ރައްޔިތުންގެ މަޖިލީހުގެ ހުސްވެފައިވާ ގުރައިދޫ ދާއިރާގެ ގޮނޑިއަށް މެމްބަރަކު އިންތިޚާބުކުރަން ބާއްވާ ބައި އިލެކްޝަނުގެ ވޯޓު ކަރުދާސް ޗާޕުކޮށްފިއެވެ.
އިލެކްޝަންސް ކޮމިޝަނުން ހާމަކުރައްވާފައިވާގޮތުގައި ނޮވެލްޓީ ޕްރިންޓާސްއިން ވަނީ މި ބައިއިލެކްޝަނަށް ޖުމްލަ 3423 ވޯޓު ކަރުދާސް ޗާޕުކޮށްފައެވެ. މި އިންތިޚާބު ބާއްވަން ހަމަޖެހިފައިވަނީ އަންނަ ހޮނިހިރު ދުވަހެވެ.
މާލެއަތޮޅު ގުރައިދޫ، މާފުށި، ގުޅި ހިމެނޭ މިދާއިރާގެ ގޮނޑި ހުސްވީ އެދާއިރާގެ މެމްބަރު އިބްރާހިމް ރިޒާ، ނިޔާވުމުންނެވެ. އޭނާ ނިޔާވީ ކެންސަރުބަލީގައެވެ.
މި ބައިއިލެކްޝަނުގައި 3 ބޭފުޅަކު ވާދަކުރައްވައެވެ. އެއީ ވެރިކަންކުރާ މައިޕާޓީ އެމްޑީޕީގެ ޓިކެޓުގައި ވާދަކުރައްވާ އިބްރާހިމް ޝާޒާއި އިދިކޮޅު ޕީޕީއެމްގެ ޓިކެޓުގައި ވާދަކުރައްވާ ހުސެއިން ރިޒާ އާދަމާއި އެމްއެންޕީގެ ޓިކެޓުގައި ވާދަކުރައްވާ އަލީ އަރީފެވެ. ޕީޕީއެމްގެ ޓިކެޓުގައި ވާދަކުރައްވާ ހުސެއިން ރިޒާ އާދަމަކީ ކުރީގެ މެމްބަރު އިބްރާހީމް ރިޒާގެ ކޮށްކޮއެވެ.
ކޮމެންޓު ފޮނުވާ