މާލެއާއި ހުޅުމާލޭގައި ފުޅާ ދާއިރާއެއްގައި މާރޓު ވިޔަފާރި ކުރަމުންދާ ރެޑްވޭވްއިން މާލޭގެ މަޖީދީ މަގުގައި، މިހާތަނަށް އެ ކުންފުނިން ހުޅުވާ އެންމެ ބޮޑު ފިހާރަ ހުޅުވައިފިއެވެ.
"ރެޑްވޭވް ސެންޓްރަލް"ގެ ނަމުގައި ހުޅުވި މި ފިހާރަ ހުޅުވާފައިވަނީ މަޖީދީ މަގުގައި އަގޯރާ ސޮޕިންގ މޯލް ކުރިން ހުރި ތަނުގައެވެ. ރެޑްވޭވްގެ މި ފިހާރަ ހުޅުއްވައި ދެއްވީ އެކުންފުނީގެ ޗެއަރމަން، ރައްޔިތުންގެ މަޖިލިހުގެ އޭދަފުށީ ދާއިރާގެ މެމްބަރު އަހުމަދު ސަލީމެވެ.
ރެޑްވޭވްއިން އަލަށް ހުޅުވި މިފިހާރަ ހަދާފައި ހުންނަނީ ތިން ފަންގި ފިލާއަކަށެވެ. އޭގެތެރެއިން އެންމެ ތިރީ ފަންގިފިލާގައި ހުންނަނީ ކާބޯތަކެތަކެއްޗާއި، ތަަރުކާރީއާއި މޭވާގެ ބާވަތްތަކެވެ. ޖެހިގެން ހުންނަ، ފުރަތަމަ ފަންގިފިލާގައި ހުންނަނީ ކޮސްމެޓިކްސްގެ ބާވަތްތަކެވެ. ދެވަނަ ފަންގި ފިލާ ގައި ހުންނަނީ ބަދިގެ ސާމާނާއި ގޭތެރޭގައި ހިފާގެންގުޅޭ ތަކެއްޗެވެ. ތިންވަނަ ފަންގިފިލާގައި ހުންނަނީ އަންނައުނުގެ ބާވަތްތަކެވެ.
އިއްޔެ މާލޭގައި ހުޅުވިގެން ދިޔައީ، ރެޑްވޭވްއިން ހިންގާ 16 ވަނަ ފިހާރައެވެ. ފިހާރަ ހުޅުއްވައި ދެއްވަމުން، ކުންފުނީގެ ޗެއަރމަން އަހުމަދު ސަލީމް ވިދާޅުވީ ރެޑްވޭވްއިން އަބަދުވެސް އެންމެ ބޮޑު އިސްކަމެއް ދެނީ ވީހާވެސް ހެޔޮ އަގެއްގައި ރައްޔިތުންނަށް ތަކެތި ގަންނަން ލިބޭނެ މަގު ފަހު ކުރުމަށް ކަމުގައެވެ.
ސަލީމު ވިދާޅުވީ، ސަރުކާރުން ޖީއެސްޓީ 8 އިންސައްތައަށް ބޮޑު ކޮށްފައިވާއިރު، ރެޑްވޭވްއިން ބާޒާރުގައި ލިބެންހުންނަ ތަކެތީގެ އަގު ބޮޑުވެގެން ދިޔަނުދީ ނުހިފަހައްޓާމަ، ތަކެތީގެ އަގު 50 އިންސައްތައަށްވުރެވެސް ބޮޑަށް އުފުލިގެން ދިޔައީސްކަމުގައެވެ.
އަދި ސަލީމް ވިދާޅުވީ ކުރިޔަށް އޮތް ރޯދަމަހަށްވެސް މުދަލުގެ އަގު ބޮޑު ނުކޮށް، ރެޑްވޭވްއިން މިހާރުވެސް ވިއްކާ އަގުގައި މުދާ ވިއްކަމުން ދާނެކަމުގައެވެ.
ސަލީމް ވިދާޅުވީ، އެކުންފުނިން ބޮޑު އަގުގައި ބިޑް ކޮށްގެންވެސް ހުޅުމާލޭގެ ދެވަނަ ފޭސްގައި ރޭޑްވޭވްގެ ފިހާރައެއް ހުޅުވުމުގެ ފުރުސަތު ނުލިބުނު ކަމަށާއި، ދެވަނަ ފޭސްއިން ބިމެއް ލިބިއްޖެނަމަ، ހުޅުމާލޭ ފުރަތަމ ފޭސްގައި ހުޅުވާފައިވާ ރެޑްވޭވް މެގަ މޯލްއަށްވުރެ ބޮޑު ޝޮޕިންގ މޯލްއެއް ދެވަނަ ފޭސްގައި ހުޅުވާނެ ކަމުގައެވެ.
