މަޝްހޫރު މޮޑެލް ފާތިމަތު ޒަޔާން އިބްރާހިމް (ކައިޒީން) އޭނާގެ ބައްޕަ އާއި ދެކޮޅަށް ސިވިލް ކޯޓުގައި ދައުވާ ކުރާ މައްސަލައިގައި އިތުރު ކޯޓު އަމުރެއް ނެރެދިނުމަށް އެދުނު ނަމަވެސް އެފަދަ އަމުރެއް ދެން ނެރެދެވެން ނެތް ކަމަށް ސިވިލް ކޯޓުން ނިންމުމުން ބައްޕަ ގޮވައިގެން ހައިކޯޓަށް ހިގައްޖެއެވެ.

ކައިޒީން ދައުވާކުރީ އޭނާ 3.6 މިލިއަން ރުފިޔާ ދީގެން ބައްޕަ ލައްވައި ބޯޓެއް ގަތުމުން އެ ބޯޓު އޭނާގެ ރުހުން ނެތި ބައްޕަގެ ނަމަށް ރަޖިސްޓްރީކުރި ކަމަށް ބުނެ އެވެ. ކައިޒީން ދައުވާކުރީ އެ ބޯޓު އޭނާގެ ނަމަށް ބަދަލު ކުރުމަށެވެ.

ކައިޒީންގެ ފަރާތުން އެންމެ ފަހުން ކޯޓުގައި އެދުނީ ބޯޓު ގަންނަން ފައިސާ ދިނީ ކައިޒީން ކަމަށް ކަނޑައަޅައި ބޯޓުގެ މިލްކުވެރިޔަކީ ވެސް އޭނާ ކަމަށް ކަނޑައަޅައި ވަގުތީ އަމުރެއް ނެރެދިނުމަށެވެ. އަދި މިހާރުން މިހާރަށް އެބޯޓުގެ މިލްކުވެރިކަން ކައިޒީންގެ ބައްޕަގެ ނަމުން ކައިޒީންގެ ނަމަށް ބަދަލު ކުރުމަށް ޓްރާންސްޕޯޓް މިނިސްޓްރީގެ މައްޗަށް އަމުރު ކޮށްދިނުމަށާއި ބޯޓުގައި ހުރި ހުރިހާ ތަކެއްޗަކާއިއެކު ބޯޓު ތިން ދުވަހުގެ ތެރޭގައި ކައިޒީން އާއި ހަވާލު ކުރުމަށް އަމުރު ކޮށްދިނުމަށް ވެސް ވަގުތީ އަމުރުގައި އެދުނެވެ.

ސިވިލް ކޯޓުން އެ އަމުރު ނުދިނީ އެ އަމުރުގައި އެދިފައިވާ ކަންކަމަކީ މައްސަލައިގެ މައުލޫއާ ގުޅުން ހުރި ކަންކަމަށްވެފައި، މައްސަލަ ނިންމާއިރު އެ ކަންކަމަށް ރިއާޔަތް ކުރާނެތީއެވެ. ސިވިލް ކޯޓުން ކައިޒީން އެދުނު އަމުރު ނުދިނުމުން ކައިޒީންވަނީ އެ މައްސަލަ ހައިކޯޓުގައި މިއަދު އިސްތިއުނާފު ކޮށްފައެވެ.

ކައިޒީީން އެދިގެން މިދިޔަ ޑިސެމްބަރ މަހު ސިވިލް ކޯޓުން ނެރުނު އަމުރެއްގައި ވަނީ ބޯޓު ގަތުމަށް ފައިސާ ދިނީ ކައިޒީން ކަން ސާބިތުކުރަން ހެކިތަކެއް ހުށަހަޅާފައިވާ ކަމަށެވެ. ބޯޓު ގަތުމަށް ފައިސާ ދިނީ ކައިޒީން ކަމާއި މެދު އޭނާގެ ބައްޕަ އިންކާރު ކޮށްފައި ނުވާ ކަމަށް ވެސް އެ އަމުރުގައި ބުނެފައި ވެއެވެ.

އެހެންކަމުން މައްސަލާގައި ކައިޒީނަށް ހިމާޔަތް ލިބެންޖެހޭ ހައްގެއް އެބައޮތް ކަމަށާއި އަދި އެ މައްސަލަ ނިމުމުގެ ކުރިން ބޯޓުގެ މިލްކުވެރިކަން އެހެން ފަރާތަކަށް ބަދަލުވެއްޖެ ނަމަ ކައިޒީނަށް އިއާދަ ނުކުރެވޭނެ ގެއްލުންތަކެއް ލިބިދާނެ ކަމަށް އެ ނިންމުމުގައިވެއެވެ.