ސިޔާސީ ވަޒީފާއެއް އަދާކުރާ ފަރާތަކުން އެމީހަކަށް ވަޒީފާ ދިން މީހެއްގެ ސިޔާސަތުތައް ކަމު ނުދާނަމަ އެންމެ ރަނގަޅު ގޮތަކީ އެމީހަކު އެމަޤާމަކުން އިސްތިއުފާ ދިނުން ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ޝައިޚު ޒައިދު މިހެން ވިދާޅުވީ ކުރީގެ ރައީސް މުހައްމަދު ނަޝީދުގެ "ފިކުރެއްގެ ދިރުން" އާ އެކު ހުންނެވި، އެސްޓީއޯގެ މެނޭޖިން ޑިރެކްޓަރު ހުސައިން އަމްރު އެ ކުންފުނިން އިއްޔެ ވަކިކުރުމާ ގުޅިގެން އެކި ފަރާތްތަކުން ދައްކަވަމުން ވާހަތަކާއި ގުޅިގެން ކުރެއްވި ޓުވީޓެއްގައެވެ.
އަމްރު ވަނީ ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް ޖުމްހޫރީ ޕާޓީ އާއި ނަޝީދުގެ ފެކްޝަނުން ގުޅިގެން މެނިފެސްޓޯ އެކުލަވައިލުމުގެ ފުރަތަމަ މަޝްވަރާ ބައްދަލުވުމުގައި ވެސް މިދިޔަ ހަފުތާގައި ބައިވެރިވެވަޑައިގެންފަ އެވެ. އަދި އިވޭ އަޑުތަކަށް ބަލާއިރު، ނަޝީދު ބޭނުންފުޅު ވަނީ ޖުމްހޫރީ ޕާޓީ/ނަޝީދުގެ ފިކުރުގެ ރަނިންމޭޓަކަށް އަމްރު ހަމަޖައްސާށެވެ.
ޝައިޚު ޒައިދު ވިދާޅުވީ ސިޔާސީ ކޮންމެ ވަޒީފާއަކީވެސް ވަގުތީ ކަމެއްކަމަށެވެ. ސިޔާސީ ވަޒީފާއަކަށް މީހަކު އަންނަނީ އެމީހަކަށް ވަޒީފާދޭ މީހެއްގެ ސިޔާސަތު ބަލައިގެން ކަމަށާއި، އެސިޔާސަތު ކަމު ނުދާނަމަ އެންމެ ރަނގަޅު ގޮތަކީ އެމީގަކު ކުރަން ބޭނުންވާ ކަމެއް ކުރުމަށް މަޤާމުން އިސްތިއުފާ ދިނުންކަމަށް ޒައިދު ވިދާޅުވިއެވެ.
ވަޒީފާއިން މީހަކު ވަކި ކުރުމަކީ އުފާކުރާ ކަމެއް ނޫން. ނަމަވެސް ކޮމަންސެންސް ހުރި ކޮންމެ ބޭފުޅަކަށްވެސް އެނގިލައްވާނެ ވަޒީފާ ދިން ފަރާތުގެ ސިޔާސަތުތައް ކަމުނުގޮސްގެން އެފަރާތާ ދެކޮޅަށް އިހުތިޖާޖްކުރާނަމަ ރީތިގޮތަކީ އިސްތިއުފާދީފައި ކުރާކަމެއްކުރުން. ސިޔާސީވަޒީފާއަކީ ވަގުތީކަމެއް!
– ޒައިދު ވިދާޅުވިއެވެ.
މިދިޔަ ޖެނުއަރީ މަހު ބޭއްވި އެމްޑީޕީގެ ރިޔާސީ ޕްރައިމަރީގެ ކެމްޕެއިންގައި ވެސް އަމްރު ހުންނެވީ ނަޝީދާއެކުއެވެ. އެ ކެމްޕެއިންގައި އަމްރު ފާޅުގައި ނުކުންނެވުމުން އޭރު ވެސް އޭނާ އެސްޓީއޯ އިން ވަކިކުރުމަށް ރައީސް އިބްރާހިމް މުހައްމަދު ސޯލިހަށް އެމްޑީޕީގެ އެތެރެއިން އެކި ފެންވަރުގެ މީހުން ފިއްތުންތައް ކުރިމަތިކުރިއެވެ.
އެސްޓީއޯގެ ސީއީއޯ އަދި އެމްޑީގެ މަގާމުން އަމްރު ވަކިކުރުމާ ގުޅިގެން ވަގުތީ ގޮތުން އެ ކުންފުނި ހިންގުން ހަވާލު ކޮށްފައި ވަނީ ޗީފް ފައިނޭންޝަލް އޮފިސަރު (ސީއެފްއޯ) މުހައްމަދު ނިޒާމްއާއެވެ.
