ރާއްޖޭގައި ފުރަތަމަ ފަހަރަށް ދިވެހި ފުލުހުން ބޭނުންކުރަންފެށި ޓޭޒާއަކީ ކުށްވެރިންނަށް ހަމަލާދޭން ބޭނުންކުރާ ހަތިޔާރެއްގެ ގޮތުގައި އެމަނިކުފާނު ދެކެވަޑައިނުގަންނަވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ޕޮލިސް ރިސާޗް އެންޑް އިނޮވޭޝަން ކޮންފަރެންސް ހުޅުވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ. ރައީސް ވިދާޅުވީ މުޖްތަމަޢާއި ފަރުދުންގެ ސަލާމަތަށް ނުރައްކާކުރާ ކަންތައް ދަނީ ތަފާތުވަމުން، ބަދަލުވަމުން ކަމުގައެވެ. އެފަދަ ކަންކަން ކުރުމުގައި ބޭނުންކުރާ އުކުޅުތަކާއި ވައްޓަފާޅިވެސް ދަނީ ބަދަލުވަމުން ކަމަށާއި، އަދި އެފަދަ ކުށްތައް ކުރުމުގައި ބޭނުންކުރާ ވަސީލަތްތަކާއި، އެފަދަ ކުށްތަކަށް އަރައިގަތުމަށް ފަހު، ޤާނޫނުގެ އަތްދަށުނުވުމަށް ރާވާ ރޭވުންތައް ވެސް ދަނީ ބަދަލުވަމުން، ތަފާތުވަމުން ކަމަށެވެ.
ރައީސް ވިދާޅުވީ މިއީވެސް ފުލުހުންގެ ތައްޔާރީ ޙާލަތަށް ބަދަލު ގެންނަން މަޖުބޫރު ކުރުވާ ސަބަބު ކަމަށެވެ. އެ ބަދަލުތަކާ އެކަށޭނަ ގޮތަށް ފުލުހުންގެ ޚިދުމަތް ތަރައްޤީ ކުރުމަށް، ވަރަށް ބޮޑަށް އިސްކަމެއް ދޭން ޖެހޭ ކަމަށެވެ. އެގޮތުން ފުލުހުންގެ ޚިދުމަތަށް ބޭނުންވާ ޒަމާނީ ވަސީލަތްތައް ހޯދަން ޖެހޭކަމަށެވެ. ކުރީ ސަފުގައި ޚިދުމަތް ކުރާ ފުލުހުންގެ އޮފިސަރުން، ބޮޑީ ވޯން ކެމެރާ ބޭނުންކުރަން ފެށުމަކީ، އޭގެ ތެރެއިން ފާހަގަކޮށްލެވޭ ހެޔޮ ބަދަލެއް ކަމުގައި ރައީސް ވިދާޅުވިއެވެ. ރައްޔިތުންގެ ދިފާޢުގައި ކިތަންމެ ބޮޑު ނުރައްކަލަކާ ކުރިމަތިލިޔަސް، ފުލުހުންގެ ސަލާމަތާއި ރައްކާތެރިކަން ކަށަވަރުކުރުމަކީވެސް ކުރަންޖެހޭ ކަމެއްކަމަށް ރައީސް ވަނީ ވިދާޅުވެފައެވެ.
އަހަރުގެ ތެރޭގައި ދެން ބޭނުންކުރަން ފަށާނެ އަނެއް ވަސީލަތަކީ، ޓޭޒާ ގަން. މިއީވެސް ނުރައްކާތެރި ކުށްވެރިންނާ ކުރިމަތިލާއިރު، އެ ކުށްވެރިޔާގެ ވެސް އަދި ފުލުސް މީހާގެވެސް ރައްކަލަކަށްޓަކައި ބޭނުންކުރާ ވަސީލަތެއް. ފަހަރެއްގައިވެސް މިއީ، ކުށްވެރިންނަށް ޙަމަލާދޭން ބޭނުންކުރާ ހަތިޔާރެއްގެ ގޮތުގައި އަޅުގަނޑު ނުދެކެން.
– ރައީސް ވިދާޅުވިއެވެ.
ފުލުހުންގެ ޚިދުމަތުގެ ޤާނޫނުގެ ދަށުން ފުލުހުންގެ ސަލާމަތާއި ރައްކާތެރިކަމަށާއި، މުޖުތަމަޢުގެ ސަލާމަތަށްޓަކައި ބޭނުން ކުރަން ފަށާފައިވާ ޓޭޒާ ގަންއަކީ ފުލުހުން ކުރިމަތިލާންޖެހޭ އެކި ސީންތަކާއި ގުޅިގެން މިހާރު ކުރިމަތިވާ މައްސަލަތަކަށް ހައްލު ލިބިގެންދާނެ މުހިންމު ވަޞީލަތެއް ކަމަށް މިގަން ފުރަތަމަ ނޫސްވެރިންނަށް ދައްކާލުމަށް މިދިޔަ އަހަރު ބޭއްވި ނޫސްވެރިންގެ ބައްދަލުވުމުގައި ސީޕީ ވިދާޅުވިއެވެ.
ޓޭޒާގަން ޖެހުމާއެކު މީހާ ބިންމައްޗަށް ވެއްޓި، ގާތްގަނޑަށް 5 ވަރަކަށް ސިކުންތު މީހާގެ ހަރަކާތް ހުއްޓި ފުލުހުންނަށް އޭނާ ބެލުމުގެ ދަށަށް ގެނައުމަށް ފަސޭހަ ވެއެވެ. ފުލުހުން މިގަން ބޭނުން ކުރާ ސީންތަކަކީ އެހާލަތަކާއި ގުޅިގެން އެސަރަހައްދު ކޮންޓްރޯލް ކުރުމަށް އެވަގުތު އެސަރަހައްދުގައި ހަރަކާތްތެރިވާ އިސް އޮފިސަރަށް ފެނިއްޖެނަމަ ބޭނުން ކުރާގޮތަށް ހަމަޖެހިފައިވާ ވަސީލަތެކެވެ.
ޓޭޒާ ގަން ބޭން ކުރާ ކޮންމެ ޕޮލިސް އޮފިސަރެއްގެވެސް ޔުނިފޯމްގައި ބޮޑީވޯން ކެމެރާ ހުންނާނީ ހަރުކޮށްފައެވެ. އެއްވެސް ހާލަތެއްގައި ޓޭޒާގަން ބޭނުންކުރާނަމަ، ބޮޑީވޯން ކެމެރާއަށް އެސަރަހައްދުގައި ހިނގާ ހުރިހާކަމެއް ރެކޯޑު ކުރެވިގެންދާނެއެވެ. އަދި އެސަރަހައްދާއި، ފުލުހުން އެސީންގައި އަމަލުކުރާނެ ގޮތްވެސް ރެކޯޑު ކުރެވެމުންދާނެއެވެ.
