މިއަހަރު ބާއްވާ ރިޔާސީ އިންތިޚާބިި ކާމިޔާބުކޮށް ދެން އުފެދިގެންދާނީ ރައްޔިތުންނަށް ފުދުންތެރިކަން ގެނެސްދޭނެ ސަރުކާރެއް ކަމުގައި އެމްޑީއޭގެ ލީޑަރު އަހުމަދު ސިޔާމް މުހައްމަދު ވިދާޅުވެއްޖެއެވެ.

ރިޔާސީ އިންތިޚާބުގައިި ވެރިކަން ކުރާ މައި ޕާޓީ އެމްޑީޕީއާއިއެކު ކޯލިޝަން ހަދާފައިވާ އެމްޑީއޭއިން ރޭ ވަނީ ކެމްޕެއިން ބައްދަލުވުމެއް ބާއްވާފައެވެ. ޕާޓީގެ ލީޑަރު ސިޔާމްވެސް ބައިވެރިވި މިބައްދަލުވުމުގައި އެޕާޓީގެ 50 އަކަށް މެމްބަރުން ވަނީ ބައިވެރިވެފައެވެ. މިޖަލްސާގައި ސިޔާމްވަނީ އެމްޑީޕީއާއިއެކު ކޯލިޝަން ހެދި ސަބަބާއި، ރާއްޖޭގެ ކުރިއެރުމާއި ހަމަޖެހުމާއި ގުޅޭގޮތުންވެސް ވާހަކަ ދައްކަވާފައެވެ.

ރޭގެ ޖަލްސާއަށްފަހު ކުރެއްވި ޓުވީޓެއްގައި ސިޔާމް ވިދާޅުވީ އެމްޑީޕީއާއިއެކު ހެދި ކޯލިޝަނަކީ ކާމިޔާބު ކޯލިޝަނަކަށް ވެގެންދާނެ ކަމަށެވެ. އަދި އެމްޑީއޭ ހިމެނޭހެން ދެން އުފެދިގެންދާ ސަރުކާރަކީ ރައްޔިތުންނަށް ފުދުންތެރިކަން ގެނެސްދޭނެ ކާމިޔާބު ސަރުކާރުކާރަކަށް ވެގެންދާނެ ކަމަށް ސިޔާމް ވިދާޅުވިއެވެ.

2023 ގައި އެމްޑީއޭ ހިމެނޭ ކޯލިޝަން ސަރުކާރު ވެގެންދާނީ ދިވެހި ރައްޔިތުންނަށް ފުދުންތެރިކަން ގެނެސްދޭނެ ސަރުކާރަކަށް.

– ސިޔާމް ވިދާޅުވިއެވެ.

މިއީ ރާއްޖޭގައި މިހާތަނަށް ބާއްވާ ރިޔާސީ އިންތިޚާބެއްގައި އެމްޑީޕީއާއިއެކު އެމްޑީއޭއިން މަސައްކަތް ކުރާ ފުރަތަމަ ފަހަރެވެ. މީގެ ކުރިން އެޕާޓީއަކީ ކުރީގެ ރައީސް ޔާމީނާއި ވަރަށް ގާތް އަދި ރައީސް ޔާމީނާއިއެކު ސިޔާސީ މަސައްކަތް ކުރަމުންދިިޔަ ޕާޓީއެކެވެ. މިފަހަރުވެސް އެމްޑީއޭއިން ވަނީ ކޯލިޝަން ހެދުމުގެ ކުރިން ޕީޕީއެމްއާއިއެކު މަޝްވަރާކޮށްފައެވެ. ނަމަވެސް އެޕާޓީގެ ކައުންސިލުން ނިންމީ އެމްޑީޕީއާއިއެކު ކޯލިޝަން ހެދުމަށެވެ.

ކޯލިޝަން ހެދުމަށް އެމްޑީއޭއިން ވަނީ ރައީސް ޔާމީނާއިކު ކުރި ސިޔާސީ މަސައްކަތަށް ވަރަށް ބޮޑަށް ފާޑުކިޔާފައެވެ. އަދި ނިމިދިޔަ ވެރިކަމުގެ ތެރޭގައި އެޕާޓީއަށް ލިބެންޖެހޭ މިންވަރާއި ގާތަށްވެސް ފުރުސަތު ކޯލިޝަން ސަރުކާރުގެ ތެރެއިން ލިބިފައި ނުވާކަމަށް ވަނީ ބުނެފައެވެ.