އެމްއެންޕީގެ ރިޔާސީ ކެންޑިޑޭޓަށް އެޕާޓީގެ ޓިކެޓް ހަވާލުކުރާ ޖަލްސާ މޭމަހުގެ 5 ވަނަ ދުވަހު ބޭއްވުމަށް ނިންމައިފިއެވެ.
މޯލްޑިވްސް ނޭޝަނަލް ޕާޓީ، އެމްއެންޕީގެ ރިޔާސީ ޕްރައިމަރީއަށް ހުޅުވާލުމުން ކުރިމަތިލާފައިވަނީ އެމްއެންޕީގެ ރައީސް އަދި ދަނގެތި ދާއިރާގެ މެންބަރު މުހައްމަދު ނާޒިމް އެކަންޏެވެ. ޕްރައިމަރީގައި ވާދަކުރާނެ މީހަކު ނެތުމުން އެމްއެންޕީގެ ރިޔާސީ ޓިކެޓްވަނީ ނާޒިމަށް ލިބިވަޑައިގެންފައެވެ. އެމްއެންޕީއަކީ ރާއްޖޭގައި އެންމެ ފަހުން އުފެއްދި ސިޔާސީ ޕާޓީއެވެ.
ރިޔާސީ އިންތިޚާބުގައި ވާދަކުރުމުގެ ޝައުވެރިކަން ގިނަ ޕާޓީތަކަކުން ވަނީ ފާޅުކޮށްފައެވެ. އެގޮތުން އެމްޑީޕީއާއި، ޕީޕީއެމްއާއި، އެމްއެންޕީއާއި، ޖޭޕީންވެސް ވަނީ ރިޔާސީ އިންތިޚާބުގައި ވާދަކުރުމުގެ ޝައުގުވެރިކަން ފާޅު ކޮށްފައެވެ. އެގޮތުން ޕީޕީއެމުން ރިޔާސީ އިންތިޚާބުގައި ވާދަކުރުމަށް ކެނޑިޑޭޓެއްގެ ގޮތުގައި ރައީސް ޔާމީން ކަނޑައަޅާފައިވާއިރު، ވެރިކަންކުރާ މައި ޕާޓީ، އެމްޑީޕީގެ ރިޔާސީ ކެނޑިޑޭޓަކީ ރައީސް ޞާލިހެއެވެ.
ޖުމްހޫރީ ޕާޓީގެ ކެނޑިޑޭޓެއް ސާފުވަނީ މިމަހުގެ 30 ވަނަ ދުވަހުއެވެ. ކޮންމެ ފަސް އަހަރަކުން އެއް ފަހަރު ބާއްވާ ރިޔާސީ އިންތިޚާބު ބާއްވަން ތާވަލްކޮށްފައި ވަނީ ސެޕްޓެމްބަރު މަހަށެވެ.
