ވ. އާރަށް ކުއްޔަށް ދޫކުރުމުގައި ހިޔާނާތް ހިންގި ކަމަށް ބުނާ މައްސަލާގައި، ކުރީގެ ރައީސް ޔާމީން 3،413،230 ޑޮލަރު (53 މިލިއަން ރުފިޔާ) ދައްކަން ކްރިމިނަލް ކޯޓުން ކުރި އަމުރަކީ މައުޟޫއީ މައްސަލައިގެ ހުކުމަށް ފަހުން އޭގައި ހިމެނޭ މުދަލާއި ފައިސާ ނަގަން އަމުރެއް ނެރުމުގައި ގާނޫނީ ހުރަހެއް ނެތްކަމަށް ދައުލަތުން ބުނެފިއެވެ.
ރައީސް ޔާމީންގެ މައްޗަށް ސާބިތުވި ރިޝްވަތާއި މަނީ ލޯންޑަރިންގެ ދައުވާގައި ހިމެނޭ 3،413،230 ޑޮލަރު ނުވަތަ 53 މިލިއަން ރުފިޔާ ހަ މަސް ދުވަހުގެ ތެރޭގައި ދައުލަތަށް ކްރިމިނަލް ކޯޓުން އަމުރުކުރީ މިދިޔަ ފެބްރުއަރީ މަހުއެވެ.
ކްރިމިނަލް ކޯޓުގެ އަމުރު އިސްތިއުނާފު ކުރަން ޔާމީންގެ ފަރާތްޕުޅުން ހައި ކޯޓަށް ހުށަހަޅުއްވާފައިވާ މައްސަލައިގެ ފުރަތަމަ އަޑުއެހުން އޮތީ މިއަދުއެވެ. ހައި ކޯޓުގައި އޮތް އަޑުއެހުމުގައި ޔާމީނުގެ ވަކީލު ވިދާޅުވީ އާރަށު މައްސަލައިގެ ހުކުމުގައި ދައުލަތަށް އެއްވެސް ފައިސާއެއް ނަގަން އަމުރުކޮށްފައިނުވާ ކަމަށެވެ. މައްސަލަ ނިމުނުފަހުން އެ ގަޒިއްޔާގެ ދަށުން އަމުރެއް ނެރުން ގާނޫނުތަކާއި އިޖުރާއަތްތަކާ ހިލާފު ކަމަށް ވިދާޅުވިއެވެ.
ދައުލަތަށް މުދަލާ ފައިސާ ނަގާނަމަ ކުށް ސާބިތުވުމުން ކުރާ ހުކުމްގައި އެކަން ހިމެނުމަށް ޔާމީންގެ ވަކީލު އެދިވަޑައިގެންނެވިއެވެ. ޔާމީންގެ ވަކީލު ޝިޔާޒު ވިދާޅުވީ ޖިނާއީ ކުށެއް ސާބިތުވެފައިވާ ހާލުގައި ދައުލަތަށް މުދަލާއި ފައިސާއެއް ނަގާނަމަ އެ ކަމެއް ހިމަނަން ޖެހޭނީ މައްސަލައިގެ ހުކުމުގައި ކަމަށެވެ.
ޖިނާއީ އިޖުރާއަތުގެ ގާނޫނާ ހަވާލާދީ، ޝިޔާޒު ފާހަގަ ކުރެއްވީ އެ ގާނޫނުގައި ހުކުމުގައި ފާހަގަކުރަން ޖެހޭ ކަންކަން ބަޔާންކުރާ މާއްދާގައި މުދަލާއި ފައިސާއެއް ދައުލަތަށް ނަގާނަމަ އެ ކަމެއް ހިމަނަން ބަޔާން ކޮށްފައި އޮތުމުން އެނގެނީ ވެސް އެއީ ހުކުމް ކުރާ އިރު އޮންނަން ވާނެ އަމުރެއް ކަން ކަމަށެވެ.
މި ކަމަށް ރައްދު ދެއްވަމުން ދައުލަތުގެ ވަކީލު މަރިޔަމް ޝަހުމާ ވިދާޅުވީ މައުޟޫއީ މައްސަލައިގެ ހުކުމަށް ފަހުން އޭގައި ހިމެނޭ މުދަލާއި ފައިސާ ނަގަން އަމުރެއް ނެރުމުގައި ގާނޫނީ ހުރަހެއް ނެތް ކަމަށެވެ. އަދި މީގެ ސަބަބުން މައުޟޫއީ މައްސަލައިގެ ހުކުމަށް އެއްވެސް އަސަރެއް ވެސް ނުކުރާނެ ކަމަށް ވިދާޅުވިއެވެ.
ދައުލަތުން ދެއްކި ވާހަކަތަކަށް ރައްދުގައި ޔާމީންގެ ވަކީލުން ފާހަގަކުރަން ބޭނުންވާ ކަންކަމުގައި ވާހަކަ ދެއްކުމަށާއި، ފަނޑިޔާރުންގެ ސުވާލެއް އޮތް ނަމަ އެ ފުރުސަތު ދިނުމަށް މާދަމާ އަޑުއެހުމެއް ބާއްވަން މަސައްކަތް ކުރާނެ ކަމަށް މައްސަލަ ބަލާ ބެންޗުން ބުންޏެވެ.
އިސްލާމިކް ބޭންކަށް ޖަމާކުރި 1،295،000 ޑޮލަރާއެކު ހަމަ އެ ބޭންކުގައި ހުޅުވާފައިވާ އިންވެސްޓްމެންޓް އެކައުންޓަކަށް އިތުރު ފައިސާއާއި އެކު ޖުމުލަ 3،413،230 ޑޮލަރު 36 މަސް ދުވަހުގެ މުއްދަތަކަށް އިންވެސްޓްކޮށްފައިވާ ކަމަށްވެސް ދައުލަތުން ވަނީ ބުނެފައެވެ. މަނީ ލޯންޑަރިން އާއި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން ދައުލަތުން އެދުނީ ރައީސް ޔާމީން ލޯންޑާ ކުރި އެއް މިލިއަން ޑޮލަރާއި އެ ފައިސާއާއި އެއްކޮށްފައިވާ 2،413،230 ޑޮލަރު ހޯދައިދިނުމަށެވެ.
