އެގްރޯ ނޭޝަނަލް ކޯޕަރޭޝަން (އެގްރޯނެޓް) މެނޭޖިންގ ޑިރެކްޓަރ ހާރޫން ރަޝީދު މަޤާމުން ވަކިކޮށްފިއެވެ.
ރިޔާސީ އިންތިޚާބު ގާތްވަމުންދާއިރު، ސަރުކާރުގެ އެކި މަޤާމުތަކުގަިއ ތިބި ރައީސް ނަޝީދަށް ތާއީދުކުރާ ގިނަ ބޭފުޅުން މިހަފްތާ ތެރޭގައި ދަނީ ވަކި ކުރަމުންނެވެ. އެގްރޭނެޓްގެ އެމްޑީ ހާރޫނަކީ އެމްޑީޕީގެ ރިޔާސީ ޕްރައިމަރީގައި ރައީސް ނަޝީދަށް ތާއީދުކޮށް ކެމްޕެއިންގައިވެސް ބައިވެރިވެ ވަޑައިގެންނެވި ބޭފުޅެކެވެ.
ނިމިގެން ދިޔަ ދެ މަޖްލިސް އިންތިހާބުގައިވެސް ގއ. ވިލިނގިލީ ދާއިރާގެ މެމްބަރުކަމަށް އެމްޑީޕީގެ ފަރާތުން ވާދަކުރެއްވި ހާރޫން, އެގްރޯ ނެޓްގެ އެމްޑީއަކަށް އައްޔަނު ކުރެއްވީ 2020 ވަނަ އަހަރުގެ އޭޕްރީލް މަހުގައެވެ.
މައުލޫމާތު ލިބިފައިވާ ގޮތުގައި ހާރޫން ވަކިކޮށްފައިވަނީ މިއަދުގެ ވަގުތެއްގައެވެ. މަޤާމުން ވަކިކޮށް މިއަދު އޭނާއަށް ސިޓީ ފޮނުވާފައިވާކަށްވެސް މައުލޫމާތު ލިބިފައިވެއެވެ.
ހާރޫން މިއަދު ވަކިކޮށްފައިވާއިރު، އެސްޓީއޯގެ އެމްޑީގެ މަޤާމުގައި ހުންނެވި ރައީސް ނަޝީދަށް ތާއީދު ކުރައްވާ އަމްރުއާއި، ރައީސް އޮފީހުގެ މިނިސްޓަރ މުހައްމަދު ޝީފާޒުވެސް ވަނީ މަޤާމުން ވަކިކޮށްފައެވެ. އެމްޑީޕީގެ ރައީސް ނަޝީދުގެ ފެކްޝަނަށް ނިސްބަތްވާ ބޭފުޅުން މަޤާމުތަކުން ވަކި ކުރަމުންދާއިރު، ޖުމްހޫރީ ޕާޓީގެ ސްލޮޓްތަކުގައި ތިބި ބޭފުޅުންގެ ތެރެއިން ރައީސް ޞާލިހަށް ތާއީދު ނުކުރާ ބޭފުޅުންވެސް މަޤާމުންތަކުން ވަކި ކުރާނެކަމަށް ބެލެވެއެވެ.
One Response
ސަރުކާރު ކަމުނުދާނަމަ، އަމިއްލަ އަށް ވަކިވުން މާރަގަޅު. ޕްރައިމަރީގައި ވަކި ގޮތަކަށް ހުރުން މައްސަލައެއްނޫން. ހޮވުނު މީހަކާ އެކީ ހުރުންވެސް މައްސަލައެއްނޫން. ބަލިވި މީހާ އެކު ހޮވުނު މީހާ އާ ދެކޮޅަށް ހުރުން އެއީ ޑިމޮކްރަސީގައި ކުރާނެ އެންމެ ހުތުރު ޢަމަލު ކަމުގައި، އަންނި ބުނަނީ. ސިޔާސީ މަޤާމުތަކަކީ އެއރަކު ހުންނަ ރައީސަކު ސިޔާސތު ހިންގަން ވައްދާ މުވައްޒަފުން. ސިޔާސަތާ ދެކޮޅި މީހުން ކަން އެނގޭ އިރަށްވެސް ވަކި ކުރަންވާނެ. އެހެންވިއްޔާ މާ ލަސްވެސް ވެއްޖެ ދޯ؟