މި ރަމަޞާން މަހު އަތޮޅުތަކުގައި ބޭއްވި އިޙްޔާ ފޯރަމްތަކުގައި ބައިވެރިވި ފަރާތްތަކުގެ މެދުގައި ގުރުއަތުލުން ބާއްވައި، އިނާމުތައް ހަވާލުކޮށްފިއެވެ.
އެހެން އަހަރުތަކާއި ހިލާފަށް އިސްލާމިކް މިނިސްޓްރީއިން ވަނި މިއަހަރު 7 ރަށެއްގައި އިޙްޔާ ފޯރަމް ބާއްވާފައެވެ. އެއީ އައްޑޫ ސިޓީ، ފުވައްމުލައް ސިޓީ، ކުޅުދުއްފުށި ސިޓީ، ހއ.ހޯރަފުށި، ރ.ދުވާފަރު، ޅ.ނައިފަރު، އަދި ގދ. ތިނަދުއެވެ.
އިޙްޔާ ފޯރަމްތައް ކުރިއަށްގެންދަނީ ބައިވެރިންނަށް އަގުހުރި އިނާމުތައް ލިބޭގޮތަށެވެ. މިގޮތުން މިއަހަރު ރަށްރަށުގައި ބޭއްވި އިހްޔާ ފޯރަމްތަކުގެ ގުރުއަތުނެގުން ބާއްވާފައިވަނީ ރޭ ފުވައްމުލައް ސިޓީގައި ބޭއްވި އިޙްޔާ ފޯރަމަށް ފަހުއެވެ. މިއީ މި ރޯދަމަހު މާލެއިން ބޭރުގައި ބާއްވާ ފަހު އިޙްޔާ ފޯރަމްއެވެ.
އިޙްޔާ ފޯރަމްތައް އަގުހުރި އިނާމުތައް ހިމެނޭ ޤުރުއަތުގައި، 1 ވަނަ އިނާމު ލިބިފައިވަނީ ހޯރަފުށީގައި ބޭއްވި އިޙްޔާ ފޯރަމްގެ ބައިވެރިއަކަށެވެ. 2 ވަނަ އަދި 3 ވަނަ އިނާމު ލިބުނީ ފުވައްމުލައް ސީޓީގެ ދެ ބައިވެރިއަކަށެވެ.
އިޙްޔާ ފޯރަމްގެ ގުރުއަތުން ހޮވުނު ފަރާތްތަކަށް ހުށަހެޅިފައިވާ އިނާމްތަކުގެ ތެރޭގައި، އެއްވަަނަ އަށް ހޮވޭ ފަރާތަކަށް މޯލްޑިވްސް ހައްޖު ކޯޕަރޭޝަނުން ދޭ އުމްރާ ދަތުރު ހިމެނެއެވެ. ދެވަނަ އިނާމަކަށް ހުށަހެޅިފައިވަނީ އުރިދޫއިން ސްޕޮންސަރކޮށްފައިވާ އައިފޯން 13 އެވެ. ތިން ވަނަ އަށް ހޮވުން ފަރާތަށް ހުށަހެޅިފައިވާ އިނާމަކީ ރެއިންބޯއިން ސްޕޮންސަރކޮށްފައިވާ ދެ ސޯފާއެވެ.
ގުރުއަތުން ހޮވުނު ފަރާތްތަކުން ނަންބަރުކޮޅުގެ ފޮޓޯ އާއި އައިޑީކާޑުގެ ފޮޓޯ 7910208 ނަންބަރަށް ވައިބަރކުރުމަށް އިސްލާމިކް މިނިސްޓްރީން ވަނީ އެދިފައެވެ.
