ޖުމުހޫރީ ޕާޓީގެ ފަރާތުން ކުރިޔަށް އޮތް ރިޔާސީ އިންތިޚާބުގައި އެޕާޓީގެ ލީޑަރު ގާސިމް އިބުރާހިމް ވާދަ ކުރައްވާގޮތަށް ރަސްމީކޮށް ހަމަޖެހިގެން ދިއުމާއެކު، ޖޭޕީގެ ފަރާތުން ސަރުކާރުގެ އިސް މަގާމްތަކުގައި ތިއްބެވި އެ ޕާޓީގެ ގިނަ މެމްބަރުންވަނީ ރައީސް ސާލިހަށް ތާއީދުކުރާކަން ހާމަކޮށް، ޕާޓީން އިސްތިއުފާ ދެއްވާފައެވެ.
އަދި ޖޭޕީގެ ސްލޮޓްތަކުގައި ސަރުކާރުގެ އިސް މަގާމްތަގުގައި ތިއްބެވި ބައެއް ބޭފުޅުންވަނީ ރައީސް ސާލިހަށް ތާއީދުކުރައްވާކަން ހާމަ ކުރެއްވި ނަމަވެސް ޖޭޕީން ވަކިނުވެ، ސަރުކާރުގެ މަގާމްތަކުގައި ދެމި ތިއްބަވާފައެވެ. އޭގެ ތެރޭގައި ހިމެނެނީ ޖުމުހޫރީ ޕާޓީގެ ސްލޮޓެއްގައި ރައީސް ސާލިހުގެ ސަރުކާރުގެ ކެބިނެޓް ޓުއަރިޒަމް މިނިސްޓަރު ކަމުގެ މަގާމުގައި ހުންނެވި ޑރ. މައުސޫމްއާއި އދގެ ޖެނީވާ އޮފީހަށް ދިވެހިރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ޢާޞިމް އަޙްމަދުއެވެ.
ރައީސް ސާލިހަށް ތާއީދު ކުރެއްވުމަށްފަހު ޕާޓީން މިހާތަނަށް ވަކިވެފައިވާ މެމްބަރުންގެ ތެރޭގައި ހިމެނެނީ ރައީސް އޮފީހުގެ މިނިސްޓަރު އަހުމަދު ސަމީރުއާއި، އިމިގްރޭޝަން ކޮންޓްރޯލަ މުހައްމަދު އަހުމަދު (ހަނަފީ)އާއި، ރައްޔިތުންގެ މަޖިލީހުގެ ކުރީގެ މެންބަރު އިބްރާހިމް ހަސަން (އެވިލާ)އާއި، ހެރިޓޭޖު މިނިސްޓްރީގެ ޑެޕިއުޓީ މިނިސްޓަރު ވަލީދާ ވަލީދުއާއި، އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު އާމިނަތު މުހައްމަދު ސަލީމް (ސޯނީ)އާއި، އެމްޓީސީސީގެ ސީއީއޯ އާދަމް އާޒިމްއާއި، އެމްޑަބްލިޔޫއެސްސީގެ މެނޭޖިން ޑިރެކްޓަރު ހަސަން ޝާހުގެ އިތުރުން ޗައިނާގައި ދިވެހިރާއްޖޭގެ އެމްބަސީގެ ޑެޕިއުޓީ އެމްބެސެޑަރު ސޮބާހު ރަޝީދުއެވެ.
ޖުމުހޫރީ ޕާޓީގެ ފަރާތުން ރިޔާސީ އިންތިޚާބުގައި ވާދަކުރާ ގޮތަށް ނިންމުމާއެކު އިސްވެ ދެންނެވުނު ބޭފުޅުންނަށް ޕާޓީގެ ނިންމުމަށް ތާއީދު ނުކުރެވޭތީ ވަކި ގޮތެއް ނިންމެވި ނަމަވެސް، ޖޭޕީގެ ސްލޮޓުގައި ކެބިނެޓް ވަޒީރުންގެ ގޮތުގައި ތިއްބެވި ދެބޭފުޅުންކަމުގައިވާ، ޖޭޕީގެ ލީޑަރު ގާސިމް އިބުރާހިމްގެ އަނބިކަބަލުން އަދި އެ ޕާޓީގެ ޑެޕިއުޓީ ލީޑަރު، މިސަރުކާރުގެ ޓްރާންސްޕޯޓު މިނިސްޓަރު އައިޝަތު ނަހުލާއާއި ގާސިމްގެ އެޑްވައިޒަރުގެ މަގާމްގައި ހުންނެވި، މިސަރުކާރުގެ ފިޝަރީޒް މިނިސްޓަރު ޑޮކްޓަރު ހުސެއިންއާއި ދެބޭފުޅުން އަދިވެސް ވަކި ބޭފުޅަކަށް ތާއީދު ކުރައްވާކަންވެސް ނުވަތަ ނުކުރައްވާކަންވެސް ހާމަ ކުރައްވާފައެއް ނުވެއެވެ.
