ކުރިއަށް އޮތް ރިޔާސީ އިންތިޚާބުގެ ކެމްޕެއިން ސިޔާސީ ޕާޓީތަކުން ފައްޓަންވާނީ އިންތިޚާބުގައި ވާދަކުރާ ކެނޑިޑޭޓުންގެ ނަންތައް އިލެކްޝަންސް ކޮމިޝަނުން އިއުލާން ކުރުމުންކަމަށް ކުރީގެ ބަންޑާރަ ނައިބް ދިޔާނާ ސައީދު ވިދާޅުވެއްޖެއެވެ.
އޭނާ މިހެން ވިދާޅުވީ މޯލްޑިވިއަން ޑިމޮކުރެޓިކް ޕާޓީގެ ރިޔާސީ ކެނޑިޑޭޓް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހަށް ތާއީދު ހޯދުމަށް ރ. ފައިނު ދޮރުން ދޮރަށް މެމްބަރު ހަސަންޓޭ ކުރިއަށް ގެންދިޔަ ހަރަކާތާއި ގުޅިގެން ކުރެއްވި ޓުވީޓުގައެވެ. އިންތިޚާބުގައި އެމްޑީޕީގެ ޓިކެޓްގައި ވާދަކުރައްވާނެ ބޭފުޅަކީ ރައީސް ޞާލިހުކަން އެޕާޓީގެ ޕްރައިމަރީން ވަނީ ކަނޑައަޅާފައެވެ.
ދިޔާނާ ވިދާޅުވީ ރިޔާސީ އިންތިޚާބުގެ ކެމްޕެއިން ކުރުމަށްޓަކައި، ވާދަކުރާ ހުރިހާ ކެނޑިޑޭޓުންނަށް އެއް މުއްދަތެއްގައި އިންސާފުވެރިކަމާއިއެކު ކެމްޕެއިން ކުރުމުގެ ފުރުސަތު ލިބިދޭންޖެހޭކަމަށެވެ. އަދި ކެމްޕެއިން ފައްޓަންވާނީ ރިޔާސީ އިންތިޚާބުގައި ވާދަކުރާ ކެނޑިޑޭޓުންގެ ނަންތައް އިލެކްޝަންސް ކޮމިޝަނުން އިއުލާންކުރުމުންކަމަށް ދިޔާނާ ވިދާޅުވިއެވެ.
ކެމްޕެއިން ކުރުމަށްޓަކައި އެންމެހާ ކެނޑިޑޭޓުންނަށް އެއް މުއްދަތެއް ލިބުމަކީ އިންސާފުވެރި އިންތިޚާބެއްގެ ރުކުނެއް. ކެމްޕެއިން ކުރައްވަން ފައްޓަވަންވަނީ ކުރިމަތިލާ އެންމެހާ ކެނޑިޑޭޓުންގެ ނަންތައް އިލެކްޝަނުން އިއުލާން ކުރެއްވުމުން.
– ދިޔާނާ ވިދާޅުވިއެވެ.
Campaign kurumahtakaa enmehaa candidateunnah eh muddhatheh libumakee insaafuveri inthikhaabegge rukuneh.
Campaign kuravvan fattavanvaanee kurimathilaa enmehaa candidateunge nanthah EC in iulaanukurevvumun. https://t.co/txe2Ci2ZNI
— Dhiyana ?🌹 (@dhiyanasaid) April 16, 2023
ދިޔާނާ މިހެން ވިދާޅުވުމުން، ގިނަ ބަޔަކު ވަނީ އޭނާއަށް ފާޑުވިދާޅުވެ ޓުވިޓާއަށް ރައްދު ދީފައެވެ. އެގޮތުން ކޮންމެ ބޭފުޅަކަށްވެސް އެބޭފުޅަކު ތާއީދުކުރާ މީހަކަށް ކެމްޕެއިން ކުރުމަކީ މައްސަލައެއް ނޫންކަމަށް ބުނެފައެވެ. އަދި ރާއްޖޭގެ ޤާނޫނުގައިވެސް ކެމްޕެއިން ހަރަކާތްތަކީ ވަކި ދުވަސް ވަރެއްގައި އެކަނި ކުރަން އޮންނަ ކަމެއް ނޫންކަމަށް ގިނަ ބަޔަކު ވަނީ ބުނެފައެވެ.
ޤާނޫނުގައި ކެމްޕެއިން ކުރުމުގެ ފުރުސަތު ދިނުމަށް ލާޒިމްކުރާ މުއްދަތެއް އޮތް ނަމަވެސް އޭގެ ކުރިންވެސް ޕާޓީތަކާއި، ކެނޑިޑެޓުން ބޭނުންވާނަމަ އެފުރުސަތު އޮވެއެވެ. ރިޔާސީ އިންތިޚާބު ސެޕްޓެމްބަރު 9ގައި ބޭއްވުމަށްފަހު، ދެވަނަ ބުރެއް ބާއްވަން ޖެހިއްޖެނަމަ ވޯޓުލުން އޮންނާނީ ސެޕްޓެމްބަރު 30ގައެވެ.
ރިޔާސީ އިންތިޚާބުގައި ކެނޑިޑޭޓުންގެ ގޮތުގައި ވާދަކުރުމަށް 23 ޖުލައިން 3 އޯގަސްޓުގެ ނިޔަލަށް ހުޅުވާލުމަށް އިލެކްޝަނުން ވަނީ ނިންމާފައެވެ. އަދި ކެނޑިޑޭޓުންގެ ނަންތައް ތަރުތީބުކޮށް 9 އޯގަސްޓްގައި އިއުލާންކޮށް، ކެންޑިޑޭޓުން ކެމްޕެއިން ކުރުމަށް 10 އޯގަސްޓުން ފެށިގެން 8 ސެޕްޓެމްބަރާއި ހަމައަށް ފުރުޞަތު ހުޅުވާލާނެކަމަށް އިލެކްޝަނުން ވަނީ ބުނެފައެވެ.
