަދި ލޮނު ތެއްޔަށް އަޅާ އެއްކޮށްލާފައި ތެލީގެ މަތި ޖަހާށެވެ. ދެން މަޑު ގިނީގައި 5 ވަރަކަށް މިނިޓު ކައްކާލާށެވެ.

ޓޮމާޓޯ ޕޭސްޓް ތެއްޔަށް އަޅާފައި ރަނގަޅަށް އެއްކޮށްލާފައި އަނެއްކާވެސް ތެލީގެ މަތި ޖަހައިގެން މަޑު ގިނީގައި 3 މިނިޓު ކައްކާލާށެވެ. ބަތްކޮޅު ތެއްޔަށް އަޅާ އެއްކޮށްލާފައި އަދި 1 މިނިޓު ކައްކާލާށެވެ. އެ ނިމުނީއެވެ.