ސްޕެނިޝް ލީގުގައި އެސްޕަންޔޯލުން ގޯލެއް ޖަހާފައިވަނިކޮށް ފަހަތުން އަރައި 3-1 އިން މޮޅުވެ، ރެއާލް މެޑްރިޑުން ހަމަޖެހުމެއް ހޯދައިފިއެވެ.
މެޗަށް ނުކުތްއިރު 9 ޕޮއިންޓްގެ ފަރަގަކާއެކު ދެވަނާގައި އޮތް ރެއާލް މިހާރު އޮތީ ހަ ޕޮއިންޓްގެ ފަރަގެއްގައެވެ. އެކަމަކު އެއީވެސް އެއްވަނާގައި އޮތް ބާސެލޯނާއަށްވުރެ އިތުރަށް މެޗެއް ކުޅެގެންނެވެ. މެޗު ރެއާލް މެޑްރިޑުން ކާމިޔާބުކުރީ އަށްވަނަ މިނިޓްގައި އެސްޕަނިޔޯލުން ކުރިހޯދާފައި ވަނިކޮށެވެ.
ރެއާލްއަށް ނަތީޖާ ހަމަހަމަކޮށްދިނީ 23 ވަނަ މިނިޓްގައި ވިނީޝިއުސް ޖޫނިއަރއެވެ. ކުރިހޯދައިދިނީ އެޑާ މިލީޓާއޯއެވެ. މެޗުގެ އިތުރު ވަގުތުގައި އަސެންސިއޯ ތިންވަނަ ގޯލެއް ޖަހައި ރެއާލްއަށް ހަމަޖެހުން ގެނެސްދިނެވެ. އަސެންސިއޯ 72 ވަނަ މިނިޓްގައި ކުޅެން ނުކުތީ މޮޑްރިޗްގެ ބަދަލުގައެވެ.
މިމޮޅާއެކު ރެއާލް މެޑްރިޑް ދެވަނާގައި އޮތީ 25 މެޗުން 56 ޕޮއިންޓާއެކުއެވެ. ބާސެލޯނާ އެއްވަނާގައި އޮތީ 24 މެޗުން 62 ޕޮއިންޓާއެކުއެވެ.
