ރަމަޟާން މަހު ފަހު ދިހައެއްގައި މާލޭ ސަރައްހަދުގައި 32 މިސްކިތެއްގައި ދަމު ނަމާދު ކުރުމަށް އިސްލާމިކް މިނިސްޓްރީން ހަމަޖައްސައިފިއެވެ.
ކޮންމެ ރަމަޟާން މަހެއްގައި މާލޭގެ އިތުރަށް ރާއްޖޭގެ އެކި ރަށްރަށުގައި ބޮޑު ޖަމާޢަތް ހަދައިގެން ދަމުނަމާދުކޮށް އުޅެއެވެ. އާންމުގޮތެއްގައި މިސްކިތްތަކުގައި ދަމުނަމާދުކުރަން ފަށަނީ މެންދަމު ދެގަޑި ސުންމިނެޓުން ފެށިގެންނެވެ. ދަމުނަމާދަކީ، އިޝާނަމާދަށްފަހު ކިތަންމެ ކުޑަ ހިނދުކޮޅަކުނަމަވެސް ނިދާލުމަށްފަހު ތެދުވެ، ފަތިސްވަގުތުގެ ކުރިން ދެރަކުޢަތުން، ދެރަކުޢަތުން ސަލާމްދެމުން ކުރާ ނަމާދެކެވެ. މިއީ ގަދަވެގެންވާ ސުންނަތް ނަމާދެކެވެ.
އިސްލާމިކް މިނިސްޓްރީން ބުނީ ދަމުނަމާދު ކުރާނީ މާލޭގެ 18 މިިސްކިތެއްގައާއި ވިލިމާލޭގެ 3 މިސްކިތަކާއި ހުޅުމާލޭގެ 11 މިސްކިތެއްގައެވެ. އިއުތިކާފަށް އިނުން ހަމަޖެހިފައިވަނީ މާލޭގެ 7 މިސްކިތަކާއި ވިލިމާލޭގެ މިސްކިތަކާއި ހުޅުމާލޭގެ 6 މިސްކިތެއްގައެވެ.
1444 ވަނަ އަހަރުގެ ރަމްޟާންމަހުގެ ފަހުދިހައިގައި މާލެ ސިޓީގެ މިސްކިތްތަކުގައި ދަމުނަމާދު ކުރުމާއި ޢިއުތިކާފަށް ތިބުމުގެ އިންތިޒާމް ހަމަޖެހިފައިވާ މިސްކިތްތައް pic.twitter.com/vuUJgkG35X
— Ministry of Islamic Affairs (@MVIaffairs) April 6, 2023
ކޮންމެ އަހަރެއްގެ ރަމަޟާން މަހުގެ ފަހު ދިހައިގެ ރޭތަކުގައި މާލެއާއި އަތޮޅުތެރޭގެ ރަށްރަށުގެ މިސްކިތްތަކުގައި ޖަމާއަތުގައި ދަމުނަމާދު ކުރުން ކުރިއަށް ގެންދެއެވެ. މި ނަމާދުގައި ގިނަބަޔަކު ބައިވެއެވެ.
