އިދިކޮޅުން ރޭ ކުރިއަށް ގެންދިޔަ މުޒާހަރާގެ ތެރެއިން ރައީސް އިބްރާހިމް މުހައްމަދު ސޯލިހުގެ މޮޓޯކޭޑަށް ހުރަސްއެޅި މައްސަލާގައި، އެމަނިކުފާނަށް ދޭ ސެކިޔުރިޓީ ފެއިލްވުމުގެ ޒިންމާ ޑިފެންސް މިނިސްޓަރު މާރިޔާ އަހުމަދު ދީދީ ނަންގަވަންޖެހޭ ކަމަށް ބުނެ، އޭނާ މަގާމުން ވަކިކުރަން ގޮވާލައި އިދިކޮޅުން ހުށަހެޅި ކުއްލި މައްސަލަ މަޖިލީހަށް ބަލައިނުގަނެ ބޭރުކޮށްލައިފިއެވެ.
ރޭ ހުޅުމާލޭގައި ބޭއްވި ރެހެންދި އެވޯޑު ހަފުލާގައި ބައިވެރިވެވަޑައިގަތުމަށް ފަހު ރައީސް ސޯލިހު މާލެ ވަޑައިގެންނެވި ވަގުތު ޕީޕީއެމް ސަޕޯޓަރުން ދިޔައީ އެ ޕާޓީގެ އޮފީސް ދޮރުމަތީގައި އަޑުއުފުލަމުންނެވެ. މޮޓާކޭޑު ކުރިއަށްދާން މުޒާހަރާގެ ބައިވެރިން ފުރުސަތު ނުދިނުމުން މޮޓޯކޭޑު އެ ސަރަހައްދުގައި 15 ވަރަކަށް މިނެޓު ތާށިވިއެވެ. ކާރުކޮޅަށް ކުރިއަށް ދެވޭ ގޮތް ނުވުމުން އަނބުރާލެއްވުމަށް ފަހު ވަޑައިގަތީ ބޮޑުތަކުރުފާނުގެ މަގުގެ ދެކުނަށެވެ.
ފަރެސްމާތޮޑާގެ މެމްބަރު ހުސެއިން މުހައްމަދު ލަތީފް މަޖިލީހުގެ މިއަދުގެ ޖަލްސާއަށް ހުށަހެޅުއްވި ކުއްލި މައްސަލައިގައި ބުނީ، އިދިކޮޅުގެ އެއްވުމެއް ކުރިއަށްދިޔަ ވަގުތެއްގައި އެ ސަރަހައްދަށް ރައީސްގެ މޮޓޯކޭޑު ވަނުމަކީ ނޭނގި ކުރެވޭނެ ކަމަށް ގަބޫލުނުކުރެވޭ ކަމަށެވެ.
ރައީސްގެ މޮޓޯކޭޑް ސިޔާސީ ހަރަކާތެއް ހިނގަމުންދާ ސަރަހައްދެއްގެ ތެރެއަށް ވަދެގެން ދިއުމަކީ ނޭނގި ކުރެވޭނެ ކަމެއް ކަމަށް ގަބޫލެއް ނުކުރެވޭ. މިއީ ވަރަށް ބޮޑަށް ރޭވިގެން ހިނގާފައިވާ އަމަލެއް.
– ހުސެއިން މުހައްމަދު ލަތީފް ވިދާޅުވިއެވެ.
އޭގެ އިތުރުން، މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާގައި އެމަނިކުފާނަށް ސެކިއުރިޓީ ފޯރުކޮށްދިނުމުގައި އިހުމާލުވެފައިވާކަން ހާމަވެފައިވަނިކޮށް، ރައީސް ސޯލިހުގެ ސެކިއުރިޓީ ބްރީޗުވުމުގެ ޒިންމާ ޑިފެންސް މިނިސްޓަރުގެ ހައިސިއްޔަތުން މާރިޔާ ނަންގަވަންޖެހޭނެ ކަމަށް ހުސެއިން މުހައްމަދު ލަތީފް ވިދާޅުވިއެވެ.
އެހެންކަމުން، މިނިސްޓަރ މާރިޔާގެ އެ މަގާމުން ވަކިކުރުމުގެ އިތުރުން ރައީސްގެ ސެކިޔުރިޓީ ގަސްދުގައި ބްރީޗުކޮށްލި މައްސަލަ ތަހުގީގުކުރުމަށް ހުސެއިން މުހައްމަދު ލަތީފް ވަނީ ގޮވާލައްވައިފަ އެވެ.
އޭނާ ހުށަހެޅުއްވި ކުއްލި މައްސަލަ ބަލައިނުގަނެ މަޖިލީހުން ބޭރުކޮށްލާފައިވަނީ އެކަމަށް ނެގުނު ވޯޓުގައި ބައިވެރިވި 17 މެމްބަރުންގެ އަގުލަބިއްޔަތުންނެވެ. މައްސަލަ ބަލައި ގަންނަން ވޯޓް ދިނީ ހަމެންބަރުންނެވެ.
ރޭ ޕީޕީއެމް އިން ކުރިއަށް ގެންދިޔަ މުޒާހަރާ އިން 23 މީހަކު ހައްޔަރު ކުރިއެވެ. އޭގެތެރެއިން ނައިފަރު ދާއިރާގެ މެންބަރު އަހަމަދު ޝިޔާމް ވަނީ ދޫކޮށްލާފައެވެ. ނަމަވެސް އެހެން މީހަކު ދޫކޮށްލާފައެއް ނުވެއެވެ.
