އޮރެންޖަކީ ބާޒާރުން އެންމެ ފަސޭހައިން ލިބޭ އެއް މޭވާ އެވެ. އަދި ގިނަ ފައިދާ ތަކެއްވެސް އެކުލެވިގެންވާ އެއްޗެކެވެ. ވިޓަމިން ސީ އިން މުއްސަދި މި މޭވާ އަކީ ހިތުގެ ބަލިތަކަށް ރަނގަޅު ފަރުވާ އެކެވެ.

މިއަދު މިގެނެސްދެނީ އޮރެންޖް ލެމަނޭޑް ތައްޔާރު ކުރާނެ ގޮތެވެ. މީ އަގު ހެޔޮކޮން އަދި ފަސޭހައިން ތައްޔާރު ކޮށްލެވިދާނެ އަދި ހަށިގަނޑަށް ވެސް ނުހަނު ފައިދާ ހުރި ބުމިކެވެ. މި ރޯދަ މަހު މިފަދަ ބުއިމެއް ތައްޔާރު ކޮށްލުން ކިހިނެއް ވާނތޯއެވެ.؟

ބޭނުން ވާނެ ތަކެތި:

1 1/2 ޖޯޑު އޮރެންޖް ޖޫސް

2 މޭޒުމަތީ ސަމްސާ ލުނބޯ ތޮށި (ގާނާފައި)

2 މޭޒުމަތީ ސަމްސާ އޮރެންޖް ތޮށި (ގާނާފައި)

1 3/4 ޖޯޑު ހަކުރު

2 1/2 ޖޯޑު ފެން

1 1/2 ޖޯޑު ލުނބޯ ހުތް

6 ޖޯޑު އައިސް ފެން

ތައްޔާރު ކުރާނެ ގޮތް:

ފުރަތަމަ ތަވައަކަށް ހަކުރާއި 2 1/2 ޖޯޑު ފެން އަޅައި ކައްކަމުން ހަލަމުން ގެންދާށެވެ. ދެން އޭގެ ތެރެއަށް ލުނބޯ ތޮށި، އޮރެންޖް ތޮށި، ލުނބޯ ހުތް އަދި އޮރެންޖް ޖޫސް އަޅައިލާށެވެ. އަދި މަތި ޖަހާފައި 1 ގަޑިއިރު ވަންދެން އައިސް އަލަމާރި އަށް ލާފައި ބަހައްޓާށެވެ. ދެން ބިއްލޫރި ތަށި ތަކަށް އެއްވަރަކަށް ފެނާއި ފިނިކުރަން ލާފައިވާ މޭވާ ސިރަޕް އަޅާލާށެވެ. އަދި އައިސް އަޅައިގެން ބޯލާށެވެ.