ފަލަސްތީނުގެ ޖެރޫސެލަމްގައި ހުންނަ އަލް އަގްސާ މިސްކިތަށްވަދެ އިސްރާއީލު ސިފައިން ހިންގި ޖަރީމާތަކާއި ގުޅިގެން ޔޫއެން ސެކިއުރިޓީ ކައުންސިލްގެ އެމަޖެންސީ ބައްދަލުވުމެއް ބޭއްވުމަށް ހަމަޖެހިއްޖެއެވެ. މި ބައްދަލުވުން ބޭއްވުމަށް ހަމަޖެހިފައިވަނީ މިއަދުއެވެ.
ޑިޕްލޮމޭޓުންނާއި ހަވާލާދީ ރޮއިޓާސްއިން ރިޕޯޓު ކޮށްފައިވާ ގޮތުގައި މި ބައްދަލުވުން ބޭއްވުމަށް ހަމަޖެހިފައިވަނީ ޔުނައިޓެޑް އަރަބި އެމިރޭޓްސްއާއި ޗައިނާއިން އެދިގެންނެވެ.
ވަފާ ނިއުސް އޭޖެންސީން ރިޕޯޓު ކޮށްފައިވާ ގޮތުގައި އިސްރާއީލު ސިފައިން އަގްސާ މިސްކިތުގައި ނަމާދުކުރަން ތިބި ފަލަސްތީނު މީހުންނަށް ހަމަލާ ދިނުމާއި ގުޅިގެން ފަލަސްތީނުގެ ގިނަ ބަޔަކަށް ވަނީ އަނިޔާ ވެފައެވެ.
އަދި ނާބުލުސްގައި އިސްރާއީލު ސިފައިން ވިހަ ގޭސް އެކުލެވޭ ކެނިސްޓަރސް ބޭނުން ކުރުމުގެ ސަބަބުން ފަލަސްތީނުގެ 12 މީހަކަށް އަނިޔާވެފައިވާކަމަށްވެސް އެ ނޫސް އޭޖެންސީން ރިޕޯޓު ކޮށްފައި ވެއެވެ. އޭގެ އިތުރުން ފަލަސްތީނުގެ ބެއިތު އަންމާރު ޓައުންގައި އަސްލު ވަޒަން ބޭނުން ކުރުމުގެ ސަބަބުންވެސް ބައެއް މީހުންނަށް އަނިޔާ ވެފައި ވެއެވެ. މިއީ ހެބްރޯންގެ އުތުރުގައި އޮންނަ ޓައުނެކެވެ.
ހަމަ އެއާއެކު އިސްރާއީލު ސިފައިންނާއި ފަލަސްތީނު ރައްޔިތުންނާ ދެމެދު، ޖެނީންގައާއި ބެތުލެހެމްގައިވެސް ހަމަޖެހުންތައް ހިގަމުންދާކަމަށް ވަފާ ނޫސް އޭޖެންސީން ރިޕޯޓު ކޮށްފައި ވެއެވެ.
ބަރަކާތްތެރި ރޯދަމަހު މުސްލިމުން ނަމާދު ކުރުމަށް ތިއްބާ އިސްރައީލު ސިފައިން އަލް އަގުސާ މިސްކިތަށް ވަދެ ދިން ހަމަލާތަކާއި ގުޅިގެން އަރަބި ލީގުގެ ކުއްލި ބައްދަލުވުމެއް ބޭއްވުމަށްވެސް ވަނީ ނިންމާފައެވެ.
އިސްރާއީލުގެ ސިފައިންގެ ހަމަލާތަކަށްފަހު އަރަބި ލީގުގެ ޚާއްސަ ބައްދަލުވުމަކަށް ގޮވާލާފައިވަނީ އުރުދުންއާއި، މިސްރު އަދި ފަލަސްތީނުގެ އޮފިޝަލުންނެވެ.
އަރަބި ލީގުންވަނީ މި ހަމަނުޖެހުންތައް ކުށްވެރި ކޮށްފައެވެ. އަރަބި ލީގުގެ ސެކެޓްރީ ޖެނެރަލް ނެރުއްވި ބަޔާނެއްގައި ވިދާޅުވެފައިވަނީ، "އިސްރާއީލުގެ ސަރުކާރުގެ ހައްދުފަހަނަ އަޅާފައިވާ ސިޔާސަތުތަކަށް ނިމުން ނުގެނެސްފިނަމަ ފަލަސްތީނުގެ ރައްޔިތުންނާ އިސްރާއީލާ ދެމެދު ހިގަމުންދާ ހަމަނުޖެހުންތައް ދާނީ ފުޅާވަމުން،" ކަމުގައެވެ.
