ނާސާގެ އެސްޓްރޯނޯޓް ވިކްޓަރ ގްލޯވަރ އަކީ ޖައްވީ ކެޕްސޫލް ޑްރެގަންގައި މިހާރު މަސައްކަތް ކުރަމުންދާ 4 ފަޅުވެރިންގެ ތެރެއިން އެއް އެސްޓްރޮނޯޓެވެ. އަދި އޭނާ ޖައްވައް ކުރި ފުރަތތަމަ ދަތުރުގައި، ޑްރެގަން ކެޕްސޫލްގައި ހުރެގެން ދުނިޔެ ފެންނަން ހުންނަ ގޮތުގެ އާދަޔާ ޚިލާފު ވީޑިއޯއެއް އޭނާގެ ވަނީ ޓުވިޓަރގައި ހިއްސާ ކޮށްފައެވެ.
"ޖައްވުގައި ހުރެގެން ގެނެސްދޭ އަހަރެންގެ ފުރަތަމަ ވީޑިއޯ! އަހަރެން މިހުރީ ޑްރެގަން ކެޕްސޫލްގެ ކުޑަ ދޮރުން ދުނިޔެއަށް ބަލަހައްޓައިގެން،" ގްލޯވަރ އޭނާގެ ޓުވިޓަރގައި ލިޔެފައި ވެއެވެ. "ފެންނަ މަންޒަރުތަކާއި އަދި ކުރެވޭ އިހުސާސްތައް ބަޔާން ކުރަންވެސް ދަތި!"
ގްލޯވަރ އޭނާގެ ޓުވިޓަރ ހޭންޑްލްގައި އާންމު ކޮށްފައިވާ މި ވީޑިއޯއިން ފެންނަނީ، ޑްރެގަން ކެޕްސޫލްގެ ކުޑަ ދޮރެއްގެ ކައިރީގައި ހުރެ، ކުޑަދޮރުން ބޭރަށް ފެންނަން ހުރި މަންޒަރުތަކުގެ ތެރެއަށް ބަލަހައްޓައިގެން އޭނާ ގެއްލިފައި އިންނަ މަންޒަރެވެ. ޑްރެގަން ކެޕްސޫލްގެ ޕައިލެޓެއްގެ ގޮތުގައި، އަދި ދެވަނައަށް އެންމެ އިސް އެސްޓްރޮނޯޓެއްގެ ގޮތުގައި މިވަގުތު ހުރި ގްލޯވަރ ބުނެފައިވާ ގޮތުގައި، ޑެރެގަން ކެޕްސޫލުގައި ހުރެފައި ބޭރަށް ބަލާލުމުން ފެންނަ މަންޒަރަކީ ވަރަށް އާދަޔާޚިލާފު މަންޒަރެއް ކަމަށާއި، އަދި އޭނާ އާންމު ކޮށްފައިވާ ވީޑިއޯއިންވެސް، "އިންސާފުވެރި ކަމާއެކު" މިމަންޒަރުތައް ސިފަކޮށް ނުދޭކަމަށެވެ.
My first video from space! Looking at the Earth through the window of Dragon Resilience. The scale of detail and sensory inputs made this a breathtaking perspective! pic.twitter.com/n7b5x0XLIp
— Victor Glover (@AstroVicGlover) November 24, 2020
ކްރޫ-1 ގެ ގޮތުގައި މިވަގުތު ޖައްވީ އުޅަދުގައި ތިބީ ގްލޯވަރގެ އިތުރުން އެމެރިކާގެ ނާސާގެ އެސްޓްރޮނޯޓް މައިކަލް ހޮޕްކިންސްއާއި، ޝެނޮން ވޯކަރ އާއި އަދި ޖަޕާންގެ އެސްޓްރޮނޯޓް ސޮއިޝީ ނޮގޫޗީއެވެ.
