ތަރުކާރީ އަކީ ގިނަ ފައިދާ ތަކެއް ލިބޭ އެއްޗެކެވެ. ކެއުމުގައި ތަރުކާރީ ހިމެނުނަމަށް ކަމުގެ މާހިރުން އިރުޝާދު ދެނީ ސަބަބެއް ނެތިއެއް ނޫނެވެ. ހަށިގަނޑު ހެދި ބޮޑު ވުމަށާއި ހަށިގަނޑަށް ބޭނުންވާ ކާނާ ތަރުކާރީގެ ބާވަތްތަކުން ލިބެއެވެ.

މިއަދު މި ގެެނެސް ދެނީ ތަރުކާރީގައި މީރު ރިހަ ގަނޑެއް ތައްޔާރު ކޮށްލާނެ ގޮތެވެ. މީ ރޮށި ނުވަތަ ބަތާއި އެކުގައި ވެސް ބޭނުން ކުރެވިދާނެ މީރު ރިހަ ގަނޑެކެވެ. އަޅެ ރޯދަ މަހުގެ ކޮންމެވެސް ދުވަހަކު ތައްޔާރު ކޮށްލަ ބާލާށެވެ.

ބޭނުން ވާނެ ތަކެތި

ކިލޯއެއްގެ  ތަރުކާރީ (އެކިވައްތަރުގެ)

4 މޭޒުމަތީ ސަމުސާ ގިތެޔޮ

1 ބޮޑުފިޔާ

4 ލޮނުމެދު

3 ރޯމިރުސް

2 މޭޒުމަތީ ސަމުސާ ހަވާދު

3 ޖޯޑު ފެން،

3 ބުރި ސުރުވާ އެއްކޮށްފައި ލޮނު

ތައްޔާރު ކުރާނެ ގޮތް

ތަރުކާރީތައް އާދައިގެ ސައިޒަކަށް ކުދިކޮށް ކޮއްޓަވާށެވެ. ފިޔައާއި، ރޯމިރުސް، ކުދިކޮށް ކޮއްޓަވާށެވެ. ލޮނުމެދުކޮޅު ޗިސްކޮށްލައްވާށެވެ. ތެޔޮފޮދު ހޫނުކުރެއްވުމަށްފަހު، ފިޔާ ރަތްކުރައްވާ އޭގެ ތެރެއަށް ލޮނުމެދުކޮޅު އަޅުއްވާށެވެ. ފިޔާކޮޅު ރަތްވުމުން އޭގެ ތެރެއަށް މިރުހާއި، ހަވާދާއި، ސުރުވާފެން އަޅުއްވައިގެން 20 މިނިޓް ވަންދެން ކައްކަވާށެވެ. ބޮކިޖަހާ ކެކެން ފެށުމުން ތަރުކާރީ ތައް އަޅުއްވައިގެން އަދި 10 މިނިޓް ކައްކަވާށެވެ. ދެން ލޮނު ހެޔޮވަރު ކުރައްވާށެވެ.