ހިފާފައިވާ ހުޅަނގު އައްސޭރީގެ ޖެނިންގައި އިސްރާއީލު ސިފައިން ހިންގި އަސްކަރީ އޮޕަރޭޝަނެއްގައި ފަލަސްތީނުގެ 6 މީހަކު ޝަހީދުކޮށް، 11 މީހަކު ޒަޚަމް ކޮށްލައިފިއެވެ.
ފަލަސްތީނުގެ ސިއްޙި އިދާރާއިން ހާމަ ކޮށްފައިވާ ގޮތުގައި، އިސްރާއީލު ސިފައިން ދިން ހަމަލާތަކުގައި ޒަޚަމްވީ މީހުންގެ ތެރެއިން ދެމީހަކަށް ވަރަށް ސީރިއަސް އަނިޔާތަކެއް ވަނީ ލިބިފައެވެ.
މަންޒަރު ދުށް ފަރާތްތަކުން އޭއެފްޕީއަށް މައުލޫމާތު ދީފައިވާ ގޮތުގައި، އިސްރާއިލް ސިފައިންވަނީ ޖެނިންގެ ގެއެއް ވަށާލުމަށްފަހު އެގެއަށް ރޮކެޓް ހަމަލާތައް ދީފައެވެ. ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި އިސްރާއީލު ސިފައިންގެ އަސްކަރީ އުޅަނދުތައް ޖެނިން ރެފިއުޖީ ކޭމްޕަށް ވަންނަމުން ދިޔައިރު، އަސްކަރީ ހެލިކޮޕްޓަރުތައްވަނީ މަތިން އުދުހެމުން ގޮސްފައި ވެއެވެ.
އިސްރާއީލު ސިފައިން ބުނެފައިވަނީ އެމީހުން ޝަހީދު ކޮށްލާފައިވާ ފަލަސްތީނު މީހުންނަކީ، ފަލަސްތީނުގެ ވިލެޖެއް ކަމުގައިވާ ހުވާރާ ވިލެޖް ކައިރީގައި، ގާނޫނާ ޚިލާފަށް ގާއިމްކޮށްފައިވާ އާބާދީތައް ކައިރީގައި މަރާލާފައިވާ އިސްރާއީލުގެ ދެމީހުންގެ މަރުގެ ޒިންމާ އުފުލާންޖެހޭ މީހުން ކަމުގައެވެ.
އިސްރާއީލުގެ ބޮޑުވަޒީރުގެ އޮފީހުން ބުނެފައިވަނީ ފާއިތުވެދިޔަމަހު އިސްރާއީލުގެ އާންމު ރައްޔިތަކު މަރާލި ފަލަސްތީނު މީހާ މަރާލާފައި ވާކަމުގައެވެ.
އަލްޖަޒީރާއިން ރިޕޯޓު ކޮށްފައިވާ ގޮތުގައި ފަލަސްތީނުގެ ރާމައްލާގައި އިސްރާއިލު ސިފައިންވަނީ އަންގާރަދުވަހު ހަވީރު، ފަލަސްތީނުގެ އެހެން ރެފިއުޖީ ކޭމްޕެއް ކަމުގައިވާ ނާބުލުސްގައިވެސް އަސްކަރީ އޮޕަރޭޝަނެއް ހިންގާފައި ކަމުގައެވެ. މި އޮޕަރޭޝަންގައި އިސްރާއީލު ސިފައިންވަނީ އަސްކަރު ރެފިއުޖީ ކޭމްޕުގެ ގެއަކަށްވަދެ، ފަލަސްތީނުގެ 3 މީހަކު ހައްޔަރުކޮށް، 49 އަހަރުގެ މީހަކު ޝަހީދު ކޮށްލުމަށްފަހު އެމީހާގެ 2 ކުދިން ހައްޔަރު ކޮށްފައެވެ.
