ރައީސުލްޖުމްހޫރިއްޔާކަމުގެ ހުވައި އެންމެފަހުން ކުރެއްވީ ނައިބު ރައީސް ފައިސަލް ނަސީމްކަމަށާ، އެހެންކަމުން މިހާރު ރާއްޖޭގެ ރައީސުލްޖުމްހޫރިއްޔާ އާ މެދު ސުވާލު އުފެދިފައިވާ ކަމަށް ބުނެ، އިދިކޮޅު ޕީޕީއެމުން ސުޕްރީމް ކޯޓަށް ހުށަހަޅި މައްސަލަ ބޭރުކޮށްލައިފިއެވެ.

މިމައްސަލަ ކޯޓަށް ހުށަހެޅީ ޤާނޫނީ ވަކީލް އަޙްމަދު ސިއްދީޤެވެ. މައްސަލަ ސުޕްރީމް ކޯޓަށް ހުށަހެޅީ މިދިޔަ މަހުގެ 27ވަނަ ދުވަހުއެވެ. ސިއްދީގުވަނީ އެމައްސަލަ ބަލައި ނުގަނެ ކޯޓުން ބޭރުކޮށްލިކަން ހާމަކުރައްވައި މިއަދު ޓްވީޓެއް ކުރައްވާފައެވެ. އެހެންނަމަވެސް އޭގެ މާބޮޑު ތަފްސީލެއް ނުދެއްވައެވެ.

ރައީސް އިބްރާހީމް މުހައްމަދު ސޯލިހްއާއި ނައިބު ރައީސް ފައިސަލް ނަސީމްގެ ތެރެއިން މި ވަގުތު ގާނޫނީ ގޮތުން ރައީސުލްޖުމްހޫރިއްޔާއަކީ ކޮން ބޭފުޅެއް ކަން ޔަގީން ނުވާތީ އުފެދިފައިވާ ދުސްތޫރީ މައްސަލައަށް ހައްލެއް ހޯދުމަށް ގޮވާލައި ރައްޔިތުންގެ މަޖިލީހަށް ގަރާރެއްވެސް އިދކޮޅުން ހުށަހެޅިއެވެ.

ރައްޔިތުންގެ މަޖިލީހަށް މި ގަރާރު ހުށަހެޅުއްވީ މަހިބަދޫ ދާއިރާގެ މެންބަރު އަހުމަދު ތޯރިގު އެވެ. ގަރާރުގައި ބުނެފައި ވަނީ ނައިބު ރައީސް ފައިސަލް ނަސީމް ރައީސުލްޖުމްހޫރިއްޔާގެ ދުސްތޫރީ ހުވާ ކުރައްވާ ރައީސުލްޖުމްހޫރިއްޔާގެ މަގާމާ ހަވާލުވެ ވަޑައިގަނެފައި ވަނިކޮށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް އަނބުރާ ރައީސުލްޖުމްހޫރިއްޔާގެ މަގާމާއި ހަވާލުވެ ވަޑައިގަތުމުން ދުސްތޫރީ އޮޅުން ބޮޅުމެއް އުފެދިފައިވާ ކަމަށެވެ.

ތޯރިގުގެ ގަރާރުގައި ގޮވާލައްވާފައިވަނީ މިހާރު އުފެދިފައިވާ ދުސްތޫރީ އޮޅުން ބޮޅުމަށް ސާފު ހައްލެއް ހޯއްދަވައި ދިނުމަށެވެ. ރައީސް ސޯލިހް ކުރެއްވި އޮޕަރޭޝަނަކާއި ގުޅިގެން ހޭފުޅުނައްތާފައި ވާތީ ނައިބު ރައީސް ފައިސަލް ރައީސުލްޖުމްހޫރިއްޔާގެ ހުވާ ކުރައްވާފައިވާކަން ގަރާރުގައި ފާހަގަކޮށްފައިވެއެވެ.

މީގެ އަހަރެއް ކުރިން ރައީސް ސޯލިހް، ތައިރޮއިޑް ފަރުވާއަކަށް އޮޕަރޭޝަނެއް ކުރެއްވި ވަގުތު ކޮޅަށް ނައިބު ރައީސް ފައިސަލްއަށް ވަގުތީ ގޮތުން ރައީސްގެ މަސްއޫލިއްޔަތުތަކާ ހަވާލުވެވަޑައިގަންނަވަން ރައީސް ކަމުގެ ހުވާ ކުރެއްވިއެވެ. މަސްއޫލިއްޔަތުތަކާ ނައިބު ރައީސް ހަވާލުވެވަޑައިގަތީ އެންމެ ތިން ގަޑިއިރަށެވެ. އެއަށް ފަހު ރައީސް އޮފީހުން ބުނީ ރައީސްގެ މަސްއޫލިއްޔަތުތަކާ ރައީސް ސޯލިހް އަލުން ހަވާލުވެވަޑައިގެންނެވި ކަމަށެވެ. އެ ކަން ކުރީ ގާނޫނު އަސާސީގެ 123 ވަނަ މާއްދާގައިވާ ގޮތުގެ މަތިން މަޖިލީހުގެ ރައީސަށް އެކަން ލިއުމުން އެންގެވުމަށް ފަހުގައި ކަމަށް ވެސް ރައީސް އޮފީހުން ބުނެފައިވެއެވެ.

ނައިބު ރައީސް ފައިސަލްއަށް ރައީސުލްޖުމްހޫރިއްޔާ ކަމުގެ ހުވާ ލައިދެއްވީ އުއްތަމަ ފަނޑިޔާރު އަހްމަދު މުއުތަސިމު އަދުނާންއެވެ. ނަމަވެސް ހުވާކުރެއްވިތާ ތިން ގަޑިއިރާއި 40 މިނެޓް ފަހުން ރައީސް ސޯލިހް އަލުން ވަނީ ރައީސުލްޖުމްހޫރިއްޔާ މަގާމުގެ މަސްއޫލިއްޔަތުތަކާ ހަވާލުވެވަޑައިގެންފަ އެވެ. މިހުރިހާ ކަމެއްވެސް ރައީސް އޮފީހުން ރަސްމީކޮށް އިއުލާންކޮށްފައިވެއެވެ.

މިމައްސަލާގައި ޤާނޫނީ ބައެއް ބޭފުޅުންވަނީ މީގެ ކުރިންވެސް ސުވާލު އުފައްދާފައެވެ. މިއީ ޤާނޫނީ ގޮތުން ސުވާލު އޮތް މައްސަލައެއްގެ ގޮތުގައި ޤާނޫނީ ދާއިރާގެ ބައެއް ބޭފުޅުން ދެކެއެވެ.