ޗެމްޕިއަންސް ލީގުގައި ރޭ ރިއާލް މެޑްރިޑާއި، ޗެލްސީ ބައްދަލު ކުރި މެޗު ރެއަލް މެޑްރިޑުން ކާމިޔާބު ކޮށްފިއެވެ.
ރެއަލް އިން މި މެޗު ކާމިޔާބު ކޮށްފައިވަނީ 2-0 ގެ ނަތީޖާއަކުންނެވެ. ރެއަލް މެޑްރިޑްގެ ދަނޑުގައި ކުޅުނު ކުއާޓާ ފައިނަލް ފުރަތަމަ ލެގުގައި ދެ ޓީމުން ވެސް ގޯލަށް ނުރައްކާތެރި ހަމަލާތަކެއް އަމާޒުކޮށްފައިވާއިރު، ރިއަލްމެޑްރިޑުން ވަނީ ފުރަތަމަ ހާފުގައި ގޯލެއް ކާމިޔާބުކޮށްފައެވެ.
ފުރަތަމަ ހާފުގެ 21 ވަނަ މިނެޓުގައި ރިއަލްއަށް މި ލަނޑު ކާމިޔާބުކޮށްދިނީ ބެންޒެމާއެވެ. ކާވަހާލް ޗެލްސީގެ ޕެނަލްޓީ އޭރިއާގެ ތެރެއަށް ހުރަސްކުރި ބޯޅަ، ވިނިޝިއަސް ގޯލަށް ފޮނުވާލިއެވެ. އެހެން ނަމަވެސް ކީޕަރު ކެޕާގެ އަތުގައި ޖެހިފައި ނުކުތުމުން ބެންޒެމާވަނީ ގޯލަށް ފޮނުވާ ލާފައެވެ.
އަނިޔާގެ ސަބަބުން ދުވަސް ކޮޅަކަށް ކުޅުމާއި ދުރުގައި ހުރި، ޗެލްސީގެ ޑިފެންޑަރު ތިއެގޯ ސިލްވަރ ވަނީ މި މެޗުގެ ފުރަތަމަ 11ގައި ފަށާފައެވެ. ޗެލްސީގެ ފަރާތުންވެސް ރަނގަޅު ކުޅުމެއް ފެނިގެން ދިޔައިރު ފުރަތަމަ ހާފުގައި އުފެއްދުނު އެންމެ ނުރައްކާ ހަމަލާ ފެނިގެން ދިޔައީ ޗެލްސީގެ ސްޓާލިންގެ ފަރާތުންނެވެ. އެހެން ނަމަވެސް ރިއަލްގެ ކީޕަރު ވަރަށް ހުށިޔާރު ކަމާއެކު، މި ހަމަލާ ވަނީ ދިފާއުކޮށްފައެވެ.
ދެވަނަ ހާފު ފަށައިގެން ޗެލްސީއަށް މާ އެދެވޭ ކުޅުމެއް ދެއްކިފައި ނުވާއިރު ރިއަލްއިން ވަނީ ގޯލަށް ނުރައްކާތެރި އިތުރު ހަމަލާ ތަކެއް އަމާޒުކޮށްފައެވެ. އޭގެ ނަތީޖާއެއްގެ ގޮތުން މެޗުގެ 73ވަނަ މިނެޓުގައި ދެވަނަ ގޯލެއް ޖަހާ ލީޑު ފުޅާކުރިއެވެ.މި ލަނޑު ރިއަލްއަށް ކާމިޔާބުކޮށް ދިނީ ބަދަލު ކުޅުންތެރިއެއްގެ ގޮތުގައި މެޗުގެ 69 ވަނަ މިނެޓު ކުޅުމާއި ގުޅުނު މާކޯ އެސެންސިއޯއެވެ.
ދެވަނަ ހާފުގެ ބޮޑުބައި ޗެލްސީއިން ކުޅެން ޖެހުނީ އެއް ކުޅުންތެރިއަކު މަދުކޮށްނެވެ. ރިއަލްގެ ވިނިޝިއަސްއަށް ކުރި ފައުލަކާ ގުޅިގެން މެޗުގެ 59ވަނަ މިނެޓުގައި ޗެލްސީގެ ޗިލްވެލްއަށް ވަނީ ރަތް ކާޑު ދައްކާފައެވެ. މިއާއެކު ޗެލްސީއިން ވަނީ ކުޅުން ވަރަށް ބޮޑަށް އެޓޭކިންއަށް ބަދަލުކޮށް، ގިނަ ބަދަލު ތަކެއްވެސް ގެނެއްސައެވެ. އެގޮތުން ކަންޓޭއާއި ތިއެގޯ ސިލްވާ ބަދަލިކޮށް ކައި ހަވާޓްޒް އާއި މެސޮން މައުންޓްވަނީ ކުޅުމަށް އަރުވާފައެވެ.
ޕްރިމިޔަރ ލީގުގައިވެސް ރަނގަޅު ނަތީޖާތަކެއް ޗެލްސީއަށް ނުނެރެވޭއިރު، އެންމެ ފަހުން އެޓީމުގެ ކޯޗުގެ ބަދަލުގައި ދެވަނަ ފަހަރަށް ވަނީ ލަމްޕާޑްއާއި ޓީމު ހަވާލުކޮށްފައެވެ. ލަމްޕާޑު ހަވާލުވި ފަހުން މީ ޗެލްސީގެ ދެވަނަ މެޗެވެ. ކުއާޓަރ ފައިނަލުގައި މި ދެޓީމުގެ ދެވަނަ ލެގު އޮންނާނީ މި މަހުގެ 19 ވަނަ ދުވަހު ޗެލްސީގެ ދަނޑުގައެވެ.
