ރޯދަ މަސް ނިމުމުގެ ކުރިން ބިސް ބޯކިބަލެއްގެ އަޖުމަވެސް ބައްލަވައިލަވަން ވާނެއެވެ. ރޯދަ މަސް ނިމެން ދެތިން ދުވަހަށް ވެފައި ވާއިރުގައި ކޮންމެ ގެއެއްގައިވެސް މިހާތަނަށް އައި އިރުގައި ވަރަށް ތަފާތު ބާވަތްތަށް ތައްޔާރު ކުރާނެ ކަމާއި މެދުގައި ޝައްކެއް ނުކުރަމެވެ.

މީ ވަރަށް ފަސޭހައިން އަދި ވަރަށް އަވަހަށް ފިހެލެވޭ ބޮކިބަލެކެވެ. މި ބޯކިބާ ފިހުމަށް އަވަނެއް ބޭނުން ނުކުރިއަަސް އެންމެ ރަނގަޅުވާނެއެވެ. ތަވައެއްގައި އުދުން މަތިން ވެސް ފިހެލެވޭނެއެވެ.

ބޭނުން ވާނެ ތަކެތި:

1 ކުޑަ ފިޔާ

7 ހިކަނދި ފަތް

½ ގިތެޔޮ މިރުސް

½ ލުނބޯ

1/3 ސައިސަމުސާ ލޮނު

1 މަސް ދަޅު

6 ބިސް

ތައްޔާރު ކުރާނެ ގޮތް:

ފިޔާ، ހިކަނދިފަތް އަދި ގިތެޔޮ މިރުސް ތުނިކޮށް ކޮށާފައި ބޯތަށްޓަކަށް އަޅާށެވެ. އެއަށް ފަހު ބޯތަށީގެ ތެރެއަށް ލުނބޯހުތާއި ލޮނު އަޅާފައި ހުރިހާ އެއްޗެއް ރަނގަޅަށް މޮޑެލާށެވެ. މޮޑޭނީ ފިޔާތައް މަޑުވެ އެއިން ދިޔަ ނިކުންނަ ވަރަށެވެ.

ބޯތަށީގެ ތެރެއަށް ދެން ދަޅު މަސް އަޅާ އަނެއްކާވެސް އެއްކޮށްލާށެވެ. އެއަށްފަހު ދެން ބޯތަށީގެ ތެރެއަށް ބިސްކޮޅު އަޅާ ރަނގަޅަށް އެއްކޮށްލާށެވެ.

7 އިންޗީގެ ތަވައެއް ހޫނު ކުރަން އުދާށެވެ. އޭގެ މަތީގައި ތެޔޮކޮޅެއްވެސް ޓިޝޫކޮޅެއް ބޭނުން ކޮށްގެން އުނގުޅާލާށެވެ. ތަވާ ހޫނު ވުމުން އެއްކުރި ސާމާނު ތަވާ ތެރެއަށް އޮއްސާލާށެވެ. ދެން ގިނި މަޑު ކޮށްލާށެވެ. ތަވާގައި މަތި ޖަހައިގެން ބޯކިބާ ފިހާށެވެ. ފިހާނީ އަޑިއަށް މުށި ކުލަ އަރައި މަތީގެ ތެތްކަން ކެނޑެން ދެނެވެ. މި ކަމަށް ގާތްގަނޑަކަށް ބައި ގަޑިއިރު ނަގާނެއެވެ.

ދެން ބޯކިބާ ފުށުން ޖަހާލާފައި މިހާރު އަޑީގައި އޮތް ފުށަށްވެސް މުށިކުލަ އަރަންދެން ފިހާށެވެ. ކުޑަކޮށް ގިނިގަދަ ކޮށްލިއަސް ރަނގަޅު ވާނެއެވެ. ދެން އަނެއްކާވެސް ފުށުން ޖަހާލާފައި މިނިޓެއް ހާއިރު ފިހެލާށެވެ.