ހަމައެއާއެކު މި ދެބޭފުޅުން ރައީސް ސާލިހުގެ ކެބިނެޓުންވެސް އިސްތިއުފާ ނުދެއްވާ، ޖޭޕީގައި ދެބޭފުޅުން އަދާ ކުރައްވަމުން ގެންދަވާ މަގާމުތަކުންވެސް އިސްތިއުފާ ނުދެއްވާ، ހަނު ތިއްބެވުމާއި ގުޅިގެން، ދެބޭފުޅުންނަށްވެސް ގިނަ ބައެއްގެ ފާޑުކިޔުންތައް ދަނީ އަމާޒު ވަމުންނެވެ.
އެއާއެކު ބައެއް ފަރާތްތަކުން މިހާރު އުފައްދަމުންދާ އެއް ސުވާލަކީ، ދެ ކެނޑިޑޭޓަކަށް ތާއީދު ދީގެން، ރައީސް ސާލިހުގެ ކެބިނެޓުގައިވެސް ތިއްބަވައިގެން، ޕާޓީގައިވެސް އަދާކުރަމުންދާ ހުރިހާ މަގާމެއްގައިވެސް ދެމި ތިއްބަވައިގެން، ދެބޭފުޅުންގެ އަމާޒު ހުރީ ކޮން މިސްރާބަކަށް ތޯއެވެ.
ރިޔާސީ އިންތިޚާބުގައި ތާއީދުކުރާ ކެނޑިޑޭޓުން ކަށަވަރުވެ ޔަގީން ވުމާއެކު، ޖޭޕީގެވެސް ގިނަ މެމްބަރުން މިހާރުވަނީ ތިބިގޮތް ސާފުކޮށްދީ، ވަކި އަމާޒަކަށް މިސްރާބު ހިފާފައެވެ. ހަމަ އެއާއެކު ފާހަގަވާން އޮތް ކަމަކީ، ސަރުކާރުގެ ކެބިނެޓްގައި ތިއްބަވައިގެން ރައީސް ސާލިހުގެ ސިޔާސަތުތަކަށް ތާއީދު ކުރަމުން، ފިޝަރީޒް މިނިސްޓަރު ޑރ. ހުސެއިން ރަޝީދު ހަސަންއާއި، ގާސިމް އިބުރާހިމްގެ އަނބިކަބަލުން އައިޝަތު ނަހުލާ ވަނީ، ރިޔާސީ އިންތިޚާބުގައި ގާސިމް އިބުރާހިމް ވާދަ ކުރެއްވުމަށް ތާއީދުކޮށް، ޖޭޕީގެ ކައުންސިލްގައި ވޯޓުވެސް ދެއްވާފައި ކަމެވެ.
އެހެންކަމުން، ސިޔާސީ މަސްރަހުގައި އިސްކޮށް ހަރަކާތްތެރިވަމުންދާ ފަރާތްތަކުގެ ތެރެއިން ދެ ކެނޑިޑޭޓަކަށް ތާއީދު ދީގެން ތިއްބެވި ހަމަކަނި ދެބޭފުޅުންގެ ގޮތުގައި ފެންނާން ތިބީވެސް މި ދެވަޒީރުން ކަމުގައި ދެންނެވިދާނެއެވެ.
ފައިތުވެދި ހަފްތާގައި ރައީސުލްޖުމުހޫރިއްޔާވަނީ ފިކުރެއްގެ ދިރުމަށް ތާއީދުކޮށްގެން ސަރުކާރުގެ އިސް މަގާމްތަކުގައި ތިއްބެވި، އެމްޑީޕީއަށް ނިސްބަތްވާ ބައެއް ފަރާތްތައް މަގާމުތަކުން ދުރުކޮށްފައެވެ. އެހެންނަވެސް ޖޭޕީގެ ސްލޮޓުތަކުގައި، ދެ ކެނޑިޑޭޓަކަށް ތާއީދު ދީގެން ވަޒީރުންގެ ކެބިނެޓްގައި ތިއްބެވި ޑރ. ހުސެއިން ރަޝީދު ހަސަންއައި އައިޝަތު ނަހުލާ ވަޒީރުކަމުން މިހާތަނަށް ވަކިކުރައްވާފައި ނުވަނީ ކޮން ސަބަބަކާ ހެދިކަމެއް އަދި މިހާތަނަށް ސާފުވެފައެއް ނުވެއެވެ.
އެހެންނަމަވެސް، ދެ ކެނޑިޑޭޓަކަށް ތާއިދު ދެއްވައިގެން، މަގާމުން އިސްތިއުފާވެސް ނުދެއްވާ، ދެބޭފުޅުންވެސް ހަނު ތިއްބެވިއެއްކަމަކު، ބައެއް ފަރާތްތަކުން މިހާރު ދަނީ މިއީ އަރަތެއްގެ ގޮތުގައިވެސް ސިފަ ކުރަމުންނެވެ.
