ނާޖައިޒް ގޮތުގައި ޤާނޫނީ އިމުން ބޭރުން އެއްވެސް މަންފާއެއް ހޯއްދެއްވުމަށް މިހާތަނަށްވެސް އަދި ކުރިއަށް އޮތް ތަނުގައިވެސް ޖުމްހޫރީ ޕާޓީގެ ލީޑަރު ޤާސިމް އިބްރާހިމް މަސައްކަތް ނުކުރައްވާނެކަމަށް ޖުމްހޫރީ ޕާޓީގެ ތަރުޖަމާން އަލީ ޞާލިހު ވިދާޅުވެއްޖެއެވެ.

އޭނާ މިހެން ވިދާޅުވީ ޖުމްހޫރީ ޕާޓީގެ ލީޑަރު ޤާސިމް އިބްރާހިމް އިއްޔެ ރައީސް ޞާލިހާއި އެކު ބޭއްވި ބައްދަލުވުމާއި ގުޅޭގޮތުން ބައެއް މީޑިއާތަކުގައި ސޯޝަލް މީޑިއާގައި ދެކެވެމުންދާ ވާހަކަތަކާއި ގުޅިގެން ކުރެއްވި ޓުވީޓެއްގައެވެ. ބައެއް ފަރާތްތަކުން ތުހުމަތު ކޮށްފައިވާ ގޮތުގައި ޤާސިމް ރައީސާއި ބައްދަލު ކުރެއްވީ މާލީ މަންފާތަކާއި، އެނޫންވެސް އެހެން ކަންކަން ހަމަޖެއްސުމަށެވެ.

މިކަމާއި ގުޅިގެން ޖޭޕީގެ ތަރުޖަމާން އަދި ޓްރާސްޕޯޓް މިނިސްޓްރީގެ ސްޓޭޓް މިނިސްޓަރ އަލީ ޞާލިހު ވިދާޅުވީ ޤާސިމަކީ ނުހައްގުން އެއްވެސް މަންފާއެއް ހޯއްދަވާނެ ބޭފުޅެއް ނޫންކަމަށެވެ. ރާއްޖޭގެ އެއްވެސް ފަރެއް، ފަޅެއް އަދި ފޮނޮޅެއްވެސް ނާޖައިޒް ގޮތުގައި ހޯއްދެވުމަށް ޤާސިމް މަސައްކަތް ނުކުރައްވާނެކަމަށެވެ.

ދިވެހިރާއްޖޭގެ އެއްވެސް ފަޅުރަށެއް، ފަޅެއް، ފަރެއް އަދި ފިނޮޅެއްވެސް ނާޖާއިޒުގޮތުގައި ނުހައްގުން ބަޔަކާއި ގުޅިގެންވިޔަސް އަދި އެނޫންގޮތަކުންވިޔަސް މިހާތަނަށް އެއްވެސް ސަރުކާރަކުން ޖުމްހޫރީޕާޓީގެ ލީޑަރ އޮނަރަބްލް ގާސިމް އިބްރާހީމް ހޯއްދަވައިފައެއް ނުވެއެވެ.

– އަލީ ޞާލިހު ވިދާޅުވިއެވެ.

އޭނާ ވިދާޅުވީ ޤާސިމަކީ ދުވަހަކުވެސް ނާޖައިޒް މުއާމަލާތްތަކަށް ހިތްވަރުދީ އެފަދަ ކަންކަމަށް ތާއީދު ކުރެއްވި ބޭފުޅެއް ނޫންކަމަށެވެ. އަދި މިހާތަނަށް އެމަނިކުފާނު ކުރައްވާ އަމިއްލަ ވިޔަފާރީގެ މަސައްކަތްތަކާއި، ސިޔާސީ މަސައްކަތްތަކުގެ ތެރޭގައިވެސް ނާޖައިޒް މަންފާ ހޯއްދެވުމަށް މަސައްކަތް ކުރައްވާފައި ނުވާނެކަމަށް އަލީ ޞާލިހު ވިދާޅުވިއެވެ.

އެފަދަ މުއާމަލާތެއް ކުރުމުގެ ވިސްނުންފުޅެއް ދުވަހަކުވެސް ނުގެންގުޅުއްވައެވެ. އެފަދަ މުއާމަލާތެއްގެ މުގާބިލުގައި އެއްވެސް ފަރާތަކާއެކު މުއާމަލާތެއް ކުރެއްވިކަން އެއްވެސް އިރަކު ފެންނާކަށްވެސް ނެތް.

– އަލީ ޞާލިހު ވިދާޅުވިއެވެ.

ރައީސުލްޖުމްހޫރިއްޔާގެ އޮފީހުގެ ބޭރުގައި ހުންނަވާ ނޫސްވެރިންނާއި ވާހަކަ ދައްކަވަމުން ޤާސިމް ވިދާޅުވީ، ރައީސުލްޖުމްހޫރިއްޔާއާ ބައްދަލުކުރައްވާ ސިޔާސީ ވާހަކަ ދެއްކެވިކަމަށެވެ. ނަމަވެސް ކޯލިޝަން ހެދުމާއި، ރިޔާސީ އިންތިޚާބުގައި ޤާސިމް ނުވަތަ ޖުމްހޫރީ ޕާޓީން ނިންމާނެ ގޮތަކާއި ގުޅޭގޮތުން ޤާސިމް ވާހަކަ ނުދައްކަވައެވެ.

ޤާސިމް ވިދާޅުވީ، ރިޔާސީ އިންތިޚާބުގައި އެޕާޓީން ކެނޑިޑޭޓެއް ނެރުމަށް ނުވަތަ އެޕާޓީން އިސްވެ އޮވެ ކޯލިޝަން ހެދުމަށް ޤަރާރެއް ޤައުމީ ކޮންފަރެންސުން ފާސްކޮށްފައިވާކަމަށެވެ. ނަމަވެސް އެ ޤަރާރާއި މެދު ގޮތެއް ނިންމާނީ ޕާޓީގެ ކައުންސިލުންކަމަށް ޤާސިމް ވިދާޅުވިއެވެ. ކޯލިޝަން ހަދަން އެއްވެސް ޕާޓީއަކާއެކު މަޝްވަރާ ކޮށްފައި ނުވާކަމަށްވެސް ގާސިމް ވިދާޅުވިއެވެ.