ނިމިދިޔަ ގުރައިދޫ ދާއިރާގެ ބައި އިލެކްޝަންގައި ސަރުކާރު ނުފޫޒާއި، ބާރާއިއެކު ޕީޕީއެމްއަށް އިންތިޚާބު ކާމިޔާބު ނުކުރެވުމުން ހިތްވަރު އެލުވާލުމެއް ނެތްކަމަށާއި، އަމާޒުހުރީ ކުރިއަށް އޮތް ރިޔާސީ އިންތިޚާބު ކާމިޔާބު ކުރުމަށް ކަމަށް އިދިކޮޅު ޕްރޮގްރެސިވް ކޯލިޝަނުން ބުނެފިއެވެ.

ރިޔާސީ އިންތިޚާބަށް 5 މަސް ދުވަހަށް ވެފައި އޮތްވާ ގުރައިދޫ ދާއިރާގެ ބައި އިލެކްޝަން ޕީޕީއެމްއާއި ނާކާމިޔާބު ވުމުން އެޕާޓީގެ ގިނަ އާންމު މެމްބަރުންތަކަށް ވަނީ މާޔޫސްކަން ލިބިފައެވެ. އެންމެ ބޮޑު ސަބަބީ ތާރީހުގައިވެސް އެމްޑީޕީއަށް ކ.އަތޮޅުންވެސް އަދި ގުރައިދޫ ދާއިރާގެ ގޮޑިވެސް ކާމިޔާބު ވެފައި ނުވުމެވެ.

އިންތިޚާބުގެ ނަތީޖާއާއި ގުޅިގެން ޕީޕީއެމްގެ ނައިބް ރައީސް ޣައްސާން ވިދާޅުވީ މިއިންތިޚާބުގެ ނަތީޖާ އައިގޮތުން މާޔޫސްކަމެއް ލިބުނު ކަމުގައި ވީނަމަވެސް، ޕީޕީއެމްގެ މެމްބަރުންގެ އަދި ލީޑަރޝިޕްގެ އަޒުމަކަށް ގުޑުމެއް ނާންނާނެކަމަށެވެ. ޕީޕީއެމް އޮތީ ވަރަށް ސާބިތު ކަމާއިއެކު ރައީސް ޔާމީން މިނިވަންވެ އެމަނިކުފާނާއިއެކު އިންތިޚާބު ކާމިޔާބު ކުރުމަށް ގަދަ އަޒުމުގައިކަމަށް ޣައްސާން ވިދާޅުވިއެވެ.

ރައީސް ޔާމީންގެ މައުސޫމްކަން ސާބިތުވެ މިނިވަންވާނެ. މިއަހަރު ބާއްވާ ރިޔާސީ އިންތިޚާބު ކާމިޔާބު ކުރައްވާނީ އެމަނިކުފާނު. ޕީޕީއެމް އަޒުމެއް ނުގުޑާ. ކެތްތެރިކަމާއިއެކު ސާބިތުވެ، މަސައްކަތުގައި އެބަތިބިން.

– ޣައްސާން ވިދާޅުވިއެވެ.

ޕީޕީއެމްގެ އާންމު މެމްބަރުންނަށް މިދަނޑިވަޅުގައި ހިތްވަރު ދެއްވައި އެޕާޓީގެ ލީޑަރޝިޕްގެ ގިނަ މެމްބަރުން ދަނީ ޓުވީޓް ކުރައްވަމުންވެެ. ފަރެސްމާތޮޑާ ދާއިރާގެ މެމްބަރު ހުސެއިިން މުހައްމަދު ލަތީފް ވިދާޅުވީ ގުރައިދޫ ދާއިރާގެ ނަތީޖާއިން ހިތްވަރަކަށް ބަދަލެއް ނާންނަކަމަށެވެ. މިސަރުކާރު ބަދަލު ކުރުމަށް ކުރަންޖެހޭ މަސައްކަތް ކުރުމަށް ޕީޕީއެމްއޮތީ ތައްޔާރަކަށް އޭނާ ވިދާޅުވިއެވެ.

އިރާދަކުރެއްވިީތީ ހިތްވަރަކަށް ބަދަލެއް ނެތް. މި ސަރުކާރު ބަލިކުރަން، ކުރެވެން ހުރި ހުރިހާ މަސައްކަތެއް ކުރަން މިތިބީ ތައްޔާރަށް.

– ހުސެއިން މުހައްމަދު ލަތީފް ވިދާޅުވިއެވެ.

އިންތިޚާބުގެ ކަންކަން ހިނގައިދިޔަ ގޮތަށް ފާޑުވިދާޅުވެ ޕީއެނސީގެ ނައިބް ރައީސް އާދަމް ޝަރީފް ވިދާޅުވީ، އިންތިހާއަށް މިސަރުކާރުން ނުފޫޒާއި ބާރު ގުރައިދޫ ދާއިރާގެ ރައްޔިތުންގެ މައްޗަށް ފޯރުވިކަމަށެވެ. ފައިސާ ދީގެން ވޯޓު ގަނެ ނުފޫޒު ފޯރުވި ކަމުގައި ވީނަމަވެސް ފައިސާ ދީގެން މުޅި ރާއްޖެ އެމްޑީޕީއަށް ނުގަނެވޭނެކަމަށް އާދަމް ޝަރީފް ވިދާޅުވިއެވެ.

ނަތީޖާ ނެރުނީ ނުފޫޒު ފޯރުވައި، އެތައް މިލިއަނެއް ބަހައިގެން. އެކަމަކު ރައީސް އިބްރާހިމް މުހައްމަދު ޞާލިހާއި، އެމްޑީޕީއަކަށް ރާއްޖޭގެ އެންމެންނަކަށް ނުފޫޒެއް ނުފޯރުވޭނެ. ފައިސާއަކަށް ހުރިހާ ރައްޔިތުން ނުގަނެވޭނެ. ރައީސް ޔާމީން މިނިވަންކޮށް، ޕީޕީއެމްއިން 2023 ކާމިޔާބު ކުރާނެ.

– އާދަމް ޝަރީފް ވިދާޅުވިއެވެ.

ގުރައިދޫ ދާއިރާގެ ބައި-އިލެކްޝަންގެ ވަގުތީ ނަތީޖާ ދައްކާގޮތުން އެމް.ޑީ.ޕީގެ ކެންޑިޑޭޓް އިބްރާހީމް ޝާޒް އިންތިޚާބު ކާމިޔާބުކުރެއްވީ 49 އިންސައްތަ ވޯޓު ހޯއްދަވައިގެންނެވެ. ޝާޒަށް ލިބިވަޑައިގަތީ ޖުމްލަ 1346 ވޯޓެވެ. ދެވަނައަށް އެންމެ ގިނަ ވޯޓު ލިބިވަޑައިގަތީ ޕީޕީއެމްގެ ފަރާތުން ވާދަކުރެއްވި ކެންޑިޑޭޓް ޙުސައިން ރިޟާ އާދަމަށެވެ. ރިޟާއަށް ލިބިވަޑައިގަތީ ޖުމްލަ 1226 ވޯޓެވެ. މި އިންތިޚާބުގައި އެމް.އެން.ޕީގެ ފަރާތުން ވާދަކުރެއްވި ކެންޑިޑޭޓް ޢަލީ ޢާރިފަށް ލިބިވަޑައިގަތީ ޖުމްލަ 122 ވޯޓެވެ.