މިއީ، ސްޕޭސް އެކްސްގެ އުޅަދެއްގައި ޖައްވަށް ދަތުރުކުރި ދެވަނަ ފަޅުވެރިންގެ ގުރޫޕެވެ.
މި ހަފްތާގެ ކުރީކޮޅު، ގްލޯވަރ ވަނީ، ކުރިޔަށް ހުރި މަސްތަކުގައި އޭނާގެ މަސައްކަތް ކުރާނެ، ޖައްވީއުޅަދުގައި އޭނާ ދިރިއުޅޭނެ "އާ ގޭގެ" ފޮޓޯއެއްވެސް ޓުވީޓު ކޮށްފައެވެ.
Welcome to my new home! My first few days on @Space_Station were a blur. We hit the ground running with maintenance, science, and spacewalk prep. It’s taking me some time to get my bearings, but I finally had a chance to snap some pictures of my new home for the next 6 months. pic.twitter.com/b4KllmNtXY
— Victor Glover (@AstroVicGlover) November 23, 2020
ޖައްވަށް ދަތުރުކުރި އެންމެ ފުރަތަމަ ކަޅު މީހާގެ ގޮތުގައި އެމެރިކާގެ ގުއޮން ބްލޫފޯޑް 1983 ގައި ޖައްވަން ދަތުރުކުރިފަހުން، އެމެރިކާގެ ކަޅު ނަސްލުގެ އެތައް ބަޔަކު ވަނީ ޖައްވަށް ދަތުރު ކޮށްފައެވެ. އެހެންނަމަވެސް، ގްލޯވަރއަކީ، ފުލް ޓައިމްކޮށް ކްރޫ މެމްބަރެއްގެ ގޮތުގައި ޖައްވީ ސްޓޭޝަނަށް ދަތުރުކުރި އެމެރިކާގެ ކަޅު ނަސްލަށް ނިބަތްވާ ހަމައެކަނި އެސްޓްރޮނޯޓެވެ.
އެމެރިކާގެ ކެނެޑީ ސްޕޭސް ސެންޓަރުން އެންމެފަހުން ޖައްވީ ސްޓޭޝަނަށް ކުރަން ފެށި ދަތުރުތަކަކީ، ނާސާއިން އުއްމީދު ކުރާގޮތުގައި އެތައް އަހަރެއްވަންދެން، ޖައްވީ އުޅަދުގައި އަބަދުވެސް ބޭނުންވާ އަދަދަށް ފަޅުވެރިން ބޭތިއްބުމަށް އެހީތެރި ވެދޭނެ ދަތުރުތަކެކެވެ.
ޑްރެގަންގެ ފަޅުވެރިންނަށް އެންމެފަހުން ޖައްވީ އުޅާދާ ހަމައަށް ދަތުރު ކުރެވިފައިވަނީ މި ނޮވެމްބަރު މަހުގެ 16 ވަނަ ދުވަހުއެވެ.
ކްރޫ-1 ގެ އެސްޓްރޮނޯޓުން ޖައްވީ އުޅަދުގައި ހޭދަ ކުރުމަށް ހަމަޖެހިފައިވަނީ، 6 މަސްދުވަހުގެ މުއްދަތެކެވެ. މި މުއްދަތުގައި އެސްޓްރޮނޯޓުން ޖައްވީ އުޅަދުގައި ސައިންސާ ގުޅޭ އެތަކެއް ތަހުލީލުތަކެއް ކުރާނެއެވެ. އަދި ޖައްވީ އުޅަދަށް ގެންނަން ޖެހޭ ފަހުގެ ބަދަލުތަކާއި އަދި ބޭރުގެ ފަށަލައަށް ގެންނަން ޖެހޭ ބައެއް މަރާމާތުތައް ކުރުމަށްޓަކާ، ޖައްވުގެ ތެރެއަށް ފައިބާ "ސްޕޭސް ވޯކް" ތަކެއް ކުރިޔަށް ގެންދާނެއެވެ.
