އެމެރިކާގެ ނިއު ޖާޒީގެ މިސްކިތެއްގައި ޖަމާއަތުގައި ނަމާދު ކުރަމުން ދަނިކޮށް، މިސްކިތުގެ އިމާމަށް ވަޅިން ހަމަލާދިން ތުރުކީ މީހަކު ހައްޔަރު ކޮށްފިއެވެ.
ސީސީޓީވީ ކެމެރާތަކުން މަންޒަރު ރެކޯޑްވެސް ކުރެވިފައިވާ މި ހާދިސާގައި، ޝަރީފް ޒޯބާ ނަމަކަށް ކިޔާ މިމީހާ، މިސްކިތުގެ އިމާމު ސައީދު އަލްނަކިބުއަށް ވަޅިން ހަމަލާ ދީފައިވަނީ، ނިއު ޖާޒީގެ ޕެޓާރސަންގައި ހުންނަ އުމަރު މިސްކިތުގައި މީހުން ޖަމާއަތުގައި ފަތިސް ނަމާދު ކުރަން ތިއްބައެވެ.
ސާވެއިލަންސް ވީޑިއޯއިން ފެންނަ ގޮތުގައި، އުމުރުން 32 އަހަރުގެ މި މީހާ އިމާމާއި ދިމާލަށް ގޮސްފައިވަނީ ތިންވަ ސަފުގެ މެދެއްހާ ހިސާބުގައި ހުރެފައި، ޖަމާއަތުގައި ތިބި މީހުން ސަޖިދައަށް ދާން ފެށިތަނާ ކަހަލަ ގޮތަކަށެވެ.
މިސްކިތުގެ ތަރުޖަމާންއާއި ހަވާލާދީ ސީއެންއެންއިން ރިޕޯޓު ކޮށްފައިވާ ގޮތުގައި މި ހަމަލާއަށްފަހު އިމާމު އަލްނަކިބުގެ ހާލު އަންނަނީ ރަގަޅު ވަމުންނެވެ.
އިމާމަށް މިމީހާ ވަޅިން ހަމަލާ ދިނުމަށްފަހު ފިލަން ދުއްވައިގަތް ނަމަވެސް، ޖަމާއަތުގައި ތިބި މީހުންވަނީ އޭނާ ވަށާލައި ހިފަހައްޓާފައެވެ.
އެމެރިކާގެ ޕެސެއިކް ކައުންޓީ ޕްރޮސެކިއުޓަރގެ އޮފީހުން އާންމުކޮށްފައިވާ ބަޔާނެއްގައި ވާގޮތުން މުވައްސާތަކުން ޒޯބާ ހައްޔަރު ކޮށްފައިވަނީ ތޫނު ހަތިޔާރުން ހަމަލާދީ މީހަކު މަރާލަން އުޅުމުގެ ތުހުމަތާއި (އެއްވަނަ ދަރަޖައިގެ)، ހުއްދަ ނޫން މަގުސަދުގައި ހަތިޔާރު ގެންގުޅުމުގެ ތުހުމަތު (ތިންވަނަ ދަރަޖައިގެ) އަދި އޭގެ އިތުރުން، ހުއްދަ ނޫން ހަތިޔާރު ގެންގުޅުމުގެ ތުހުމަތު (ހަތަރުވަނަ ދަރަޖައިގެ) ގައެވެ.
މީހަކު މަރާލަން އުޅުމުގެ ތުހުމަތަށް ޒޯބާ އިންކާރު ކޮށްފައިވާއިރު އޭނާވަނީ ހުއްދަ ނޫން ހަތިޔާރު ގެންގުޅުމުގެ ތުހުމަތަށްވެސް އިންކާރު ކޮށްފައެވެ. އޭނާ މިހާރު ހުރީ ޝަރީއަތް ފަށަންދެން ބަންދު ކޮށްފައެވެ. އަދި މިހަފްތާގެ ބުރާސްފަތި ދުވަހު އޭނާ ކޯޓަށް ހާޒިރު ކުރާނެއެވެ.
މިމީހާ މިސްކިތުގެ އިމާމަށް ވަޅިން ހަމަލާދިން ސަބަބު އެއްވެސް ފަރާތަކުން އަދި ހާމަކޮށްފައެއް ނުވެއެވެ. ޕްރޮސެކިއުޓަރގެ އޮފީހުން ބުނެފައިވަނީ، މިހާދިސާގެ ތަހުގީގު ކުރިޔަށްދާނީ އޭނާ އިމާމަށް ވަޅިން ހަމަލާދިން ސަބަބާއި ގުޅޭ މައުލޫމާތު އަދި ހާމަކުރެވެން ނެތްކަމުގައެވެ.
ޕެސެއިކް ކައުންޓީ ޕްރޮސެކިއުޓަރގެ އޮފީހުން ނެރެފައިވާ ބަޔާނުގައި ވާގޮތުން، ކުރެވިފައިވާ ތުހުމަތުތައް އޭނާގެ މައްޗަށް ސާބިތު ކުރެވިއްޖެނަމަ 26 އަހަރުގެ ޖަލު ހުކުމެއް އާނާގެ މައްޗަށް އަންނާނެއެވެ.
