ޖުމްހޫރީ ޕާޓީ (ޖޭޕީ)ގެ ލީޑަރު ޤާސިމް އިބްރާހިމްގެ ތަރުޖަމާނަކަށް މިސަރުކާރުގެ ފުރަތަމަ ހެލްތު މިނިސްޓަރ އަދި ޖުމްހޫރީ ޕާޓީގެ ކުރީގެ ނައިބް ރައީސް އަމީން ހަމަޖައްސަވައިފިއެވެ.
އަމީން ޖުމްހޫރީ ޕާޓީގައި ވަރަށް ގިނަ ދުވަހު ޚިދުމަތް ކޮށްދެއްވާފައިވާ އެޕާޓީގެ އިސްސަފުގައި ހަރަކާތްތެރިވެވަޑައިގަންނަވާ ބޭފުޅެކެވެ. ނިިމިދިޔަ ރައީސް ޔާމީންގެ ވެރިކަމުގައިވެސް އަދި މިވެރިކަމުގައިވެސް ސަރުކާރުގެ މަޤާމުތައް އަމީން ފުރުއްވާފައިވަނީ ޖުމްހޫރީ ޕާޓީގެ ސްލޮޓްގައެވެ.
މިއަދު ބޭއްވި ޖޭޕީގެ ކައުންސިލް ބައްދަލުވުމުގައި އެކި މަޤާމުތަކަށް ވަނީ ބޭފުޅުން އައްޔަންކޮށްފައެވެ. އެގޮތުން ޖުމްހޫރީ ޕާޓީގެ އިސް ތަރުޖަމާނަކަށްވަނީ އަލީ ޞާލިޙް ހަމަޖައްސަވާފައެވެ. މީގެއިތުރުން، ޕާޓީގެ ސެކްރެޓަރީ ޖެނެރަލްގެ މަގާމަށް، މިއަދާ ހަމައަށް ވެސް އެ މަގާމުގައި ހުންނެވި އަލީ އާރިފް ވަނީ ހަމަޖައްސާފައެވެ.
މިއަދު އެ ޕާޓީން ވަނީ ކައުންސިލް ބައްދަލުވުމުގައި މުހިންމު ނިންމުމެއް ނިންމާފައެވެ. އެގޮތުން، ކުރިއަށް އޮތް ރިޔާސީ އިންތިޚާބުގައި، ޖުމްހޫރީ ޕާޓީން ކެންޑިޑޭޓަކު ނެރުމަށް ނުވަތަ ޕާޓީ އިސްވެއޮވެ އުފައްދާ ކޯލިޝަނަކުން އިންތިޚާބުގައި ވާދަކުރުމަށް މިއަދު ބޭއްވި އެ ޕާޓީގެ 151 ވަނަ ކައުންސިލް ބައްދަލުވުމުގައި ވަނީ ނިންމާފައެވެ. މި ނިންމުން ނިންމާފައިވަނީ ބައްދަލުވުމުގައި ބައިވެރިވި މެމްބަރުންގެ އިއްތިފާގުންނެވެ.
