ގުރައިދޫ ދާއިރާގެ ބައި އިލެކްޝަންގެ ވޯޓު ލުވުމުގެ ވަގުތު އިިތުރުކޮށްފައިވަނީ އެއްވެސް މަޝްވަރާއެއް ކުރުމެއްނެތި އެމްޑީޕީން އެކަނި ބޭނުންވެގެންކަމަށް ނައިފަރު ދާއިރާގެ މެމްބަރު ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.
އޭނާ މިހެން ވިދާޅުވީ ގުރައިދޫ ދާއިރާގެ ބައި އިލެކްޝަންގެ ވޯޓުލުމުގެ ވަގުތު، އިލެކްޝަނުން ކުރިން ކަނޑައަޅާފައިވާ ވަގުތު ހަމަވާން ކުޑައިރު ކޮޅަކަށް ވެފައި ވަނިކޮށް، ވޯޓުލާން އޮތް ގަނޑި 5 ޖެހުމާއި ހަމައަށް އިތުރު ކުރުމުންނެވެ. އިލެކްޝަނުން ބުނެފަައިވަނީ މޫސުން ގޯސްވުމުގެ ސަބަބުން ވޯޓު ލުމުގެ ވަގުތު 5 ޖެހުމާއި ހަމައަށް އިތުރު ކޮށްފައިވާކަމަށެވެ.
ޝިޔާމް ވިދާޅުވީ އިލެކްޝަނުން ވަގުތު އިތުރުކުރީ ޕީޕީއެމްއާއި އެއްވެސް މަޝްވަރާއެއް ކުރުމެއްނެތިކަމަށެވެ. ތިން ޕާޓީން ވާދަކުރާ އިންތިޚާބެއްގައި ހަމަ އެކަނި އެމްޑީޕީން ބޭނުންވި ގޮތަށް ވަގުތު އިތުރު ކުރުމަކީ ބަލައި ގަނެވޭނެ ކަމެއް ނޫންކަމަށް އޭނާ ވިދާޅުވިއެވެ. އަދި މިއީ އިލެކްޝަނުން ވަރަށް ޒިންމާދާރުކަން ކުޑަކޮށް ކޮށްފައިވަކަމެއްކަމަށް ޝިޔާމް ވިދާޅުވިއެވެ.
އޭނާ ވިދާޅުވީ ގިނަ ފޮށިތަކުގަިއ ވޯޓުލުން ނިމިފައިވާއިރު، ބަންދުނުކޮށް ގިނަ އިރުކުރަންވީ އެއްވެސް ސަބަބެއް ނުވިސްނޭކަމަށެވެ. އަދި މިއީ ރޯދަމަހަށް ވެފައި ވޯޓު ގުނާ ގަޑި ރޯދަ ވީއްލުމަށްފަހަށް ހެދުމަކީ ރައްޔިތުންނަށް އިތުރު ތަކްލީފެއް ކުރިމަތިވާނެ ކަމެއްކަމަށެވެ. ޝިޔާމް ވިދާޅުވީ މިއިންތިޚާބަށް އެމްޑީޕީން ނުފޫޒު ފޯރުވުމަށް ކުރި ކަންތަކުގެ ވާހަކަ ހުއްޓާނުލައި ދައްކަމުން ދިޔައިރު، އިންތިޚާބުގެ ވޯޓުލުމުގެ ކަންކަންވެސް މިދަނީ ނުފޫޒުން ވަކި ބަޔަކު ބޭނުންވާ ގޮތަށް ކަމަށެވެ.
ބައި-އިލެކްޝަންގައި ޖުމްލަ 6 ވޯޓު ފޮށީ ބަހައްޓާފައިވެއެވެ. އެއީ ގުރައިދޫގައި 2 ފޮށި، މާފުށީގައި 2 ފޮށި، ގުޅީގައި 1 ފޮށި އަދި ގުރައިދޫ ދާއިރާގެ މީހުން ވޯޓުލުމަށް މާލޭ ޢިއްޒުއްދީން ސްކޫލްގައި 1 ފޮށްޓެވެ.
މި އިންތިހާބުގައި ވާދަކުރައްވަނީ ޕީޕީއެމްގެ ކެނޑިޑޭޓް ޙުސައިން ރިޒާއާއި، އެމްޑީޕީގެ ކެނޑިޑޭޓް އިބްރާޙިމް ޝާޒް އަދި މޯލްޑިވްސް ނެޝަނަލް ޕާޓީގެ ކެނޑިޑޭޓް ޢަލީ ޢާރިފެވެ.
