ރާއްޖޭގެ މަޝްހޫރު ކޮމޭޑިއަން އެއްގެ ގޮތުގައި ފާހަގަ ކުރެވޭ އަދި މަޖާ މަޖާ ވީޑިއޯތަކުންނާއި އިޝްތިހާރުތަކުން މަޝްހޫރުވި ނަޒީރު ޝިހާމް (ކާއްޓޭ) އަދި ހުސެއިން ސާދު (މަޓޭ) ގެ ފުރަތަމަ ކޮމެޑީ ފީޗާ ފިލްމު، "ވަނާޖްބޭސާ" ގެ ޓިކެޓް ވިއްކަން ފަށައިފި އެވެ.
މި ފިލްމުގެ ޓިކެޓް ވިއްކަނީ ކޮންމެ ދުވަހެއްގެ މެންދުރު ފަހު 2:00 އިން ހަވީރު 5:00 އަށް އަދި ރޭގަނޑު 9:00 އިން 11:00 އަށެވެ. ޓިކެޓްގެ އަގަކީ 100ރ. އެވެ.
ވިޝާލް އާއި ކާއްޓޭގެ ސްކްރީންޕްލޭއަކަށް ހަދާފައިވާ ފިލްމު އޮލިމްޕަހުގައި ޕްރީމިއާކުރަން ތާވަލުކޮށްފައި ވަނީ އެޕްރީލް މަހުގެ 25 ގަ އެވެ. މި ފިލްމު ވާނީ ސިނަމާ އަށް މި އަހަރު އަންނަ ދެވަނަ ދިވެހި ފިލްމަށެވެ.
View this post on Instagram
މި ފިލްމް ގެ ކާސްޓުގައި ފެނިގެން ދާނީ ކޮމީޑިއަން ހުސައިން ސާދު (މަޓޭ) އާއި މުހައްމަދު ސައީދުގެ އިތުރުން އައިޝަތު ރިޝްމާ، އަހުމަދު ޝަކީބު، އައިޝަތު ޝިރާނީ، ޖަލްވާން މުހައްމަދު އަދި ހަދީޖާ އަލީ ހިމެނެ އެވެ.
"ޕާޓިކަލް ސްޓޫޑިއޯ" އާއި "ދަ ސްޓޫޑިއޯ" ގެ އިތުރުން "ވާންޗޯ އެންޓަޓެއިންމެންޓްސް" ގުޅިގެން ތައްޔާރުކުރާ "ވަނާޖްބޭސާ" ޑައިރެކްޓް ކޮށްފައިވަނީވެސް ވިޝާލް ޒަކީއެވެ.
