ރާއްޖޭގެ މަޝްހޫރު މޮޑެލް ކައިޒީންގެ މި އަހަރުގެ އުފަން ދުވަސް ފާހަގަ ކުރަން މިރޭ މާލޭގައި ހަވާ އަރުވާ ގޮތަށް ހަމަޖެހިއްޖެއެވެ.

ކައިގެ އުފަން ދުވަހަކީ މާދަމާއެވެ. އެމްއެންޑީއެފުން ބުނީ، މިރޭ ދަންވަރު 12 ޖަހާއިރު ހަވާ އަރުވާނީ އުސްފަސްގަނޑާ ދިމާލުން ބޭރު ކަނޑުގެ ސަރަހައްދުގައި ކަމަށެވެ. ހަވާ އަރުވާނީ ސިފައިން ބުނިގޮތުގައި ހަ މިނިޓަށެވެ.

ދިވެހިންގެ ބޭނުމަކަށް ނަމަ ހަވާއަރުވައި ދެނީ ކޮންމެ މިނިޓަކަށް 600 ޑޮލަރާއި 1،000 ޑޮލަރާ ދެމެދުގެ އަގުތަކެއްގައެވެ. އާންމުކޮށް ހަވާ އަރުވަން ކޮންމެ މިނިޓަކަށް 800 ޑޮލަރު ހޭދަކުރެއެވެ. އެ ރޭޓުން ބަލައިފި ނަމަ ކައިޒިންގެ އުފަންދުވަސް ފާހަގަކުރުމަށް ބާއްވާ ހަވާ އެރުވުމަށް 75،000ރ. ހަރަދު ވެއެވެ.

ގިނަ ބައެއްގެ މެދުގައި މަގްބޫލް އަދި ދިވެހިންގެ ތެރެއިން އިންސްޓަގްރާމްގައި އެންމެ ގިނަ އެއް ފްލޯވަރުން ތިބި ކައި، މިދިޔަ ދެ އަހަރު ވެސް އުފަން ދުވަސް ފާހަގަ ކުރީ ރާއްޖެ އިން ބޭރުގައެވެ. އެކަމަކު، ކައިޒީންގެ އުފަން ދުވަހާ ބައްދަލު ކުރާ އިރު، މިވަގުތު އޭނާ ހުރީ ރާއްޖޭގައި ކަން އެނގިފައިވެއެވެ. ކައިގެ އުފަން ދުވަސް މިދިޔަ އަހަރު ފާހަގަ ކުރީ އިންޑިއާގެ ތާޖް މަހަލްގައެވެ.

އެ އުފަން ދުވަހުގައި ކައިގެ ކޭކް ހުރީ ކަޅު ކުލައިގައި ހަ ލޭޔަރުގައެވެ. އެ ކޭކް ތައްޔާރުކޮށްފައި ހުރީ ވީހާވެސް ތާޖް މަހަލްއާ ގުޅޭ ކަހަލަ ގޮތަކަށެވެ. ކައި ވަނި 2021 ވަނަ އަހަރު އޭނާގެ އުފަން ދުވަސް ދުބާއީގައި ކުލަގަދަކޮށް ފާހަގަކޮށްފައެވެ. އެ އަހަރު އޭނާގެ އުފަން ދުވަސް ފާހަގަކުރީ ދުބާއީގެ ބްރިޖް ޚަލީފާގައެވެ. އެ ފަހަރު ވެސް ކައި ވަނީ ބޮޑު ކޭކެއް ފަޅާފައެވެ. އަދި އެ ދުވަހު އޭނާ ހުރީ ހާއްސަ އަރަބި ސްޓައިލެއްގެ ހެދުމެއްގައެވެ.