ގދ. ފަރެސްމާތޮޑާ އެއަރޕޯޓް ސަރަހައްދުގައި ގެސްޓް ހައުސް ހެދުމަށްޓަކައި އެ ސަރަޙައްދުން 18 ބިމެއް ދޫކުރުމަށް ރީނަޖަނަލް އެއަރޕޯޓްސް ކޮމްޕެނީ ލިމިޓެޑުން ހުޅުވާލައިފިއެވެ.
ރީޖަނަލް އެއާޕޯޓްސްއިން އާންމުކޮށްފައިވާ އިއުލާނެއްގައި ފަރެސްމާތޮޑާގެ އެއަރޕޯޓް ސަރަހައްދުގައި ގެސްޓް ހައުސް ހެދުމަށް ޝައުގުވެރިވާ ފަރާތްތަކުން މި މަހުގެ 26 ވަނަ ދުވަހުގެ މެންދުރު ފަހު 2:00 ޖެހުމުގެ ކުރިން އެ ކުންފުނީގެ ޓެންޑާ މެއިލްއަށް ހުށަހެޅުމަށް ހުޅުވާލާފައެވެ. ޓެންޑާއާ ގުޅޭ ތަފުސީލުތައް ހިމެނޭ ލިޔެކިޔުންތައް، އެ ކަމަށް އެދި ހުށަހަޅާ ފަރާތްތަކާ ހިއްސާކުރާނެ ކަމަށް އިއުލާނުގައިވެއެވެ.
ފަރެސްމާތޮޑާ އެއަރޕޯޓް ހަދާފައިވަނީ އެރަށު ފަޅުން ކުދި ރަށްތަކެއް ހިއްކުމަށްފަހުގައެވެ. އެހެންކަމުން އެއަރޕޯޓް އޮންނަނީ މީހުން އުޅޭ ސަރަޙައްދާ ކޮންމެވެސް ވަރަކަށް ދުރުގައެވެ. އެއަރޕޯޓް ހިމެނޭ ސަރަޙައްދުގައި ގެސްޓްހައުސްތައް އަޅައިިފިނަމަ ރިސޯޓްތަކުން އަންނަ ފަތުރުވެރިން މަޑުކޮށްލުމަށާއި އެހެނިހެން ބޭނުންތަކުގައި އަންނަ މީހުންނަށްވެސް ތިބުމުގެ ފުރުޞަތު ލިބޭނެއެވެ. އަދި މިއާއެކު އެރަށުގެ އިޤްތިޞާދުވެސް ފުޅާވެގެންދާނެއެވެ.
ފަރެސްމާތޮޑާ އެއަރޕޯޓް ހުޅުވައި ރަސްމީކޮށް ދަތުރުތައް ފެށީ މިދިޔަ މަހުއެވެ. މިއީ ހުވަދު އަތޮޅުގައި ތަރައްގީކޮށް ހުޅުވި ހަތަރު ވަނަ އެއަރޕޯޓެވެ.
