ބުރާސްފަތި ދުވަހުގެ ނިޔަލަށް ބޭންކް އޮފް މޯލްޑިވްސް (ބީއެމްއެލް)ގެ ކޮމިއުނިޓީ ފަންޑަށް ހުށަހެޅުމުގެ ފުރުޞަތު ހުޅުވާލެވިފައިވާކަމަށް ބޭންކުން ބުނެފިއެވެ.
މިއަންނަ ބުރާސްފަތި ދުވަހުގެ ރޭގަނޑު 11:59 ގެ ފަހުން ކޮމިއުނިޓީ ފަންޑަށް ހުށަޅާ ޕްރޮޕޯސަލް ބަލައެއް ނުގަންނާނެކަމަށާއި، މިފަނޑަށް ހުށަހަޅަން ބޭނުންވާ ފަރާތްތަކަށް ފޯމް ބީއެމްއެމްއެލް ވެބްސައިޓުން ލިބެން ހުންނާނެކަަމަށް ބޭންކުން މަޢުލޫމާތުދެއެވެ. ފޯމް ހުށަހަޅާނީ އީމެއިލް މެދުވެރިކޮށެވެ. މިފަންޑަށް ފޯމް ހުށަހެޅޭނީ ރާއްޖޭގައި ރެޖިސްޓަކޮށްފައިވާ ޖަމީއްޔާތަކަށެވެ.
މިއަހަރު ދެ ފިޔަވައްސަކަށް ބަހާލައިގެން ފަންޑު ހުޅުވާއިރު، ޖުމްލަ 20 މަޝްރޫޢުއަކަށް 50،000ރ. އާއި ހަމައަށް ފަންޑު ކުރާނެއެވެ. މިފަހަރު ހުޅުވާލާފައިވާ ފުރަތަމަ ފިޔަވަހީގައި ޖުމްލަ 10 މަޝްރުޢުއަކަށް އެހީ ވެދޭނެކަމަަށް ބީއެމްއެލްއިން ހާމަކޮށްފައިވެއެވެ.
ކޮމިއުނިޓީ ފަންޑަށް އެދި ހުށަހެޅުމުގެ ފުރުސަތު ލިބިގެން ދަނީ ރަޖިސްޓްރީކޮށްފައިވާ ޖަމިއްޔާތަކަށެވެ. ތިމާވެށްޓާ ގުޅުންހުރި ޕްރޮޖެކްޓް ތަކަށާއި، ތަޢުލީމާއި، ކުޅިވަރު ހަރަކާތްތަކުގެ އިތުރުން މުޖުތަމައުގެ ލާބަޔާއި މަންފާއަށް އަމާޒުކޮށްގެން ހުށަހަޅާ ޕްރޮޖެކްޓް ތަކުގެ ތެރެއިން ހޮވޭ ކޮންމެ ޕްރޮޕޯސަލް އެއްގައި ހިމެނޭ ހަރަކާތަށް ކޮމިއުނިޓީ ފަންޑުން އެހީ ވެދޭނެއެވެ.