މި ހަމަނުޖެހުންތަކާއި ގުޅިގެން އިސްރާއީލުގެ ބޮޑުވަޒީރު ނަތަންޔާހޫ ވިދާޅުވެފައިވަނީ މުސްލިމުންގެ މުގައްދަސް މި ބިނާގެ ހައިސިއްޔަތު މިހާރުވެސް އޮތް ގޮތުގައި ބޭއްވުމަށް އޭނާ މަސައްކަތް ކުރައްވަމުން ގެންދަވާ ކަމަށެވެ.
މާތްވެގެންވާ އަލް އަގުސާ މިސްކިތް ހުންނަނީ އިރުމަތީ ޖެރޫސެލަމްގައެވެ. އިރުމަތީ ޖެރޫސެލަމް އިސްރާއީލުން ހިފާފައިވަނީ 1967 ވަނަ އަހަރުއެވެ. އެއަށްފަހު މިއީ އިސްރާއީލުގެ ބައެއްގެ ގޮތުގައި އެގައުމުން ކަނޑައަޅާފައި ވިނަމަވެސް، ބައިނަލް އަގުވާމީ ގޮތުން އިސްރާއީލުގެ މިނިންމުން ބަލައިގެންފައެއް ނުވެއެވެ.
އަލް އަޤްސާ މިސްކިތަކީ އިސްލާމުންގެ ތިންވަނައަށް އެންމެ މުޤައްދަސް ބިނާއެވެ. މި ބިނާގެ މިނިވަންކަން ދެމެހެއްޓުމަށް ވެވިފައިވާ އެއްބަސްވުމުގެ ދަށުން، މިސްކިތުގައި އަޅުކަން ކުރުމުގެ ފުރުސަތު އޮންނަގޮތަށް ހަމަޖެހިފައި އޮންނަނީ މުސްލިމުންނަށް އެކަންޏެވެ. އެހެންނަމަވެސް އިސްރާއީލުގެ ހައްދުފަހަނަ އަޅާފައިވާ ޔަހޫދީން މަސައްކަތް ކުރަމުންދަނީ މި އުސޫލު ބަދަލުކޮށް، މިސްކިތުގައި ޔަހޫދީންނަށްވެސް އަޅުކަން ކުރުމުގެ ފުރުސަތު ހޯދުމަށެވެ.
އެހެންނަމަވެސް އަލްޓްރާ އޯތޮޑޮކްސް ޔަހޫދީންގެ އިސް ރައްބީންވެސް ވަނީ މިސްކިތުގައި ޔަހޫދީން އަޅުކަން ކުރުމާއި ދެކޮޅު ހަދާފައެވެ.
ފަލަސްތީނުން ބުނަމުންދަނީ، މުސްލިން ނޫން މީހުންނަށް މިސްކިތުގައި އަޅުކަން ކުރުމުގެ ފުރުސަތު ދީފިނަމަ، މި މިސްކިތުގެ މިނިވަކަން ދެމެހެއްޓުމަށް ވެފައިވާ އުސޫލުތައް ބަދަލުވެ، އޭގެ ނަތީޖާއެއްގެ ގޮތުން ހައްދު ފަހަނައަޅާއި ކަނާތުފިޔައި ޔަހޫދީން މިސްކިތް ހުރި ތަނުގައި ޔަހޫދީންގެ ޓެމްޕްލްއެއް ބިނާކުރުމަށް ގޮވަމުންދާ ގޮވާލުންތަކަށް ބާރު ލިބިގެން ހިގައިދާނެ ކަމުގައެވެ.
އިސްރާއީލުގެ ކުރީގެ ބޮޑުވަޒީރު އެރިއެލް ޝެރޯން 2000 ވަނައަހަރު މިސްކިތް ހިމެނޭ ސަރަހައްދަށް ވަނުމާއެކު އުފެދުނު ހަމަނުޖެހުންތަކުގައި ފަލަސްތީނުގެ ދެވަނަ އިންތިފާޟާ ފެށިގެން ދިޔައެވެ.
One Response
އދ. އާއި ހުޅަނގުގެ ގައުމުތަކުން ތިބޭނީ ތިޔަފަދަ ބައްދަލުވުންތައް ބާއްވައި ވަގުތު ދަންމަން. މުސްލިމުން ގަތުލުކޮށް މުސްލިމުންގެ ބިންތައްފޭރި ހެދުމަށް މަގުފަހިކޮށްދޭ ޣައްދާރުންގެ ގޮތުގައި. މުސްލިމުން ހޭވެރިވާކަށް ނުވޭތަ؟